Halo planu agora atu aumenta ita-nia serbisu haklaken
1. Tempu Memoriál fó mai ita oportunidade atu halo saida? Oinsá mak ita bele halo planu kona-ba neʼe?
1 Tinan-tinan, tempu Memoriál fó ita oportunidade foun atu “hahiʼi Jeová liután”. (Sal 109:30) Ita bele ka lae, aumenta ita-nia serbisu haklaken iha fulan-Marsu atu hatudu katak ita agradese ba Maromak tanba nia fó ninia Oan nuʼudar sakrifísiu? Se nuneʼe, agora diʼak atu halo planu kona-ba neʼe.—Prov 21:5.
2. Ita rasik sente oinsá kuandu rona katak oras ba pioneiru estra hamenus iha fulan-Abríl? Irmaun-irmán sira iha mundu tomak sente oinsá kona-ba neʼe?
2 Pioneiru estra: Iha tinan kotuk, kongregasaun sira kontente tebes kuandu sira rona katak iha fulan-Abríl oras ba pioneiru estra hamenus. Kuandu irmaun joven ida rona kona-ba neʼe, nia hatete: “Haʼu sei eskola sekundária, no haʼu-nia situasaun la fó tempu mai haʼu atu foti pioneiru regulár. Maibé iha fulan-Abríl, haʼu sei prenxe formuláriu atu hetan oras 30, no hakaʼas an atu hetan oras 50.” Irmán ida neʼebé halo serbisu tempu-tomak hatete: “Oras 30 deʼit! Neʼe fasil atu hetan!” Kuandu irmán ida neʼebé tinan 80, no uluk serbí nuʼudar pioneiru rona kona-ba neʼe, nia hatete: “Haʼu hein duni ba tempu neʼe! Jeová hatene katak tempu neʼebé haʼu serbí nuʼudar pioneiru mak tempu diʼak tebes iha haʼu-nia moris!” Haklaken-naʼin sira neʼebé la bele foti pioneiru estra, halo planu atu aumenta sira-nia serbisu haklaken.
3. Tanbasá diʼak atu serbí nuʼudar pioneiru estra iha fulan-Marsu, Abríl, no Maiu?
3 Iha fulan-Marsu, ita sei iha oportunidade kapás atu foti pioneiru estra tanba hanesan iha tinan kotuk ita bele hili atu hetan oras 30 ka 50 iha fulan neʼe. Liután neʼe, komesa iha loron-sábadu, 17 Marsu, ita sei hola parte iha kampaña espesiál atu konvida ema atu tuir Memoriál iha 5 Abríl. Haklaken-naʼin barak sei kontente atu aumenta sira-nia serbisu haklaken iha fulan neʼe, no karik sira sei hakarak kontinua serbí nuʼudar pioneiru estra iha fulan-Abríl no Maiu hodi hetan oras 50.
4. Ita bele halo saida atu aumenta ita-nia serbisu haklaken, no ida-neʼe sei lori rezultadu saida?
4 Kuandu ita halaʼo Adorasaun Família nian, diʼak atu koʼalia nuʼudar família kona-ba oinsá ema ida-idak bele aumenta sira-nia serbisu haklaken iha tempu Memoriál, loos ka lae? (Prov 15:22) Husu Maromak Jeová atu fó bensaun ba ita-nia hakaʼas-an. (1 Joao 3:22) Hodi aumenta ita-nia serbisu haklaken, ita mós hola parte atu hahiʼi Jeová, no mós ita sei haksolok liután.—2 Kor 9:6.