Bíblia fó matadalan neʼebé diʼak

Se ita halo desizaun tuir deʼit ita rasik ka ema seluk nia sentimentu, dala ruma ita la hetan rezultadu diʼak. Bíblia esplika tanbasá. No Bíblia mós fó sai matadalan kona-ba morál neʼebé ita bele tau fiar. Halo tuir matadalan sira-neʼe mak xave atu halaʼo moris kontente no iha objetivu.

MATADALAN NEʼEBÉ ITA PRESIZA

Iha Bíblia, Maromak Jeováa esplika katak ita ema presiza ninia matadalan, no ita rasik la iha matenek atu dirije ita-nia hakat sira. (Jeremias 10:23) Tan neʼe, nia fó matadalan kona-ba morál liuhusi Bíblia. Nia hadomi ita no hakarak proteje ita husi konsekuénsia neʼebé aat. Nia lakohi ita atu halo desizaun la diʼak neʼebé lori susar ba ita. (Deuteronómio 5:29; 1 João 4:8) Laʼós neʼe deʼit, nuʼudar Kriadór, nia iha matenek atu fó konsellu neʼebé diʼak liu hotu. (Salmo 100:3; 104:24) Maski nuneʼe, nia nunka obriga ema atu halo tuir ninia matadalan sira.

Jeová fó buat hotu neʼebé Adão no Eva presiza atu moris kontente. (Génesis 1:28, 29; 2:8, 15) Nia mós fó matadalan simples balu no hakarak sira atu halo tuir. Maibé nia husik sira deside rasik atu moris tuir ka lae. (Génesis 2:9, 16, 17) Triste katak Adão no Eva hili atu moris tuir sira rasik nia hanoin duké halo tuir Maromak nia matadalan. (Génesis 3:6) Rezultadu mak saida? Kuandu ema deside rasik buat neʼebé loos ka sala, sira-nia moris sai diʼak liu ka lae? Lae! Istória hatudu katak la halo tuir Maromak nia matadalan sei la lori ksolok no dame ba ema.—Eclesiastes 8:9.

Bíblia fó matadalan neʼebé ita presiza atu bele halo desizaun diʼak, neʼe la depende ba fatin neʼebé ita hela ka ita-nia família mak oinsá. (2 Timóteo 3:16, 17; haree kaixa “Livru ba ema hotu”.) Haree toʼok oinsá Bíblia ajuda ita.

Aprende liután kona-ba tanbasá ita bele dehan katak Bíblia mak “Maromak nia liafuan”.—1 Tesalónika 2:13. Haree vídeo Bíblia mai husi sé? iha jw.org/tdt.

TANBASÁ EMA BALU LA HAFOLIN BÍBLIA

Ema balu hatete katak Bíblia laʼós livru neʼebé fó sai matadalan diʼak. Haree toʼok sira-nia razaun.

Ema balu dehan: “Informasaun iha Bíblia laran kontra malu.”

Faktu: Se ita haree didiʼak ba kontestu, istória, kultura, hakerek-naʼin nia haree ba situasaun ruma no faktu seluk, ita bele komprende katak eskritura sira neʼebé haree hanesan kontra malu tuir loloos la kontra malu.

Atu haree ezemplu espesífiku balu, lee “Informasaun iha Bíblia kontra malu ka lae?” iha jw.org/tdt.

Ema balu dehan: “Ema neʼebé hatete katak sira halo tuir Bíblia, sira mós halo buat neʼebé aat. Tan neʼe, Bíblia laʼós livru neʼebé fó matadalan diʼak.”

Faktu: Kuandu ema ruma la halo tuir Bíblia nia matadalan, neʼe la dehan katak Bíblia mak sala. Bíblia fó sai nanis katak ema barak inklui relijiaun nia ulun-naʼin sira sei hatudu hahalok neʼebé kontra Bíblia, no rezultadu mak ema sei “koʼalia aat” Bíblia nia hanorin.—2 Pedro 2:1, 2.

Atu hatene kona-ba ulun-naʼin relijiaun sira neʼebé la halo tuir Bíblia nia hanorin, lee “Relijiaun kahur ona ho bisnis ka lae?” iha jw.org/tdt.

Ema balu dehan: “Bíblia anima ema atu la tolera ema seluk nia hanoin.”

Faktu: Bíblia anima ita atu hatudu respeitu ba ema seluk. Bíblia la simu hahalok hanesan . . .

haree ita-nia an boot liu fali ema seluk.—Filipe 2:3.
la respeitu ema neʼebé fiar la hanesan ho ita.—1 Pedro 2:17.
obriga ema seluk atu halo tuir deʼit Ita.—Mateus 10:14.

Bíblia dehan katak Maromak sempre hatudu hahalok diʼak ba ema hotu no la todan ba sorin, nia mós hakarak ita halo nuneʼe ba malu.—Roma 9:14.

Atu hatene liután, lee informasaun “Toleránsia—Oinsá Bíblia bele ajuda” iha jw.org/tdt.

BÍBLIA FÓ SAI MAROMAK NIA MATADALAN

Bíblia fó sai kona-ba buat neʼebé Maromak Jeová halo ba ema. Bíblia nia istória ajuda ita komprende Maromak nia haree kona-ba saida mak loos no sala, no saida mak lori benefísiu ka perigu. (Salmo 19:7, 11) Liuhusi Bíblia, ita bele aprende lisaun sira neʼebé ajuda ita atu halo desizaun diʼak, no neʼe sei la troka nuʼudar tempu liu daudaun.

Porezemplu, hanoin toʼok konsellu ida iha Provérbios 13:20: “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.” Prinsípiu neʼe diʼak nafatin toʼo ohin loron. Bíblia nakonu ho prinsípiu neʼebé ajuda ita-nia moris.—Haree kaixa “Matenek husi Bíblia sempre vale”.

Maibé karik Ita hanoin: ‘Oinsá haʼu bele hatene se Bíblia nia matadalan kona-ba morál sei vale?’ Informasaun tuirmai sei fó sai ezemplu kona-ba ema balu neʼebé hetan ona benefísiu husi Bíblia nia matadalan.

a Jeová mak Maromak nia naran.—Salmo 83:18.

MATENEK HUSI BÍBLIA SEMPRE VALE

Maski Bíblia hakerek kompletu besik tinan 2.000 liubá, maibé ninia matadalan nafatin vale toʼo ohin loron. Ema nia hahalok no presiza nafatin hanesan husi tempu uluk toʼo agora. Ema sempre hakarak atu kontente no moris diʼak. (Eclesiastes 1:9) Matenek husi Bíblia bele ajuda ita atu kumpre objetivu neʼe.

Laran-moos

“Ami hakarak atu hatudu laran-moos iha buat hotu.”—Ebreu 13:18.
“Ema neʼebé naʼok keta naʼok tan, maibé nia tenke halo serbisu makaʼas.”—Éfeso 4:28.

Relasaun ho ema seluk

“Ema ida-idak tenke kontinua buka uluk ema seluk nia diʼak, laʼós buka diʼak deʼit ba ninia an.”—1 Korinto 10:24.
“Kontinua hatudu pasiénsia ba malu no prontu atu fó perdua ba malu ho laran tomak.”—Koloso 3:13.

Oinsá halo desizaun

“Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.”—Provérbios 14:15.
“Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.”—Provérbios 22:3.