Prepara an atu la simu raan

“Tempu no akontesimentu neʼebé mosu derrepente deʼit” kona ema hotu. (Ecle 9:11) Tan neʼe, karik ita mós bele hetan moras ka kanek todan no presiza bá ospitál. No dala ruma doutór sira hakarak ita atu simu transfuzaun raan. Atu ita prontu hasoru situasaun neʼe, Maromak Jeová ajuda ita liuhusi ninia organizasaun iha dalan oioin. Maibé nia mós hakarak ita atu halo buat ruma. Informasaun tuirmai neʼe sei ajuda atu prepara ita-nia an.

◼ Sempre lori Ita-nia “Surat atu Fó-hatene kona-ba Tratamentu Médiku”.

◼ Ita-nia oan mós tenke lori ninia “Kartaun Identidade”.

◼ Lee livru “Maromak nia Domin” iha pájina 77-9, ho subtítulu “Tratamentu neʼebé uza raan”; no pájina 215-18, ho títulu “Desizaun neʼebé ita presiza halo kona-ba raan”. Hakaʼas an atu hatene didiʼak kona-ba parte kiʼik husi raan no mós kona-ba métodu atu halo operasaun.

◼ Foti desizaun tuir Ita-nia laran se Ita sei simu ka la simu ai-moruk balu neʼebé uza parte kiʼik liu husi raan. No mós foti desizaun se Ita sei simu ka la simu métodu ruma hodi uza Ita-nia raan rasik. Depois, hakerek Ita-nia desizaun sira-neʼe iha “Surat atu Fó-hatene kona-ba Tratamentu Médiku”.

Antes atu bá ospitál, se bele, diʼak atu fó-hatene katuas sira, atu nuneʼe sira bele ajuda Ita. Keta demora atu fó-hatene, liuliu kuandu labarik kiʼik mak moras todan.

Fó-hatene doutór ho klaru katak Ita la simu raan: Dala ruma irmaun no irmán balu la fó-hatene uluk sira-nia desizaun atu la simu raan ba doutór sira. Se Ita la fó-hatene, ida-neʼe sei halo susar ba doutór sira, no ikusmai, karik sira sei halo buat ruma neʼebé kontra Ita-nia desizaun. Se doutór hatene kona-ba tratamentu neʼebé Ita sei simu no la simu, no haree surat tratamentu médiku neʼebé hakerek ho klaru no asina ona, ida-neʼe sei ajuda sira atu fó tratamentu lalais, no mós atu buka tratamentu seluk neʼebé la uza raan.

Asidente no moras bele kona ita derrepente deʼit, tan neʼe agora kedas mai ita prepara ita-nia an no ita-nia oan atu la simu transfuzaun raan.—Prov 16:20; 22:3.