Oinsá Testemuña ba Jeová organiza an atu haklaken lia-foun di’ak
Testemuña ba Jeová organiza an atu bele fahe lia-foun di’ak, no sira halo ida-ne’e liu tinan atus ida ona. Haklaken ne’ebé sira halo sai belar ba mundu tomak no sira-nia mensajen hato’o iha rai 230 liu no mós iha língua barak tebes. (Mt 24:14) Tanbasá mak presiza halo serbisu ne’e? Oinsá mak sira halo ida-ne’e iha mundu tomak? Vídeo Saksi-saksi Yehuwa—Diorganisasi Untuk Memberitakan Kabar Baik fó resposta ba pergunta sira-ne’e. Vídeo ne’e fó sai atividade oioin ne’ebé Testemuña ba Jeová halo iha mundu tomak. Depois haree tiha vídeo ne’e, buka resposta ba pergunta sira tuirmai ne’e.
Oinsá mak vídeo ne’e ajuda ita atu hafolin liután (1) buat ne’ebé Jeová nia organizasaun halo atu fahe lia-foun di’ak? (2 Tim 4:2) (2) família Betel sira iha mundu tomak? (3) treinu ne’ebé misionáriu no katuas sira ne’ebé vizita kongregasaun sira simu? (2 Tim 2:2) (4) katak importante atu lee eskritura loroloron nian atu hahú ita-nia loron no atu prepara ba reuniaun sira semana-semana? (Apos 17:11) (5) buat di’ak ne’ebé ita hetan hodi tuir ita-nia reuniaun kristaun sira? (Ebr 10:24, 25) (6) bensaun ne’ebé ita sei simu kuandu Maromak halo mundu ne’e sai jardín furak, ka paraízu? (Isa 11:9) (7) knaar espesiál ne’ebé ita iha atu hola parte iha serbisu ko’a nian ne’ebé halo daudauk?—Joao 4:35.
Vídeo ne’e ajuda ona ema ne’ebé aprende Bíblia atu hatene didi’ak serbisu ne’ebé Testemuña ba Jeová halo iha mundu tomak. (8) Bainhira mak bele hatudu vídeo ne’e ba ita-nia estudante Bíblia sira, família, no ema seluk? (9) Ema sente oinsá kuandu ita hatudu vídeo ne’e ba sira?
Kuandu ita hanoin kona-ba buat ne’ebé Maromak Jeová halo daudaun, ida-ne’e book ita atu hatudu sai sentimentu hanesan ema ne’ebé hakerek salmu ida ne’ebé dehan: “Oh, Jeová, ha’u-nia Maromak, Ita rasik halo ona buat barak, sin, Ita-nia serbisu ne’ebé furak no Ita-nia hanoin ba ami; la iha ida ne’ebé bele kompara ho Ita.” (Sal 40:5) Mai ita uza didi’ak vídeo ne’e atu ajuda ema seluk atu hafolin Maromak Jeová no ninia organizasaun!