Toʼos prontu ona atu koʼa
1. Serbisu importante saida mak Maromak nia povu halaʼo daudauk?
1 Depois Jesus haklaken ba feto samaritana ida, nia hatete ba ninia dixípulu sira: “Foti imi-nia matan hodi haree ba toʼos neʼebé prontu ona atu [koʼa].” (Joao 4:35, 36) Serbisu koʼa nian atu halibur ema neʼebé simu Maromak nia mensajen halaʼo daudauk, no Jesus hatene katak iha aban-bainrua serbisu neʼe sei halaʼo toʼo mundu tomak. Ohin loron, Jesus nafatin tau matan ba serbisu koʼa nian. (Mt 28:19, 20) Saida mak hatudu katak ita sei halo serbisu neʼe ho urjente liután antes loron ikus sira ramata?
2. Saida mak hatudu katak Maromak halo serbisu koʼa nian iha mundu tomak laʼo lalais liu?
2 Serbisu koʼa nian iha mundu tomak: Durante tinan serbisu 2009, haklaken-naʼin iha mundu tomak aumenta porsentu 3,2. Maski estadu bandu ka hanetik ita-nia serbisu haklaken iha rai balu, maibé haklaken-naʼin iha rai sira-neʼe aumenta porsentu 14. Fulan-fulan haklaken-naʼin iha mundu tomak halo estudu Bíblia hamutuk 7.619.000 liu. Númeru neʼe barak liu fali haklaken-naʼin sira iha mundu tomak, no se kompara ho estudu Bíblia iha tinan kotuk, ida-neʼe aumenta besik 500.000. Nuʼudar serbisu haklaken habelar iha mundu tomak, sukursál iha rai barak husu misionáriu neʼebé tuir Eskola Gilead atu serbí iha rai sira-neʼe. Haklaken ba ema neʼebé koʼalia língua seluk mós fó rezultadu diʼak iha rai barak. Ida-neʼe hatudu katak antes tempu koʼa nian ramata, Maromak Jeová halo serbisu koʼa nian laʼo lalais liu. (Isa 60:22) Ita iha hanoin neʼebé loos kona-ba Ita-nia “toʼos”, katak haklaken iha Ita-nia área ka lae?
3. Saida mak ema balu hanoin kona-ba serbisu koʼa nian iha sira-nia haklaken-fatin?
3 Serbisu koʼa nian iha Ita-nia área: Karik Testemuña balu hatete: “Ema iha haʼu-nia haklaken-fatin ladún simu ita-nia mensajen.” Sira hanoin hanesan neʼe tanba iha área balu ema ladún simu ita-nia mensajen ka ladún hatudu interese hanesan iha tempu uluk. Tan neʼe, sira hanoin katak serbisu koʼa nian iha área neʼe besik atu hotu, no katak agora hanesan sira hili deʼit restu iha toʼos ninin. Neʼe katak agora iha ema uitoan deʼit neʼebé iha interese. Neʼe loos ka lae?
4. Ita tenke haburas hanoin oinsá kona-ba ita-nia serbisu haklaken? Tansá?
4 Durante tempu koʼa nian, husi hahú toʼo ramata, iha serbisu barak atu halo. Jesus nia liafuan hatudu katak serbisu neʼe urjente tebes, hodi dehan: “Toʼos boot duni, maibé serbisu-naʼin uitoan. Neʼe duni imi harohan ba toʼos-naʼin atu haruka serbisu-naʼin sira ba nia toʼos.” (Mt 9:37, 38) Maromak Jeová, Toʼos-Naʼin Boot, mak hatene bainhira no iha neʼebé mak ita-nia serbisu sei fó rezultadu diʼak. (Joao 6:44; 1 Kor 3:6-8) Entaun, saida mak ita-nia knaar? Bíblia hatán: “Iha dadeer kari ó-nia fini bá no toʼo kalan keta husik ó-nia liman atu deskansa.” (Ecle 11:4-6) Sin, kuandu serbisu koʼa nian besik ona atu hotu, neʼe laʼós tempu ba ita atu husik ita-nia liman atu deskansa!
5. Tansá mak ita tenke kontinua haklaken ho laran-manas iha área neʼebé ema ladún simu ita-nia mensajen?
5 Koʼa nafatin: Maski ita haklaken beibeik ona iha ita-nia haklaken-fatin no ema ladún simu ita-nia mensajen, ita iha razaun diʼak atu haklaken ho laran-manas no urjente. (2 Tim 4:2, MF) Buat aat neʼebé akontese beibeik iha mundu neʼe halo ema barak hanoin kona-ba futuru. Nuʼudar joven sira sai ema boot, sira barak buka oinsá atu sente seguru no dame iha laran. Karik ita-nia hakaʼas-an sei book ema seluk tan atu rona ba ita-nia mensajen. Sin, karik sira balu neʼebé uluk lakohi simu ita-nia mensajen, sei simu iha futuru. No mós, maski ema sira lakohi rona ita-nia mensajen, maibé ita presiza fó avizu ba sira.—Eze 2:4, 5; 3:19.
6. Se susar atu haklaken iha ita-nia haklaken-fatin, saida mak sei ajuda ita atu laran-manas nafatin?
6 Se susar atu haklaken iha ita-nia haklaken-fatin, saida mak sei ajuda ita atu laran-manas nafatin? Karik ita bele aumenta ita-nia haklaken uma ba uma hodi haklaken iha dalan seluk tan, hanesan haklaken iha dalan ka loja sira. Ka, ita bele uza tema oioin atu koʼalia ho ema. Ita mós bele troka ita-nia planu atubele haklaken iha rai-nakaras, tempu neʼebé ita bele hetan ema barak liu iha uma. Karik ita bele aprende língua foun atubele haklaken lia-foun diʼak ba ema barak liután. Karik ita bele aumenta tan ita-nia serbisu haklaken hodi serbí nuʼudar pioneiru regulár. Ka, ita bele muda ba fatin neʼebé presiza liután haklaken-naʼin sira. Se ita iha hanoin neʼebé loos kona-ba serbisu koʼa nian, ita sei hakaʼas an atu hola parte liután iha serbisu importante neʼe.
7. Toʼo bainhira mak ita tenke kontinua serbisu atu halibur sira neʼebé simu Maromak nia mensajen?
7 Toʼos-naʼin sira la iha tempu barak atu halibur fuan husi sira-nia toʼos, tan neʼe sira kontinua halo serbisu ho badinas toʼo serbisu koʼa nian ramata. Ita-nia serbisu atu halibur sira neʼebé simu Maromak nia mensajen mós urjente. Toʼo bainhira mak ita kontinua atu halo serbisu neʼe? Ita sei haklaken toʼo “buat hotu nia rohan sei toʼo mai”. (Mt 24:14; 28:20) Hanesan Jesus, Maromak Jeová nia Atan neʼebé importante liu, ita hakarak halo toʼo hotu serbisu neʼebé Maromak fó mai ita. (Joao 4:34; 17:4) Tan neʼe, mai ita kontinua halo ita-nia serbisu haklaken ho laran-manas, ho hanoin neʼebé loos, no ho laran-kontente, toʼo serbisu neʼe ramata. (Mt 24:13) Sin, serbisu koʼa nian seidauk hotu!
[Liafuan neʼebé foti husi pájina 2]
Durante tempu koʼa nian, husi hahú toʼo ramata, iha serbisu barak atu halo