Aumenta ita-nia ksolok durante tempu Memoriál nian!

1. Saida mak dalan diʼak ida atu aumenta ita-nia ksolok durante tempu Memoriál nian?

¹ Ita hakarak aumenta ita-nia ksolok durante fulan-Marsu, Abríl, no Maiu ka lae? Dalan ida atu ita bele hetan ksolok mak hodi aumenta ita-nia serbisu haklaken, no se bele, halo serbisu nuʼudar pioneiru estra. Oinsá mak ida-neʼe sei lori ksolok ba ita?

2. Tanbasá mak hodi aumenta ita-nia serbisu haklaken bele lori ksolok mai ita?

² Aumenta Ita-nia ksolok: Maromak Jeová kria ita ho kbiit atu sente ksolok no kontente kuandu ita adora nia no kumpre ita-nia presiza espirituál nian. (Mateus 5:3) Nia mós kria ita ho kbiit atu sente kontente kuandu ita fó buat ruma ba ema seluk. (Apóstolu 20:35) Tuir loloos, ita-nia serbisu haklaken fó ita oportunidade atu adora Maromak no mós atu ajuda ema seluk. Tan neʼe mak ita bele fiar katak hodi aumenta ita-nia serbisu haklaken, ita mós sei sente kontente liután. No mós, se ita uza tempu barak liu atu haklaken, ita sei aumenta ita-nia matenek atu haklaken. No nuʼudar ita aumenta ida-neʼe, ita sei sai fiar an liután no ladún sai taʼuk. Ita iha oportunidade barak tan atu fó sasin no hahú estudu Bíblia. Buat sira-neʼe hotu lori ksolok liután ba ita-nia serbisu haklaken.

3. Tanbasá mak fulan-Marsu no Abríl mak tempu neʼebé diʼak atu foti pioneiru estra?

³ Iha fulan-Marsu no Abríl mak tempu neʼebé diʼak atu foti pioneiru estra tanba ita bele hili atu hatama oras 30 ka oras 50. Liután neʼe, hahú husi loron-sábadu, 22 Marsu, toʼo loron Memoriál nian iha segunda, 14 Abríl, ita sei hola parte iha kampaña atu konvida ema barak atu tuir Memoriál. Kongregasaun sei sente haksolok tebes tanba ema barak serbisu hamutuk atu fó sasin ba ema hotu iha kongregasaun nia haklaken fatin durante semana sira-neʼe.—Sofonias (Zefanya) 3:9.

4. Se ita hakarak foti pioneiru estra, saida deʼit mak ita tenke halo agora?

⁴ Prepara agora: Se ita seidauk prepara, diʼak atu uza tempu agora hodi hanoin fali ita-nia programa. Haree toʼok se iha buat ruma neʼebé ita presiza troka hodi ita bele aumenta liután ita-nia serbisu haklaken durante fulan ida ka liu iha tempu Memoriál nian. Halo orasaun kona-ba neʼe. (Tiago 1:5) Koʼalia hamutuk nuʼudar família no mós koʼalia ho ema seluk iha kongregasaun. (Provérbios [Amsal] 15:22) Hodi halo buat sira-neʼe, karik ita sei haree katak maski ita iha problema saúde nian ka serbisu tempu-tomak, ita mós bele sente haksolok hodi foti pioneiru estra.

5. Buat diʼak saida deʼit mak ita sei hetan se ita aumenta ita-nia serbisu iha tempu Memoriál nian?

⁵ Jeová hakarak ninia atan sira sente kontente. (Salmo [Mazmur] 32:11) Entaun, hodi hakaʼas an atu aumenta ita-nia serbisu iha tempu Memoriál nian, ita sei sente haksolok liután no mós sei halo ita-nia Aman iha lalehan kontente.—Provérbios (Amsal) 23:24; 27:11.