Haʼu iha matenek atu haklaken ka lae?
1. Tansá mak ita labele sente katak ita ladún iha matenek atu haklaken?
1 Karik ita husu pergunta hanesan neʼe ba ita-nia an, maibé keta laran-tun! Tanba laʼós ita bá eskola ka tanba ita-nia matenek rasik mak halo ita bele haklaken ho didiʼak. Ema sira iha apóstolu sira-nia tempu hatene katak apóstolu balu mak “ema baibain neʼebé la matenek”. Maski nuneʼe, sira bele haklaken Maromak nia liafuan iha dalan neʼebé diʼak tanba sira hakaʼas an atu halo tuir Jesus nia ezemplu.—Apos 4:13; 1 Ped 2:21.
2. Oinsá mak Jesus hanorin ema?
2 Oinsá Jesus hanorin: Nia hanorin iha dalan neʼebé simples, no fasil ba ema atu komprende. Nia uza pergunta sira, ai-knanoik, no nia hahú nia hanorin ho liafuan neʼebé dada ema nia atensaun. (Mt 6:26) Nia hatudu interese neʼebé loos ba ema. (Mt 14:14) Liután neʼe, Jesus koʼalia ho laran-metin no kbiit tanba nia hatene katak Maromak Jeová mak haruka nia no fó forsa atu halaʼo ninia knaar.—Lc 4:18.
3. Oinsá mak Maromak Jeová ajuda ita halaʼo ita-nia knaar?
3 Maromak Jeová ajuda ita: Maromak Jeová, ita-nia Mestre neʼebé Boot Liu, treinu ita atubele haklaken lia-foun diʼak ho susesu liuhusi ninia Liafuan no organizasaun. (Isa 54:13) Tanba Maromak Jeová haleno ema atu hakerek kona-ba Jesus nia hanorin sira, ita bele estuda didiʼak no halo tuir dalan neʼebé Jesus hanorin. Maromak Jeová fó ninia espíritu santu mai ita no fó treinu liuhusi reuniaun sira. (Joao 14:26) Liután neʼe, Maromak mós ajuda ita liuhusi haklaken-naʼin sira neʼebé iha esperiénsia liu.
4. Tansá mak ita iha razaun barak atu fiar katak ita bele iha matenek atu fahe lia-foun diʼak ba ema seluk?
4 Ita iha razaun barak atu fiar katak ita bele iha matenek atu haklaken tanba ‘buat neʼebé halo ita soʼi mai husi Maromak’. (2 Kor 3:5) Nuʼudar ita sadere ba Maromak Jeová no uza didiʼak buat neʼebé nia fó atu ajuda ita atu haklaken, ita “bele hetan kbiit no hadiʼa an ba hahalok diʼak sira”.—2 Tim 3:17.