PERGUNTA HUSI JOVEN SIRA
Kolega deʼit ka iha sentimentu romántiku?—Parte 1: Nia iha sentimentu romántiku mai haʼu ka lae?
Ita gosta loos ema neʼe, no Ita fiar katak nia mós gosta Ita. Imi sempre haruka mensajen ba malu, kuandu iha festa ka bá fatin ruma imi sempre hamutuk . . . , no mensajen neʼebé nia haruka mak romántiku loos.
Entaun, Ita deside atu buka-hatene kona-ba imi-nia relasaun hodi husu se nia mós iha sentimentu neʼebé hanesan. Maibé nia dehan: “Haʼu haree Ita nuʼudar kolega deʼit.”
Ita sente oinsá
“Haʼu hirus loos, hirus ba nia no ba haʼu-nia an rasik! Ami mensajen malu loroloron, no nia hatudu interese loos mai haʼu. Tan neʼe, normál se haʼu haburas sentimentu ba nia.”—Jasmine.
“Haʼu no nia akompaña kolega neʼebé namora hela. Dala ruma, haʼu sente hanesan ami naʼin-rua mós namora. Ami koʼalia hamutuk beibeik no ami mós komesa haruka mensajen barak ba malu. Haʼu laran-kanek loos kuandu nia fó-hatene katak ami naʼin-rua mak kolega deʼit, no haʼu foin hatene katak nia iha ona namoradu.”—Richard.
“Iha mane joven ida neʼebé mensajen haʼu loroloron, dala ruma ami-nia mensajen hotu mak romántiku. Maibé, bainhira haʼu koʼalia sai haʼu-nia sentimentu, nia hamnasa no dehan: ‘Agora haʼu lakohi namora ho ema ida!’ Haʼu tanis la para.”—Tamara.
Buat neʼebé importante: Se Ita hanoin imi naʼin-rua iha sentimentu ba malu, maibé loloos Ita deʼit mak gosta nia, neʼe normál atu sente hirus, moe ka sente katak nia traidór. Joven mane ida naran Steven hatete: “Haʼu triste loos bainhira neʼe akontese ba haʼu, no neʼe halo haʼu sente laran-kanek tebes. Ba tempu kleur, susar ba haʼu atu tau fiar ba ema seluk.”
Tanbasá neʼe akontese
Mensajen no média sosiál halo fasil mai ita atu haburas sentimentu ba ema seluk neʼebé loloos la iha sentimentu ba ita. Haree toʼok joven balu nia liafuan.
“Dala ruma, ema ida haruka mensajen tanba sente baruk deʼit, maibé karik Ita sente katak nia iha interese ba Ita. No se nia mensajen Ita loroloron, neʼe book Ita atu hanoin sala katak Ita mak ema neʼebé espesiál ba nia.”—Jennifer.
“Ema ida karik hakarak atu namora, maibé ema ida seluk karik buka deʼit kolega atu koʼalia hamutuk no atu halo nia sente fiar an liután.”—James.
“Ita bele hanoin katak mensajen hanesan ‘toba diʼak’ mak romántiku, maibé tuir loloos, karik ema neʼebé haruka mensajen la hatoʼo liafuan neʼe ho sentimentu.”—Hailey.
“Kuandu ema ruma mensajen ho dezeñu oin-midar, neʼe bele iha signifikadu rua, ‘hatudu laran-diʼak deʼit’ ka ‘hatudu sentimentu gosta’. Maibé, dala ruma ema neʼebé simu mensajen neʼe, hanoin kedas neʼe mak sinál gosta.”—Alicia.
Buat neʼebé importante: Keta hanoin sala katak se ema hatudu interese ba Ita, neʼe katak nia gosta Ita.
Realidade mak neʼe la fasil! Bíblia hatete: “Laran mak makerek liu fali buat hotu-hotu no perigozu.” (Jeremias 17:9) Ita-nia laran bele halo Ita hanoin katak Ita ho nia iha relasaun neʼebé espesiál. Maibé, kuandu Ita hatene katak neʼe mak Ita-nia imajinasaun deʼit, Ita-nia laran sei kanek duni.
Buat neʼebé Ita bele halo
Keta uza sentimentu. Para no hanoin lai, no analiza imi-nia relasaun. Husu ba Ita-nia an: ‘Iha ka lae razaun neʼebé hatudu katak ninia dalan atu hatudu interese mai haʼu la hanesan ho dalan neʼebé nia hatudu ba ema seluk?’ Keta husik Ita-nia sentimentu halakon Ita-nia “kbiit atu hanoin”.—Roma 12:1.
Hanoin didiʼak. Karik iha sinál oioin neʼebé halo Ita fiar katak imi naʼin-rua laʼós deʼit belun. Maibé importante atu tau fokus ba sinál neʼebé halo Ita duvida katak nia gosta Ita. Keta hanoin katak se Ita gosta ema ruma, ema neʼe mós sei gosta Ita.
Keta ansi. Se nia seidauk hatete katak nia hakarak namora ho Ita, keta hanoin demais kona-ba relasaun neʼe.
Koʼalia nakloke. Bíblia hatete katak iha “tempu atu koʼalia”. (Eclesiastes 3:7) Se Ita hakarak atu hatene se nia iha sentimentu romántiku ba Ita, koʼalia ho nia. Joven feto naran Valerie hatete: “Kuandu nia la iha sentimentu romántiku ba Ita, diʼak liu Ita triste agora duké gosta tiha ema neʼe ba fulan barak mak foin hatene katak nia la iha sentimentu ba Ita.”
Buat neʼebé importante: Provérbios 4:23 hatete: “Proteje bá ó-nia laran.” Se Ita gosta ema ruma, buka tuir se nia mós iha sentimentu neʼebé hanesan. Se Ita husik sentimentu neʼe sai buras antes Ita buka tuir ema neʼe nia sentimentu, neʼe hanesan Ita koko kuda ai-funan iha fatuk leten.
Se Ita hatene ho loloos katak ema neʼe gosta Ita no Ita mós maduru no prontu ona atu namora, neʼe mak tempu ba Ita atu deside kona-ba atu namora ka lae. Hanoin-hetan, moris kaben nian sei metin kuandu laʼen no feen iha planu espirituál neʼebé hanesan, la subar buat ida ba malu no koʼalia nakloke ba malu. (1 Korinto 7:39) Tuir loloos, sira sai belun diʼak antes sira kaben no sei kontinua sai belun diʼak maski kaben ona.—Provérbios 5:18.