Buat neʼebé importante liu ba ita
1. Oinsá mak Jesus hatudu katak serbisu haklaken importante liu ba nia?
1 Serbisu haklaken mak buat importante liu ba Jesus. Nia hakaʼas an atu halo serbisu neʼe, nia laʼo kilómetru atus ba atus iha rai-Palestina tomak atu haklaken ba ema barak iha rai neʼebá. Hodi moris simples, Jesus bele fó tempu barak liu no fó atensaun liu ba serbisu haklaken. (Mt 8:20) Kuandu ema-lubun boot koko atu kaer nia hodi nia bele kura ema barak liután, nia hatete: “Haʼu sei haklaken mós lia-foun diʼak Maromak nia reinu nian ba rai seluseluk; tan neʼe mak haʼu mai.”—Lc 4:43.
2. Tansá mak serbisu haklaken importante tebes ba Jesus?
2 Tansá mak serbisu haklaken importante tebes ba Jesus? Razaun importante mak Jesus hakarak halo Maromak Jeová nia naran sai santu. (Mt 6:9) No mós, Jesus hadomi tebes ninia Aman iha lalehan no tan neʼe nia hakarak halo ninia Aman nia hakarak no halo tuir buat hotu neʼebé ninia Aman haruka nia atu halo. (Joao 14:31) Liután neʼe, Jesus hanoin ema no nia hakarak ajuda sira.—Mt 9:36, 37.
3. Oinsá mak ita hatudu katak ita tau uluk serbisu haklaken iha ita-nia moris?
3 Halo tuir Jesus: Dala ruma susar atu tau uluk serbisu haklaken iha ita-nia moris hanesan Jesus tanba mundu neʼe presiza ita-nia tempu barak no oferese buat barak neʼebé satan netik ita atu halo serbisu neʼe. (Mt 24:37-39; Lc 21:34) Tan neʼe, ita presiza hatene kona-ba saida mak importante liu, fahe didiʼak ita-nia tempu no hola parte beibeik iha serbisu haklaken. (Flp 1:10) Ita hakaʼas an atu moris simples no labele uza ita-nia moris tomak ba mundu neʼe.—1 Kor 7:31.
4. Tansá mak ita presiza tau uluk buat neʼebé importante liu iha ita-nia moris?
4 Kuandu ladún iha tempu atu halo serbisu, baibain ema matenek halo uluk buat neʼebé importante liu. Porezemplu, se nia rona katak anin boot besik atu mai, nia sei fó ninia tempu no forsa tomak atu prepara hodi proteje ninia família, no mós, nia sei fó avizu ba ninia viziñu sira. Bele tau ba kotuk serbisu neʼebé ladún importante. Armajedón neʼebé hanesan anin boot tebetebes besik ona atu mai. (Sof 1:14-16; 1 Kor 7:29) Atu ita bele salva ita-nia moris no sira neʼebé rona ita, ita presiza haree didiʼak ita-nia an no buat neʼebé ita hanorin, iha kongregasaun laran ka kuandu ita halaʼo serbisu haklaken. (1 Tim 4:16) Sin, atu hetan salvasaun, importante ba ita atu tau uluk serbisu haklaken iha ita-nia moris!