Oinsá sira bele rona?
1. Tansá mak dala ruma susar atu halaʼo serbisu haklaken? Tansá ita tenke kontinua haklaken?
1 Tanba Maromak Jeová nia loron besik loos ona, ita presiza duni atu hakaʼas an atu ajuda ema barak tan atu hetan koñesimentu loos kona-ba Maromak no ninia hakarak ba ema. (Joao 17:3; 2 Ped 3:9, 10) Dala ruma susar atu halo ida-neʼe kuandu ita halaʼo serbisu haklaken, tanba ema barak la interese ka goza ita. (2 Ped 3:3, 4) Maski nuneʼe, ita bele fiar katak sei iha ema barak iha ita-nia haklaken-fatin neʼebé sei simu lia-foun diʼak. Maibé, oinsá mak ema sira-neʼe bele rona bainhira la iha ema atu haklaken?—Rom 10:14, 15.
2. Oinsá mak apóstolu Paulo nia ezemplu fó aten-brani mai ita?
2 Tahan kuandu ema kontra ita: Atu ajuda ema neʼebé hakarak rona lia-foun diʼak kona-ba Maromak nia Reinu, ita kontinua atu haklaken. Kuandu Paulo bá toʼo Europa, nia komesa haklaken iha sidade Filipe. Ema barak iha sidade neʼe duun matak Paulo no Silas, no baku sira ho ai, no hatama sira iha dadur laran. (Apos 16:16-24) Maski ida-neʼe fó terus duni ba sira, maibé Paulo la taʼuk atu kontinua haklaken. Kuandu Paulo bá Tesalonika, sidade tuirmai neʼebé nia vizita bainhira nia halaʼo knaar nuʼudar misionáriu, nia sai brani ‘atu hatoʼo liafuan diʼak’ ho Maromak nia ajuda. (1 Tes 2:2) Paulo nia ezemplu hatudu ba ita atu “keta kole” hodi kontinua haklaken.—Gal 6:9.
3. Saida mak halo ema balu, neʼebé uluk la interese, troka sira-nia hanoin?
3 Ema barak neʼebé uluk lakohi rona lia-foun diʼak ikusmai troka sira-nia hanoin. Karik sira hasoru susar kona-ba osan, kona-ba moras, kona-ba família neʼebé mate, ka rona kona-ba situasaun aat seluk neʼebé akontese iha mundu, buat sira-neʼe bele halo sira troka sira-nia hanoin. (1 Kor 7:31, MF) Labarik balu la simu lia-foun diʼak tanba sira-nia inan-aman la simu, maibé kuandu labarik sira-neʼe sai boot ona sira hakarak rona. Ita-nia haklaken neʼebé la para bele ajuda ema atu “bolu Naʼi [Jeová] nia naran” antes oportunidade atu halo ida-neʼe la iha ona.—Rom 10:13.
4. Saida mak book ita atu la para atu haklaken?
4 La para atu haklaken: Ita-nia domin ba Maromak no ba ema seluk sei book ita atu la para atu haklaken no halo dixípulu, hanesan apóstolu sira halo iha tempu uluk. (Apos 5:42) Ema barak ohin loron “tanis no halerik kona-ba buat aat hotu” neʼebé akontese daudaun. (Eze 9:4) Ema sira-neʼe sente kmaan no iha esperansa bainhira rona lia-foun diʼak! Maski ema barak lakohi rona, Bíblia ajuda ita atu fiar katak Maromak Jeová kontente ho ita-nia hakaʼas-an.—Ebr 13:15, 16.