Aprende husi haklaken-naʼin sira neʼebé iha esperiénsia barak ona
Ita hafolin tebes irmaun-irmán sira iha ita-nia kongregasaun neʼebé iha esperiénsia barak nuʼudar haklaken-naʼin. Balu serbí ona Jeová ba tinan barak no balu foin mak aprende matenek oinsá atu haklaken. Irmaun-irmán sira-neʼe haree rasik oinsá mak Jesus dirije hela kongregasaun kristaun iha loron ikus sira-neʼe hodi habelar serbisu haklaken. (Mateus 28:19, 20) Tanba sira hola parte iha serbisu haklaken, sira simu “kbiit neʼebé la hanesan baibain” bainhira hasoru susar sira. (2 Korinto 4:7) Ita bele aprende buat barak husi irmaun-irmán sira-neʼe, no sira mós kontente atu hanorin ema seluk. (Salmo [Mazmur] 71:18) Saida mak ita bele halo hodi ita bele aprende husi sira-nia esperiénsia?
Iha serbisu haklaken. Atu hetan rezultadu diʼak bainhira bá haklaken, haklaken-naʼin sira neʼebé foun ka seidauk iha esperiénsia presiza hetan treinu. Ita bele aprende buat barak hodi haree oinsá irmaun-irmán sira haklaken ba ema seluk. (Haree Livru Haklaken 15 Fevereiru 2015 kona-ba “Laran-manas nafatin iha serbisu haklaken” iha parágrafu tolu husi subtítulu “Ajuda haklaken-naʼin foun.”) Ita aprende ona saida husi sira kona-ba haklaken?
Ita bele ka lae, husu irmaun ka irmán ida neʼebé iha esperiénsia barak atu haklaken hamutuk ho Ita? Se haklaken-naʼin neʼe idade ona ka saúde la permite nia atu sai, karik Ita bele lori Ita-nia estudante bá estuda iha ninia uma. Estuda tiha, husu irmaun ka irmán neʼe ninia hanoin ka sujestaun ruma oinsá Ita bele halaʼo estuda Bíblia iha dalan neʼebé diʼak liután.
Gasta tempu mesamesak ho sira: Dalan diʼak ida atu koñese ita-nia irmaun-irmán sira neʼebé iha esperiénsia barak mak atu ransu ho sira. Konvida nia atu tuir Ita-nia adorasaun família nian no halo entrevista ho nia. Se nia idade ona ka saúde la permite nia atu sai, bele ka lae halaʼo Ita-nia adorasaun família nian iha ninia uma? Husu ba nia oinsá mak nia hetan lia-loos. Nia hetan bensaun saida deʼit? Tuir buat neʼebé nia haree, oinsá mak serbisu haklaken lori rezultadu diʼak iha ninia área? Tanbasá mak nia kontente hodi serbí Jeová?
La haluha katak irmaun-irmán sira-neʼe mós dala ruma iha fraku. Balu idade liu ona no karik bele gasta deʼit tempu uitoan ho ita. Maski nuneʼe, sira iha matenek oioin neʼebé sira bele fahe ba ita. (Roma 12:6-8) No ita bele aprende buat barak husi sira-nia esperiénsia hodi serbí Jeová ho laran-metin.