Saida mak bele ajuda ita hetan futuru neʼebé diʼak?

Hanesan ita lee ona, ema barak buka futuru neʼebé diʼak hodi tau fiar ba destinu, edukasaun boot, rikusoin, ka koko atu sai ema neʼebé diʼak. Maibé halo buat sira-neʼe mak hanesan ita atu bá fatin ruma maibé uza mapa neʼebé hatudu dalan sala. Neʼe katak ita la iha dalan ona atu hetan futuru neʼebé diʼak? Lae!

MATADALAN NEʼEBÉ DIʼAK LIU HOTU

Bainhira halo desizaun ruma, baibain ita husu uluk ema neʼebé idade no matenek liu. Hanesan neʼe mós, se ita hakarak futuru neʼebé diʼak, ita presiza buka matadalan husi Ida neʼebé idade no matenek liu. Ita bele hetan Ninia konsellu iha livru ida neʼebé hahú hakerek maizumenus tinan 3.500 liubá. Livru neʼe mak Eskritura Sagrada, ka Bíblia.

Tanbasá mak ita bele tau fiar ba Bíblia? Tanba ninia Autór mak idade liu no matenek liu hotu iha lalehan no rai. Bíblia bolu nia nuʼudar “Naʼi husi Horiuluk Kedas” neʼebé “husi uluk kedas no ba nafatin”. (Daniel 7:9; Salmo 90:2) Nia mak “Kriadór ba lalehan, Maromak neʼebé loos, Ida neʼebé kria rai”. (Isaias 45:18) Nia fó-hatene ita katak ninia naran mak Jeová.—Salmo 83:18.

Bíblia la dehan katak kultura ka rasa ida mak diʼak liu fali ida seluk tanba ninia autór mak ita hotu nia Kriadór. Ninia matadalan iha valór ba nafatin no ajuda ona ema barak iha fatin oioin. Bíblia mak livru neʼebé tradús ba língua barak liu, no fahe ona ba ema barak liu fali livru seluk.a Neʼe katak ema iha fatin hotu bele lee Bíblia no aplika ninia matadalan. Neʼe tuir duni buat neʼebé Bíblia hatete:

“Maromak la todan ba sorin, no iha nasaun hotu, Maromak simu ema hotu neʼebé hamtaʼuk nia no halo buat neʼebé loos.”—APÓSTOLU 10:34, 35.

Hanesan inan-aman neʼebé hadomi no tau matan ba sira-nia oan, Maromak Jeová mak Aman domin neʼebé fó ajuda mai ita liuhusi ninia Liafuan Bíblia. (2 Timóteo 3:16) Ita bele tau fiar ba ninia Liafuan, tanba nia mak kria ita no hatene saida mak diʼak liu mai ita.

ITA BELE TAU FIAR BA BÍBLIA

Ita bele fiar ba buat neʼebé Bíblia hatete kona-ba futuru tanba tinan 2.000 liubá, Bíblia fó-hatene nanis ho loloos kona-ba akontesimentu no ema nia hahalok neʼebé ita haree ohin loron.

AKONTESIMENTU

“Nasaun ida sei kontra nasaun seluk, no ukun ida sei kontra ukun seluk. Sei mosu rai-nakdoko makaʼas, no sei mosu moras-peste oioin no rai-hamlaha iha fatin oioin.”—LUCAS 21:10, 11.

EMA NIA HAHALOK

“Iha loron ikus sira sei iha problema barak neʼebé susar atu tahan. Tanba ema sei hadomi deʼit sira-nia an, hadomi osan, gaba an, loko an, koʼalia aat Maromak no ema, la halo tuir inan-aman, la hatene fó agradese, la hatudu laran-metin, la hadomi malu, la rona malu, koʼalia aat hodi hafoʼer ema seluk nia naran, la kontrola an, siʼak, la hadomi buat neʼebé diʼak, traidór, ulun-toos, foti an, hadomi deʼit ksolok duké hadomi Maromak.”—2 TIMÓTEO 3:1-4.

Oinsá mak Bíblia neʼebé hakerek tinan barak liubá bele fó-hatene nanis ho loloos buat neʼebé akontese ohin loron? Ita konkorda ho Leung husi Honkóng, neʼebé hatete: “Bíblia nia profesia sira hakerek tinan barak liubá. Ema deʼit labele siʼik ho loloos buat neʼebé akontese iha futuru. Tenkesér iha ida neʼebé matenek liu fali ema mak fó sai ida-neʼe liuhusi Bíblia.”

Bíblia iha profesia atus ba atus neʼebé sai loos ona.b Neʼe hatudu katak Bíblia mak Maromak nia Liafuan. Maromak Jeová hatete: “Haʼu mak Maromak, no la iha ida mak hanesan haʼu. Husi uluk kedas haʼu fó-hatene nanis buat neʼebé sei mosu.” (Isaias 46:9, 10) Tan neʼe, ita bele fiar metin ba buat neʼebé Bíblia hatete kona-ba futuru.

BÍBLIA BELE AJUDA ITA AGORA NO IHA FUTURU

Kuandu Ita halo tuir matadalan husi Bíblia, neʼe lori benefísiu ba Ita-nia an. Hanoin toʼok ezemplu balu.

HANOIN NEʼEBÉ LOOS KONA-BA OSAN NO SERBISU

“Diʼak liu deskansa uitoan duké serbisu makaʼas demais, tanba neʼe hanesan duni tuir anin.”—ECLESIASTES 4:6.

MORIS FAMÍLIA NEʼEBÉ KONTENTE

“Laʼen ida-idak tenke hadomi ninia feen hanesan ninia an rasik, no feen mós tenke hatudu respeitu kleʼan ba ninia laʼen.”—ÉFESO 5:33.

RELASAUN DIʼAK HO EMA SELUK

“Husik tiha hirus no soe tiha laran-nakali; keta sai laran-nakali no halo hahalok aat.”—SALMO 37:8.

Aplika Bíblia nia matadalan sei ajuda Ita agora no loke dalan atu hetan futuru neʼebé diʼak. Bíblia fó sai Maromak nia promesa kona-ba futuru neʼebé kapás hanesan:

MORIS HO DAME NO SEGURU

“Sira sei hetan ksolok boot ho dame neʼebé barak.”—SALMO 37:11.

SEI IHA HELA-FATIN NO AI-HAN BARAK

“Sira sei harii uma no hela iha laran, no sira sei kuda uvas iha toʼos no han ninia fuan.”—ISAIAS 65:21.

SEI LA IHA TAN MORAS NO MATE

“Mate sei la iha tan, no ema sei la triste tan ka tanis ka sente moras.”—APOKALIPSE 21:4.

Atu bele hetan futuru diʼak hanesan neʼe, ita presiza halo saida? Haree toʼok informasaun tuirmai.

a Atu hetan informasaun kona-ba oinsá mak ema tradús no fahe Bíblia, loke www.jw.org/tdt no klik BÍBLIA NIA HANORIN > ISTÓRIA & BÍBLIA.

b Atu aprende liután, haree kapítulu 9 husi livru Alkitab—Firman dari Allah atau dari Manusia? Livru neʼe husi Testemuña ba Jeová no bele mós download husi www.jw.org/id. Klik PERPUSTAKAAN > BUKU & BROSUR.