HAPARA SIKLU ODI MALU

2 | Keta selu aat ho aat

Bíblia hanorin:

“Keta selu aat ho aat ba ema. . . . Se bele karik, hakaʼas an atu moris iha dame ho ema hotu. . . . Tanba hakerek nanis ona: ‘Jeová dehan: “Haʼu mak iha direitu atu selu fali; haʼu sei selu fali sira-nia hahalok aat.”’”—ROMA 12:17-19.

Neʼe katak sá:

Maski ita sai hirus bainhira ema seluk halo aat ba ita, maibé Maromak la kontente se ita selu aat ho aat. Maromak hakarak ita atu hein ho pasiénsia tanba lakleur tan nia sei hadiʼa buat hotu neʼebé la iha justisa.—Salmo 37:7, 10.

Saida mak Ita bele halo:

Bainhira ema sala-naʼin mak selu aat ba ema neʼebé halo aat, neʼe sei aumenta liután ódiu. Tan neʼe, se ema ruma halo Ita hirus ka hakanek Ita, keta selu aat fali. Koko atu kontrola Ita-nia an no buka dame. Dala ruma, diʼak liu atu husik deʼit akontesimentu neʼe no haluha tiha. (Provérbios 19:11) Klaru katak iha mós situasaun balu neʼebé diʼak liu atu fó-hatene ba ema seluk. Porezemplu, kuandu Ita sai vítima ba krime ruma, Ita bele kesar ba polísia ka autoridade sira.

Selu aat ho aat lori susar ba ita-nia an

Oinsá se Ita sente katak la iha dalan atu rezolve problema? Ka oinsá se Ita halo ona buat hotu atu rezolve problema neʼe ho dame maibé la susesu? Keta hanoin atu selu aat fali. Karik neʼe sei halo situasaun sai aat liu. Tan neʼe, duké selu aat fali, diʼak liu hapara siklu odi malu. Ita presiza tau fiar ba Maromak nia dalan atu rezolve problema. “Sadere ba nia, no nia sei ajuda ó.”—Salmo 37:3-5.

Esperiénsia—ADRIÁN

Halakon sentimentu atu vinga fali

Uluk Adrián mak joven ida neʼebé gosta halo violénsia, nia laran nakonu ho odi no hakarak deʼit atu vinga ema neʼebé halo aat nia. Nia dehan: “Haʼu envolve an beibeik iha tiru malu, dala balu, haʼu hetan kanek no raan suli makaʼas no ema husik haʼu latan deʼit iha estrada.”

Adrián hahú estuda Bíblia bainhira nia tinan 16. Nia konta: “Nuʼudar haʼu estuda Bíblia, haʼu komprende katak haʼu presiza troka haʼu-nia hahalok.” Nia presiza halakon sentimentu odi no para atu halo violénsia. Nia hetan ajuda husi Bíblia nia liafuan iha Roma 12:17-19 kona-ba labele selu aat ho aat. Nia dehan: “Eskritura neʼe halo haʼu fiar katak Maromak Jeová mak sei hadiʼa situasaun neʼebé la justisa tuir ninia hakarak no ninia tempu. Neineik-neineik, haʼu konsege troka haʼu-nia hahalok.”

Kalan ida, grupu joven neʼebé uluk Adrián nia inimigu, ataka nia no grupu neʼe nia boot sadik hodi hakilar: “Defende toʼok ó-nia an!” Kona-ba tempu neʼe, Adrián konta: “Haʼu sente haʼu hakarak baku fali nia.” Maibé duké halo violénsia, Adrián halo orasaun badak no hasees an.

Adrián hatutan: “Loron tuirmai haʼu hasoru fali grupu neʼe nia boot, maibé iha tempu neʼebá nia mesak. Haʼu sente laran-nakali no hakarak selu aat ba nia, maibé haʼu husu fali ba Jeová atu bele kontrola an. Haʼu hanoin nia mai ho hirus, maibé haʼu hakfodak tanba nia mai hakbesik haʼu no hatete: ‘Deskulpa kona-ba buat neʼebé akontese horikalan. Tuir loloos, haʼu hakarak sai hanesan ó. Haʼu hakarak estuda Bíblia.’ Haʼu kontente tanba haʼu tahan haʼu-nia hirus! Ikusmai, nia mós estuda Bíblia.”