PERGUNTA HUSI JOVEN SIRA
Kolega deʼit ka iha sentimentu romántiku?—Parte 2: Haʼu-nia hahalok halo nia hanoin katak haʼu gosta nia ka lae?
Ita gosta rona didiʼak bainhira kolega ida presiza koʼalia. No foin lalais, Ita sempre koʼalia beibeik ho kolega neʼe. Problema mak Ita mak feto no kolega neʼe mak mane. Ita hatete ba Ita-nia an: ‘Ami kolega deʼit.’ No Ita hanoin nia mós sente hanesan. Maibé neʼe loos ka lae?
Saida mak bele akontese
La problema atu iha kolega mane ka feto. Maibé, oinsá se Ita sai besik loos ho kolega neʼe? Se neʼe akontese, kolega neʼe bele hanoin katak Ita hakarak namora ho nia.
Loloos, Ita hakarak nia atu hanoin hanesan neʼe ka lae? Hanoin toʼok, tanbasá mak hanoin sala hanesan neʼe bele mosu.
Ita fó atensaun demais ba ema ida.
“Klaru katak, Ita la bele kontrola ema nia sentimentu. Maibé, keta halo Ita-nia kolega hanoin sala hodi dehan katak imi kolega deʼit maibé, Ita nafatin mensajen no telefone nia beibeik, neʼe hanesan deʼit Ita fakar mina ba ahi.”—Sierra.
Ita hatudu fali atensaun ba ema neʼebé hatudu atensaun ba Ita.
“Nia mak mensajen uluk haʼu, no haʼu sempre hatán ba ninia mensajen sira. Depois neʼe, susar mai haʼu atu esplika ba nia katak haʼu haree nia nuʼudar kolega deʼit.”—Richard.
Ita gosta atu buka atensaun.
“Ema balu buka atensaun tanba haree ida-neʼe nuʼudar game. Sira halimar deʼit ho ema nia sentimentu no la hanoin atu namora. Haʼu haree beibeik situasaun hanesan neʼe no neʼe sempre hakanek ema nia laran.”—Tamara.
Buat neʼebé importante: Bainhira Ita komunika beibeik no hatudu atensaun demais ba ema ida, neʼe bele halo ema neʼe hanoin katak Ita gosta nia.
Tanbasá neʼe sériu
Neʼe hakanek ema seluk.
Bíblia hatete: “Ema sei laran-kanek se nia hein kleur atu ninia esperansa sai loos.” (Provérbios 13:12) Se Ita sempre simu beibeik atensaun husi ema ida, saida mak Ita espera husi ema neʼe?
“Ema balu gosta dehan: ‘Ema neʼe fó haʼu esperansa falsu.’ Neʼe atu hanesan ho ikan neʼebé kona ona kail, maibé peskadór la foti no mós la husik. Neʼe mós bele akontese ho Ita-nia relasaun ho ema seluk. Se Ita la interese atu namora, maibé Ita sempre fó esperansa falsu ba ema neʼe. Ita sei hakanek ema neʼe nia laran.”—Jessica.
Neʼe hafoʼer Ita-nia reputasaun.
Bíblia hatete: “Keta buka diʼak deʼit ba imi-nia an rasik, maibé buka mós ema seluk nia diʼak.” (Filipe 2:4) Ita sente oinsá kona-ba ema neʼebé hanoin deʼit ninia an rasik? Oinsá neʼe kona ema neʼe nia reputasaun?
“Haʼu la gosta mane joven neʼebé hatudu sentimentu romántiku ba feto maski nia la interese atu namora. Neʼe hatudu katak bainhira nia kaben ona, karik nia mós la hatudu laran-metin ba ninia feen. Ema hanesan neʼe, hanoin an deʼit no aproveita ema seluk atu halo nia sai fiar liután.”—Julia.
Buat neʼebé importante: Ema neʼebé hatudu sentimentu romántiku ba ema ida, maibé la interese atu iha relasaun neʼebé sériu, nia hakanek ema neʼe no ninia an rasik.
Buat neʼebé Ita bele halo
Bíblia anima ita atu haree “mane joven sira hanesan ó-nia alin” no “joven feto sira hanesan ó-nia feton, ho laran-moos”. (1 Timóteo 5:1, 2) Se Ita halo tuir matadalan neʼe, Ita-nia relasaun ho kolega sei sai diʼak.
“Se haʼu kaben ona, haʼu sei la hatudu sentimentu romántiku ba ema neʼebé laʼós haʼu-nia kaben. Tan neʼe maski joven hela, diʼak ba haʼu agora atu la sai toman atu ransu arbiru ho kolega mane.”—Leah.
Bíblia hatete: “Kuandu ema hasai liafuan barak, nia labele hasees an husi sala.” (Provérbios 10:19) Prinsípiu neʼe diʼak atu halo tuir kuandu koʼalia no mós haruka mensajen ba ema. Neʼe inklui dalan neʼebé Ita koʼalia no uza tempu hira atu koʼalia ba malu.
“Keta mensajen kolega feto ida loroloron se Ita la iha planu atu namora ho nia.”—Brian.
Bíblia hatete: “Maibé matenek husi lalehan, primeiru mak moos.” (Tiago 3:17) Dala ruma, Ita bele hakoʼak ema ruma ho hanoin neʼebé moos, no la iha sentimentu romántiku ba ema neʼe. Maibé dala ruma ema neʼe bele hanoin ita hatudu sentimentu romántiku ba nia.
“Kuandu koʼalia hamutuk, haʼu hakaʼas an koʼalia iha dalan neʼebé diʼak, maibé mós tau lei ba haʼu-nia an atu nafatin iha distánsia.”—Maria.
Buat neʼebé importante: Buka-hatene didiʼak Ita hatudu hahalok hanesan saida kuandu Ita ransu ho Ita-nia kolega mane ka feto. Joven feto naran Jennifer dehan: “Susar atu hetan kolega neʼebé diʼak, tan neʼe keta estraga Ita-nia relasaun belun ho ema seluk tanba Ita halo kolega hanoin sala.”
Sujestaun
Tau atensaun ba buat neʼebé ema seluk koʼalia ba Ita. Se ema ruma husu: “Ita ho nia namora ka?” Karik neʼe hatudu katak imi naʼin-rua besik demais.
Hatudu hahalok neʼebé hanesan ba Ita-nia kolega hotu. Ita labele fó atensaun espesiál ba kolega ida liu fali kolega seluk.
Kuidadu ho mensajen neʼebé Ita haruka, neʼe inklui dala hira mak Ita haruka mensajen, liafuan iha mensajen neʼe, no oras neʼebé Ita haruka mensajen. Feto naran Alyssa dehan: “La iha razaun ba ita atu haruka mensajen ba ita-nia kolega mane iha kalan boot.”