Hatudu matenek kuandu haklaken
1. Tanbasá mak importante atu hatudu matenek kuandu haklaken?
1 “Hanesan bibi sira iha asu-fuik sira leet,” Maromak nia povu sira mós haklaken “iha ema laran-aat no maksalak sira leet”. (Mt 10:16; Flp 2:15) Relatóriu kona-ba funu, violénsia, no ema naʼok ema seluk, hatudu ho klaru katak ema aat “laʼo husi aat ba aat liu”. (2 Tim 3:13) Entaun, Bíblia nia matadalan ida-neʼebé mak bele ajuda ita atu hatudu matenek kuandu haklaken?—Mt 10:16.
2. Tanbasá mak diʼak atu husik kedas haklaken fatin ida no muda fali ba fatin seluk?
2 Hatudu matenek: Provérbios 22:3 hatudu katak ema neʼebé matenek proteje nia an husi perigu. Tan neʼe, ita presiza matan-moris nafatin! Situasaun iha fatin neʼebé ita haklaken bele troka derrepente deʼit. Porezemplu, karik ita haree polísia barak mai ka ema barak halibur iha dalan. Dala ruma, uma-naʼin neʼebé laran-diʼak bele fó avizu ba ita atu kuidadu. Entaun, duké hakarak atu buka-hatene, diʼak liu atu hatudu matenek hodi husik kedas fatin neʼe no haklaken fali iha fatin seluk.—Prov 17:14; Joao 8:59; 1 Tes 4:11.
3. Oinsá mak matadalan iha Eclesiastes 4:9 kona ita-nia serbisu haklaken?
3 Serbisu hamutuk: Eclesiastes 4:9 hatete katak “naʼin-rua diʼak liu duké naʼin-ida”. Karik ita iha ona toman atu haklaken mesak, maibé agora sei seguru ka lae? Iha fatin balu ema bele haklaken mesamesak. Maibé iha fatin seluk, diʼak liu se irmán ka joven sira la haklaken uma ba uma mesamesak, liuliu kuandu loron-matan monu ona. Esperiénsia barak hatudu katak haklaken hamutuk ho maluk ida mak dalan diʼak liu hotu. (Ecle 4:10, 12) Nafatin tau matan ba ema iha ita-nia grupu. Sai toman atu fó-hatene ema seluk antes husik haklaken-fatin.
4. Oinsá mak ita bele hakaʼas an atu proteje malu iha kongregasaun?
4 Katuas sira iha responsabilidade atu fó matadalan tuir situasaun neʼebé mosu tanba sira mak ida neʼebé ‘tau matan ba ita’. (Ebr 13:17) Jeová sei haraik duni bensaun ba ita kuandu ita hatudu haraik-an no serbisu hamutuk ho sira. (Miq 6:8; 1 Kor 10:12) Mai ita hotu nuʼudar Maromak nia atan, badinas atu haklaken, maibé halo ida-neʼe ho matenek.