Ita-Boot bele foti pioneiru estra ka lae?
1. Tanbasá tempu Memoriál mak tempu diʼak atu aumenta liután ita-nia serbisu haklaken?
1 Tempu Memoriál mak tempu diʼak atu aumenta liután ita-nia serbisu haklaken, no atu hanoin kleʼan kona-ba Maromak Jeová nia domin boot hodi fó ninia Oan-Mane atu salva ita. (Joao 3:16) Ida-neʼe book duni ita-nia laran atu fó-agradese, no aumenta liután ita-nia hakarak atu fó-hatene ema seluk kona-ba Jeová no buat neʼebé nia halo ba ema hotu. (Isa 12:4, 5; Lc 6:45) Iha tempu neʼe mós ita bele hola parte iha kampaña espesiál atu konvida ita-nia kolega sira no ema seluk atu tuir Memoriál hamutuk ho ita. Depois neʼe, ita bele vizita fali sira neʼebé tuir Memoriál hodi ajuda sira aprende liután kona-ba Bíblia. Tan neʼe, ita bele ka lae, aumenta liután ita-nia serbisu haklaken hodi foti pioneiru estra iha fulan-Marsu, Abríl, no Maiu?
2. Tanbasá fulan-Marsu mak fulan neʼebé diʼak atu foti pioneiru estra?
2 Halo fulan-Marsu sai fulan espesiál: Fulan-Marsu mak fulan diʼak tebes atu foti pioneiru estra. Sira neʼebé foti pioneiru estra bele hili atu hatama oras 30 ka 50. Se katuas área nian vizita ita-nia kongregasaun iha fulan-Marsu, sira neʼebé foti pioneiru estra bele tuir reuniaun tomak neʼebé nia halaʼo hamutuk ho pioneiru regulár no pioneiru tempu-tomak. Loron Memoriál sei monu iha loron-tersa, 26 Marsu 2013. Tan neʼe, kampaña atu fahe konvite sei hahú iha 1 Marsu. No mós, fulan-Marsu iha findesemana 5. Entaun, hanoin didiʼak se ita bele ka lae, hola parte atu halo fulan neʼe sai fulan espesiál ba tinan neʼe?
3. Ita bele halo saida atu aumenta liután ita-nia serbisu haklaken?
3 Halo planu agora: Hodi halo planu agora, ita bele haree didiʼak ita-nia programa no halo mudansa ruma atu bele foti pioneiru estra. Importante atu família serbisu hamutuk, tan neʼe durante Adorasaun Família nian, diʼak atu koʼalia hamutuk kona-ba família nia planu no halo programa. (Prov 15:22) Se ita la bele foti pioneiru estra, labele sai laran-tun kona-ba neʼe. Karik ita bele halo mudansa ruma hodi uza oras barak tan iha loron neʼebé ita bá haklaken. Karik ita bele uza loron balu tan iha semana nia laran atu haklaken.
4. Buat diʼak saida deʼit mak ita bele hetan hodi aumenta liután ita-nia serbisu haklaken iha fulan-Marsu, Abríl, no Maiu?
4 Nuʼudar ita aumenta liután ita-nia serbisu haklaken iha fulan-Marsu, Abríl, no Maiu, ita mós sei haksolok liután tanba ita serbí Jeová no ajuda ema seluk. (Joao 4:34; Apos 20:35) Maibé, buat neʼebé importante liu mak ita-nia hakaʼas-an sei halo Maromak Jeová kontente tebes.—Prov 27:11.