Ita prenxe ona ka lae?

Prenxe saida? Prenxe “Surat atu fó-hatene kona-ba Tratamentu Médiku”, neʼebé prepara ona ba Testemuña neʼebé hetan batizmu ona. Tanba Ita “la hatene kona-ba aban”, importante tebes atu foti desizaun agora kedas no halo dokumentu kona-ba tratamentu no ai-moruk neʼebé Ita bele simu iha situasaun emerjénsia. (Tgo 4:14; Apos 15:28, 29) Maromak nia organizasaun halo vídeo Transfusion-Alternative Health Care—Meeting Pa-tient Needs and Rights (Tratamentu Saúde neʼebé Troka ho Transfuzaun Raan—Tuir Ema Moras nia Presiza no Direitu) atu ajuda ita. Haree toʼok vídeo neʼe, depois halo orasaun no hanoin filafali buat neʼebé Ita aprende ona hodi buka resposta ba pergunta sira tuirmai neʼe.—Atensaun: Vídeo neʼe fó sai operasaun balu. Tan neʼe, inan-aman tenke haree didiʼak sira-nia oan neʼebé sei kiʼik kuandu haree vídeo neʼe hamutuk.

(1) Tansá mak doutór balu komesa hanoin katak diʼak liu la halo transfuzaun raan? (2) Esplika kona-ba operasaun boot tolu neʼebé halo ona hodi la uza transfuzaun raan. (3) Iha mundu tomak, doutór naʼin-hira mak hatán ona atu halo operasaun lahó transfuzaun raan? Tansá mak sira prontu atu halo nuneʼe? (4) Estudu iha ospitál hatudu saida kona-ba uza raan atu halo tratamentu ba moras? (5) Ema neʼebé simu transfuzaun raan hasoru perigu saida? (6) Doutór sira hanoin oinsá kona-ba tratamentu seluk neʼebé troka ho transfuzaun raan? (7) Tansá mak ema hetan anemia (ka raan menus)? Ema bele tahan toʼo glóbulu mean tun toʼo hira? Doutór sira bele halo saida ba ema moras ho raan menus? (8) Saida mak bele ajuda ema moras atu aumenta fali glóbulu mean? (9) Atu hamenus raan neʼebé suli sai durante operasaun, doutór sira bele halo saida? (10) Tratamentu sira neʼebé la uza transfuzaun raan bele hetan duni rezultadu diʼak ba labarik kiʼik no mós iha situasaun emerjénsia ka lae? (11) Tratamentu médiku neʼebé diʼak katak sá? (12) Tansá mak importante ba ita ema kristaun atu foti desizaun antes hetan moras ka dezastre?

Atu simu ka la simu tratamentu neʼebé Ita haree iha vídeo neʼe, Ita rasik mak foti desizaun hodi tuir Ita-nia konxiénsia neʼebé hetan treinu husi Bíblia. Ita foti ona desizaun kona-ba tratamentu neʼebé ita sei simu no la simu ba Ita-nia an rasik no mós ba Ita-nia oan sira ka lae? Ita prenxe ona “Surat atu fó-hatene kona-ba Tratamentu Médiku” ka lae? Atu hetan informasaun liután, haree toʼok livru “Maromak nia Domin” iha kapítulu 7, no informasaun sira neʼebé temi iha livru neʼe. Diʼak mós atu haree fali Pelayanan Kerajaan Kita November 2006 iha pájina 3-6, “Apa Pandangan Saya tentang Fraksi Darah dan Prosedur Medis yang Menggunakan Darah Saya Sendiri?” Depois, fó-hatene Ita-nia desizaun ba Ita-nia doutór no mós ba Ita-nia família neʼebé laʼós Testemuña ba Jeová.

• Ita foti ona desizaun kona-ba tratamentu no ai-moruk neʼebé Ita sei simu ba Ita-nia an no mós ba Ita-nia oan sira ka lae?

• Ita lori beibeik Ita-nia “Surat atu fó-hatene kona-ba Tratamentu Médiku” ka lae?