Prepara ba Memoriál ho laran-haksolok
1. Tempu Memoriál mak tempu espesiál atu halo saida?
1 Ita sei komemora Memoriál iha loron-tersa 26 Marsu. Loron espesiál neʼe fó oportunidade mai ita atu haksolok ho buat neʼebé Maromak halo ona mai ita atu ita bele hetan salvasaun. (Isa 61:10) Maibé, ita mós presiza sente laran-haksolok nuʼudar ita prepara didiʼak ba loron espesiál neʼe. Oinsá mak ita bele halo ida-neʼe?
2. Saida mak book ita atu prepara nanis ba Memoriál?
2 Prepara ba Memoriál: Maski loron atu komemora Jesus nia mate halo simples deʼit, maibé presiza nafatin atu prepara nanis hodi nuneʼe buat hotu bele laʼo ho didiʼak. (Prov 21:5) Porezemplu, presiza halo planu kona-ba oras no hili fatin neʼebé diʼak. Presiza prepara paun no tua-uvas neʼebé sei uza. Presiza prepara no hamoos fatin neʼebé sei uza. Irmaun neʼebé hetan knaar atu hatoʼo diskursu presiza prepara ho didiʼak, no asistente sira no irmaun sira neʼebé sei pasa paun no tua-uvas tenke organiza ho didiʼak. Klaru katak buat barak neʼe prepara tiha ona. Buat neʼebé book ita atu halo buat hirak-neʼe mak tanba ita hafolin tebes Jesus nia sakrifísiu atu salva ita.—1 Ped 1:8, 9.
3. Oinsá mak ita bele prepara ita-nia laran ba Memoriál?
3 Prepara ita-nia laran: Importante mós atu prepara ita-nia laran, hodi nuneʼe ita bele komprende ho didiʼak Memoriál neʼe katak sá mai ita. (Ezra 7:10) Atu halo nuneʼe, diʼak se ita uza tempu hodi tuir programa atu lee Bíblia ba Memoriál no hanoin kleʼan kona-ba buat neʼebé akontese ba Jesus iha loron balu antes nia mate. Hodi hanoin kleʼan kona-ba buat neʼebé Jesus halo ona mai ita, ida-neʼe sei book ita atu halo tuir ninia ezemplu.—Gal 2:20.
4. Husi buat diʼak neʼebé ita hetan husi Jesus nia sakrifísiu, ida-neʼebé mak halo ita kontente liu?
4 Kristu nia mate halo ita livre husi sala no mate, no hatudu katak Jeová deʼit mak iha direitu atu ukun. (1 Joao 2:2) Kristu nia mate mós loke dalan mai ita atu iha relasaun diʼak ho Maromak no atu bele hetan moris ba nafatin. (Kol 1:21, 22) No mós, ajuda ita atu hametin ita-nia hakarak atu moris tuir ita-nia dedikasaun ba Jeová no atu laran-metin nafatin nuʼudar Kristu nia dixípulu. (Mt 16:24) Entaun, mai ita haksolok nuʼudar ita prepara ba Memoriál neʼebé besik daudauk ona!