Pergunta husi haklaken-naʼin

◼ Kona-ba uza telemovel kuandu tuir reuniaun kristaun no halaʼo serbisu haklaken, Bíblia nia matadalan saida deʼit mak ita presiza halo tuir?

“Buat hotu-hotu iha nia tempu.” (Ecle 3:1): Ho telemovel ema bele koʼalia no haruka mensajen ba malu iha tempu naran deʼit. Maibé, iha situasaun balu neʼebé ema kristaun lakohi husik telemovel atu dada sira-nia atensaun. Porezemplu, ita-nia reuniaun sira mak tempu atu adora Maromak Jeová, simu hanorin husi Bíblia, no haksolok hodi ransu hamutuk ho ita-nia maluk kristaun sira. (Deut 31:12; Sal 22:22; Rom 1:11, 12) Nuneʼe ita bele ka lae, hamate ita-nia telemovel kuandu ita toʼo iha Reuniaun-Fatin no haree ita-nia mensajen sira depois ita sai ona husi Reuniaun-Fatin? Se ita presiza husik ita-nia telemovel loke tanba emerjénsia ruma, diʼak atu taka ka hatún telemovel nia lian hodi la atrapalla ema seluk.

“Buat hirak-neʼe hotu haʼu halo tan evanjellu.” (1 Kor 9:23): Dala ruma, ita presiza duni uza telemovel iha serbisu haklaken. Porezemplu, irmaun neʼebé tau matan ba grupu neʼebé haklaken iha fatin ida, karik presiza telefone irmaun-irmán sira iha ninia grupu. Dala ruma, haklaken-naʼin sira uza sira-nia telemovel atu telefone sira-nia estudante Bíblia ka ema neʼebé hatudu interese antes sira atu bá vizita, liuliu se ema neʼe hela dook. Maski nuneʼe, ita presiza kuidadu hodi ita-nia telemovel la atrapalla ita nuʼudar ita koʼalia hela ho uma-naʼin. (2 Kor 6:3) Nuʼudar ita hein maluk sira, duké telefone ka haruka mensajen ba ita-nia kolega, diʼak liu se ita tau nafatin ita-nia atensaun ba serbisu haklaken no ba irmaun ka irmán neʼebé ita haklaken hamutuk.

Buka ema seluk nia diʼak. (1 Kor 10:24; Flp 2:4): Se ita atu tuir grupu haklaken, diʼak liu atu la bá tarde, hodi hanoin katak ita bele telefone deʼit maluk ida atu buka-hatene haklaken-fatin mak iha neʼebé. Se ita toʼo tarde, dala barak grupu neʼebé organiza tiha ona tenke troka fali. Maski dala ruma iha situasaun balu neʼebé bele halo ita sai tarde, maibé se ita haburas toman atu toʼo sedu, ita hatudu katak ita hanoin uluk Maromak Jeová nia arranju, irmaun neʼebé dirije grupu, no ita-nia maluk haklaken-naʼin sira.