PERGUNTA HUSI JOVEN SIRA
Saida mak haʼu tenke hatene kona-ba haruka mensajen?
:-) Se uza ho matenek, mensajen mak dalan diʼak atu kontaktu kolega sira.
:-( Se uza la kuidadu, mensajen bele estraga Ita-nia reputasaun no relasaun diʼak ho kolega sira.
Informasaun neʼe sei ajuda Ita atu hatene buat importante kona-ba
Iha mós informasaun neʼe:
Ita haruka mensajen ba sé?
Joven barak sente katak mensajen mak dalan importante loos atu komunika ho ema seluk. Liuhusi mensajen, Ita bele kontaktu ema naran deʼit iha Ita-nia lista kontaktu, se Ita-nia inan-aman fó lisensa.
“Haʼu nia apá la gosta kuandu haʼu no haʼu-nia alin-feto koʼalia ho mane sira. Se ami koʼalia ho mane, ami tenke uza telefone uma nian iha sala vizita no tenke iha mak hamaluk.”—Lenore.
Buat neʼebé Ita presiza hatene: Ita bele hetan problema se Ita fó Ita-nia númeru ba ema naran deʼit.
“Se Ita la kuidadu kona-ba sé-sé deʼit mak hatene Ita-nia númeru, fasil ba ema atu haruka mensajen ka foto neʼebé loloos Ita lakohi simu.”—Scott.
“Se Ita mensajen beibeik ema neʼebé seksu la hanesan ho Ita, Ita sei lalais deʼit atu sente gosta ba ema neʼe.”—Steven.
Bíblia hatete: “Ema neʼebé matenek haree perigu no subar nia an.” (Provérbios 22:3) Bainhira Ita halo hakat balu atu bele kuidadu, neʼe bele ajuda Ita atu la hetan problema ruma.
Esperiénsia: “Haʼu iha kolega mane ida no ami mensajen malu beibeik. Haʼu hanoin ami mak kolega deʼit. Haʼu hanoin neʼe la problema, maibé ikusmai nia konta mai haʼu katak nia laran-monu ona ba haʼu. Agora haʼu komprende katak diʼak liu se iha tempu neʼebá haʼu la ransu no la mensajen beibeik nia.”—Melinda.
Hanoin toʼok: Tanba Melinda hatene katak ninia kolega laran-monu ba nia, oinsá ida-neʼe afeta sira naʼin-rua nia relasaun?
Troka rezultadu! Saida mak Melinda bele halo atu ninia kolega mane la laran-monu ba nia, hodi sira naʼin-rua bele nafatin sai kolega?
Saida mak Ita hakerek iha mensajen?
Fasil deʼit atu simu no haruka mensajen sira ba kolega sira. Maibé fasil mós ba Ita-nia kolega atu komprende sala buat neʼebé Ita hakerek.
Buat neʼebé Ita presiza hatene: Fasil atu ema komprende sala buat neʼebé hakerek iha mensajen.
“Bainhira Ita lee mensajen, Ita labele haree ema nia oin ka hatene sira-nia sentimentu maski iha emotikon ka símbolu sira. Tan neʼe fasil atu komprende sala.”—Briana.
“Haʼu koñese feto sira neʼebé estraga sira-nia reputasaun no ema koñese nuʼudar feto neʼebé gosta book mane sira tanba mensajen sira neʼebé sira haruka ba mane.”—Laura.
Bíblia hatete: “Ema laran-loos hanoin didiʼak antes atu hatán.” (Provérbios 15:28) Eskritura neʼe hanorin Ita atu lee fali Ita-nia mensajen antes Ita haruka!
Bainhira mak Ita haruka mensajen?
Hodi hanoin didiʼak, Ita bele halo regra rasik kona-ba haruka mensajen ka telefone.
Buat neʼebé Ita presiza hatene: Se Ita la kuidadu kona-ba tempu neʼebé Ita haruka mensajen, ema sei koñese Ita nuʼudar ema neʼebé la respeitu ema duké gosta Ita.
“Fasil deʼit atu haluha regra kona-ba haruka mensajen. Dala ruma haʼu koʼalia hela ho ema ruma ka han daudaun iha meza, maibé haʼu mós haruka mensajen iha tempu hanesan.”—Allison.
“Perigu tebes atu haruka mensajen bainhira lori hela transporte. Se Ita la hateke tan ba dalan, Ita bele hetan asidente.”—Anne.
Bíblia hatete: “Iha tempu neʼebé loos ba buat hotu, . . . tempu atu nonook no tempu atu koʼalia.” (Eclesiastes 3:1, 7) Neʼe aplika ba haruka mensajen no mós bainhira koʼalia!
Sujestaun kona-ba haruka mensajen
Ita haruka mensajen ba sé?
;-) Halo tuir Ita-nia inan-aman nia regra.—Koloso 3:20.
;-) Hili didiʼak ema neʼebé Ita sei fó Ita-nia númeru telefone. Bainhira Ita ho respeitu dehan lae kuandu ema husu Ita-nia informasaun kontaktu, hanesan númeru telefone, Ita sei haburas skill neʼebé Ita sei presiza kuandu Ita sai boot.
;-) Keta lalais atu haruka mensajen romántiku ba ema. Se sentimentu romántiku sai buras, rezultadu mak Ita bele sente estrese no laran-kanek.
“Haʼu uza didiʼak haʼu-nia telemovel, tan neʼe haʼu-nia inan-aman konfia haʼu katak haʼu bele halo desizaun diʼak kona-ba sé nia númeru mak haʼu sei rai iha lista kontaktu.”—Briana.
Saida mak Ita hakerek iha mensajen?
;-) Antes ketik Ita-nia mensajen, husu ba Ita-nia an: ‘Iha situasaun neʼe, haruka mensajen mak dalan neʼebé loos atu komunika ba malu ka lae?’ Karik diʼak liu atu telefone deʼit ka hasoru malu oin ba oin.
;-) Keta hakerek buat neʼebé Ita rasik sei nunka koʼalia sai husi Ita-nia ibun. Sarah tinan 23 hatete: “Se ita deʼit lakohi koʼalia sai ida-neʼe, ita mós sei la haruka ida-neʼe liuhusi mensajen.”
“Se ema ruma haruka foto neʼebé aat mai ita, hatete kedas ba Ita-nia inan-aman. Neʼe bele proteje Ita no mós sei halo Ita-nia inan-aman atu konfia Ita.”—Sirvan.
Bainhira mak Ita haruka mensajen?
;-) Deside uluk bainhira mak Ita labele uza Ita-nia telefone. Joven feto ida naran Olivia hatete: “Haʼu la kaer haʼu-nia telefone bainhira han-kalan ka estuda. Haʼu hamate haʼu-nia telefone durante reuniaun atu nuneʼe haʼu sei la hateke beibeik ba telefone.”
;-) Hanoin ema seluk. (Filipe 2:4) Keta haruka mensajen bainhira Ita koʼalia daudaun ho ema ruma.
“Haʼu halo regra ba haʼu-nia an rasik, hanesan la haruka mensajen ba ema bainhira haʼu ransu hela ho ema balu. Haʼu mós la fó haʼu-nia númeru ba ema neʼebé la besik haʼu.”—Janelly.