1 | Orasaun—“Entrega imi-nia laran-susar hotu ba nia”
BÍBLIA DEHAN: “Entrega imi-nia laran- susar hotu ba [Maromak], tanba nia hanoin imi.”—1 PEDRO 5:7.
Neʼe katak sá
Maromak Jeová konvida ita atu koʼalia ho nia kona-ba buat naran deʼit neʼebé halo ita laran-susar. (Salmo 55:22) La iha problema ida mak boot demais ka kiʼik demais atu fó sai iha orasaun. Se neʼe mak importante ba ita, importante mós ba Jeová. Orasaun mak hakat importante ida atu bele sente dame iha laran.—Filipe 4:6, 7.
Oinsá mak bele ajuda
Problema ho saúde mentál bele halo ita sente mesamesak. Dala ruma ema seluk labele komprende didiʼak susar neʼebé ita hasoru. (Provérbios 14:10) Maibé kuandu ita fó sai ita-nia sentimentu ba Maromak liuhusi orasaun, nia sei rona ita ho laran-diʼak no komprende ita. Jeová haree ita, nia hatene ita-nia susar no oinsá ita luta hasoru ida-neʼe, no nia mós hakarak ita atu halo orasaun kona-ba buat naran deʼit neʼebé halo ita hanoin barak.—2 Krónikas 6:29, 30.
Koʼalia ba Jeová liuhusi orasaun sei hametin ita-nia fiar katak nia hanoin ita. Ita bele sente hanesan ema neʼebé hakerek salmo neʼebé harohan: “Ita haree ona haʼu-nia terus; Ita hatene didiʼak haʼu-nia susar boot sira.” (Salmo 31:7) Hodi hatene katak Jeová haree buat hotu neʼebé ita hasoru daudaun, neʼe sei ajuda ita atu kontinua tahan iha tempu susar. Maibé Jeová la haree deʼit ita-nia susar. Nia mós komprende ita no ajuda ita atu hetan kmaan no anima liuhusi Bíblia.