Haklaken nafatin
1 Dala ruma ita hanoin katak ita haklaken beibeik ona iha ita-nia haklaken fatin no ema barak lakohi rona. Maibé, iha razaun sira neʼebé importante tebes tansá ita tenke kontinua atu haklaken.—Mt 28:19, 20.
2 Nuʼudar sasin: Jesus fó-hatene nanis katak haklaken lia-foun Reinu nian mak parte importante ida husi sinál neʼebé hatudu katak “mundu neʼe atu hotu” no ema sei halaʼo haklaken neʼe “hodi fó sasin ba povu hotu”. (Mt 24:3, 14) Bainhira ita hola parte iha serbisu haklaken lia-foun diʼak Reinu nian, maski ema haree deʼit ita, ida-neʼe mós fó sasin neʼebé klaru ba sira. No mós, karik iha tempu neʼebé ita haklaken ema la simu ita-nia mensajen, maibé sira balu sei koʼalia kona-ba ita-nia vizita ba oras balun ka loron balun. Hodi hanoin-hetan tansá mak ita tenke haklaken, neʼe sei ajuda ita atu haklaken nafatin. Kuandu ita hola parte beibeik atu haklaken no fó avizu ba ema, ita ajuda atu halo kumpre Maromak nia liafuan neʼebé hatete nanis ona. No ida-neʼe halo Maromak Jeová kontente.—2 Tes 1:6-9.
3 Koko nafatin: Ema barak iha serbisu ruma no la iha tempu barak, tan neʼe ita presiza pasiénsia atu dada sira-nia atensaun ba lia-loos. Porezemplu, Testemuña ida vizita feto ida semana-semana ba tempu kleur. Liutiha tinan ida mak feto neʼe foin husu nia atu tama no tuur hodi koʼalia kona-ba Bíblia. Feto neʼe gosta buat neʼebé nia rona no hahú atu estuda Bíblia, tuir reuniaun sira, no lakleur nia hatete katak nia hakarak atu hetan batizmu.
4 Situasaun mundu nian no mós ema nia hanoin sempre troka. Iha ema barak neʼebé uluk la simu ita-nia mensajen maibé agora sira prontu atu rona esperansa neʼebé ita fahe. Maski ema barak la simu ita, maibé se iha ema ida deʼit neʼebé hakarak rona ita-nia mensajen Reinu nian, ita-nia hakaʼas-an la sai saugati deʼit.
5 Iha mundu tomak, ema barak tebes “tanis no halerik tan buat aat hotu neʼebé akontese daudauk”. (Eze 9:4) Rezultadu husi ita-nia serbisu haklaken hatudu momoos katak sira neʼebé laran-diʼak simu duni mensajen Reinu nian. (Isa 2:2, 3) Tan neʼe, mai ita hakaʼas an atu haklaken nafatin ho domin nuʼudar ita koko beibeik atu “lori lia-foun diʼak kona-ba buat neʼebé furak liu”.—Isa 52:7; Apos 5:42.