Aprende lisaun importante husi liurai Izraél sira

1-2. Bíblia hatete saida kona-ba Izraél nia liurai balu?

BÍBLIA temi mane naʼin-40 liu neʼebé sai nuʼudar liurai ba nasaun Izraél.a Bíblia temi nakloke kona-ba buat neʼebé liurai sira-neʼe balu halo. Porezemplu, maski liurai ida iha hahalok diʼak, maibé nia mós halo buat balu neʼebé aat. Hanoin toʼok kona-ba Liurai David neʼebé diʼak. Jeová hatete: “Haʼu-nia atan David . . . laʼo tuir haʼu ho ninia laran tomak, hodi halo deʼit buat neʼebé loos tuir haʼu-nia haree.” (1 Reis 14:8) Maibé, David halo sala seksuál ho feto neʼebé kaben ona no mós halo planu atu oho feto neʼe nia laʼen iha funu.—2 Sam 11:​4, 14, 15.

² Iha parte seluk, iha liurai barak neʼebé la laran-metin maibé sira mós halo buat balu neʼebé diʼak. Hanoin toʼok kona-ba Roboão. Tuir Jeová nia haree, nia “halo hahalok aat”. (2 Krón 12:14) Maski nuneʼe, Roboão halo tuir Jeová bainhira Jeová husu nia atu la halo funu hasoru suku 10 husi Izraél no husik sira atu hili sira-nia liurai. Nia mós hametin liután sidade barak iha ninia ukun atu bele proteje Maromak nia povu husi inimigu sira.—1 Reis 12:​21-24; 2 Krón 11:​5-12.

3. Pergunta importante saida mak mosu, no ita sei koʼalia hamutuk kona-ba saida?

³ Neʼe hamosu pergunta importante ida. Se liurai Izraél sira halo buat neʼebé diʼak no la diʼak, oinsá mak Jeová deside katak liurai ida mak laran-metin ka lae? Resposta ba pergunta neʼe sei ajuda ita komprende kona-ba saida mak Jeová hakarak ita atu halo. Ita sei koʼalia hamutuk kona-ba buat tolu neʼebé Jeová haree husi liurai sira ba nasaun Izraél: sira-nia laran, oinsá sira arrepende an, no oinsá sira kaer metin ba adorasaun neʼebé loos.

SIRA HADOMI JEOVÁ HO LARAN TOMAK

4. Saida mak diferensa entre liurai neʼebé laran-metin no la laran-metin?

⁴ Liurai neʼebé halo Jeová kontente mak liurai neʼebé hadomi nia ho laranb tomak. Liurai Jeosafát neʼebé diʼak “adora Jeová ho ninia laran tomak”. (2 Krón 22:9) Kona-ba Josias, Bíblia hatete: “La iha liurai ida mak hanesan nia neʼebé fila fali ba Jeová ho ninia laran tomak.” (2 Reis 23:25) Oinsá ho Salomão neʼebé ikusmai halo buat neʼebé aat? ‘Nia la serbí Jeová ho laran tomak.’ (1 Reis 11:4) Kona-ba Abijam, liurai seluk neʼebé la laran-metin, Bíblia hatete: ‘Nia la serbí Jeová ho laran tomak.’—1 Reis 15:3.

5. Esplika toʼok serbí Jeová ho laran tomak katak sá.

⁵ Serbí Jeová ho laran tomak katak sá? Ho laran tomak katak ita serbí Jeová laʼós tanba neʼe mak toman deʼit. Maibé ita serbí Jeová tanba ita hadomi tebes nia no respeitu nia no kontinua halo ida-neʼe iha ita-nia moris tomak.

6. Oinsá mak ita bele nafatin serbí Jeová ho laran tomak? (Provérbios 4:23; Mateus 5:​29, 30)

⁶ Oinsá mak ita bele banati-tuir liurai sira neʼebé nafatin serbí Jeová ho laran tomak? Hodi hasees an husi influénsia neʼebé la diʼak. Porezemplu, atividade halimar nian neʼebé la diʼak, ransu neʼebé la diʼak, no materializmu bele halo ita-nia laran fahe ba rua. Se ita nota katak iha buat ruma neʼebé komesa halo fraku ita-nia domin ba Jeová, halo kedas buat ruma atu halakon ida-neʼe.—Lee Provérbios 4:23; Mateus 5:​29, 30.

7. Tanbasá importante atu hasees an husi influénsia neʼebé la diʼak?

⁷ Ita presiza kuidadu atu ita-nia laran la fahe ba rua. Se ita la kuidadu, ita bele lohi ita-nia an katak hodi okupadu iha buat espirituál nian, ita la presiza hadook an husi influénsia neʼebé la diʼak. Nuʼudar ilustrasaun, imajina toʼok Ita hela iha área foho neʼebé malirin tebes no anin boot. Bainhira toʼo iha uma, Ita haneruk ahi. Maibé, oinsá se Ita husik odamatan nakloke hela? Klaru katak anin neʼebé malirin sei tama ba uma laran. Pontu mak saida? La toʼo atu simu deʼit ai-han espirituál neʼebé bele ajuda ita atu iha relasaun besik ho Jeová. Ita mós presiza taka odamatan husi influénsia neʼebé la diʼak, atu nuneʼe mundu neʼe nia “anin” malirin, ka hahalok neʼebé la diʼak, la tama iha ita-nia laran no halo ita-nia laran fahe ba rua.—Éf 2:2.

SIRA ARREPENDE SIRA-NIA SALA

8-9. Liurai David no Liurai Ezequias halo saida bainhira hetan konsellu? (Haree dezeñu.)

⁸ Hanesan temi tiha ona, Liurai David halo sala sériu. Maibé bainhira profeta Natan fó konsellu ba nia, David ho haraik an arrepende an. (2 Sam 12:13) Liuhusi David nia liafuan neʼebé hakerek iha Salmo 51, ita bele haree katak David arrepende an ho laran. David laʼós finje deʼit hatudu sentimentu triste atu lohi Natan ka atu nia bele sees husi kastigu.—Sal 51:​3, 4, 17, introdusaun.

⁹ Liurai Ezequias mós halo sala hasoru Jeová. Bíblia hatete: “Ninia laran sai loko an, no neʼe halo Maromak sai hirus ba nia no ba ema Judá no Jeruzalein.” (2 Krón 32:25) Tanbasá Ezequias sai foti an? Karik tanba nia riku, nia manán ona ema Asíria, ka ninia moras hetan kura liuhusi milagre. Karik tanba foti an, neʼe book nia atu hatudu ba ema Babilónia ninia rikusoin hotu, tan neʼe mak profeta Isaias fó konsellu ba nia. (2 Reis 20:​12-18) Maibé hanesan David, Ezequias ho haraik an arrepende ninia sala. (2 Krón 32:26) No ikusmai Jeová haree nia nuʼudar liurai neʼebé laran-metin neʼebé “kontinua halo buat neʼebé loos”.—2 Reis 18:3.

10. Liurai Amazias halo saida bainhira nia hetan konsellu?

¹⁰ La hanesan David no Ezequias, Liurai Amazias husi Judá halo buat neʼebé loos “maibé la halo ho laran tomak”. (2 Krón 25:2) Sala saida mak nia halo? Depois Jeová ajuda Amazias manán ema Edom, nia adora fali ema Edom nia maromak.c No bainhira Jeová nia profeta fó konsellu ba nia, Amazias ulun-toos no lakohi rona.—2 Krón 25:​14-16.

11. Tuir 2 Korinto 7:​9, 11, saida mak ita presiza halo atu hetan perdua? (Haree mós foto.)

¹¹ Saida mak ita aprende husi ezemplu sira-neʼe? Ita presiza arrepende ita-nia sala sira no hakaʼas an atu la repete tan sala sira-neʼe. Oinsá se ita simu konsellu husi katuas kongregasaun, maski ita hanoin neʼe mak sala neʼebé kiʼik deʼit? Ita labele hanoin katak Jeová la simu ona ita ka katuas sira la gosta ita. Liurai Izraél sira neʼebé diʼak mós simu konsellu no hetan dixiplina. (Ebr 12:6) Bainhira ita hetan konsellu, ita presiza (1) simu ho haraik an, (2) halo mudansa, no (3) kontinua serbí Jeová ho laran tomak. Se ita arrepende ita-nia sala, Jeová sei perdua ita.—Lee 2 Korinto 7:​9, 11.

SIRA KAER METIN BA ADORASAUN NEʼEBÉ LOOS

12. Saida mak liurai sira neʼebé laran-metin halo?

¹² Liurai sira neʼebé Jeová haree nuʼudar laran-metin, sira kaer metin ba adorasaun neʼebé loos. No sira anima Jeová nia povu atu halo buat neʼebé hanesan. Klaru katak sira mós halo sala balu hanesan temi tiha ona. Maibé sira adora deʼit Jeová no hakaʼas an atu halakon estátua sira.d

13. Tanbasá Jeová haree Liurai Acab nuʼudar ema neʼebé la laran-metin?

¹³ Oinsá ho liurai sira neʼebé Jeová haree nuʼudar la laran-metin? Laʼós buat hotu neʼebé sira halo mak aat. Liurai Acab neʼebé aat mós hatudu haraik an no arrepende an tanba hola parte iha Nabot nia mate. (1 Reis 21:​27-29) Nia mós harii sidade barak no manán funu barak. (1 Reis 20:​21, 29; 22:39) Maibé Acab habelar adorasaun falsu tanba hetan influénsia husi ninia feen. No nia la arrepende an kona-ba neʼe.—1 Reis 21:​25, 26.

14. (a) Tanbasá mak Jeová haree Liurai Roboão nuʼudar ema neʼebé la laran-metin? (b) Saida mak liurai sira neʼebé la laran-metin halo?

¹⁴ Roboão mak liurai ida tan neʼebé la laran-metin. Hanesan temi tiha ona, nia halo buat diʼak barak durante ninia ukun. Maibé depois ninia ukun sai metin liután, nia husik tiha Jeová nia Ukun-Fuan no komesa adora fali maromak falsu. (2 Krón 12:1) Depois neʼe, dala ruma nia adora Jeová no dala ruma nia adora maromak falsu. (1 Reis 14:​21-24) Laʼós Roboão no Acab deʼit mak liurai neʼebé sees husi adorasaun loos. Loloos, kuaze liurai sira neʼebé la laran-metin adora fali maromak falsu no mós anima ema seluk atu halo buat neʼebé hanesan. Klaru katak tuir Jeová nia haree, kaer metin ba adorasaun neʼebé loos mak razaun importante atu hatudu katak liurai neʼe mak diʼak ka la diʼak.

15. Tanbasá kaer metin ba adorasaun neʼebé loos mak importante ba Jeová?

¹⁵ Tanbasá adorasaun mak buat neʼebé importante ba Jeová? Razaun ida mak liurai sira iha responsabilidade atu ajuda Maromak nia povu atu halaʼo adorasaun neʼebé loos. No mós, adorasaun falsu halo ema monu ba sala neʼebé sériu no hatudu hahalok la justisa. (Os 4:​1, 2) Liután neʼe, liurai sira no sira-nia povu dedika ona ba Jeová. Tan neʼe, Bíblia kompara sira-nia adorasaun falsu ho adultériu. (Jer 3:​8, 9) Ema neʼebé halo adultériu halo sala hasoru sira-nia pár no hakanek pár nia laran. Nuneʼe mós, bainhira Jeová nia atan neʼebé dedika an ona halaʼo adorasaun falsu, sira halo sala hasoru Jeová no hakanek ninia laran.e—Deut 4:​23, 24.

16. Tuir Jeová nia haree, saida mak diferensa entre ema laran-loos ho ema aat?

¹⁶ Saida mak ita aprende? Klaru katak ita tenke deside metin atu hasees an husi buat hotu neʼebé liga ho relijiaun falsu. Maibé ita mós tenke kaer metin ba adorasaun neʼebé loos no nafatin okupadu iha ita-nia serbisu. Profeta Malaquias hatete ho klaru Jeová nia haree kona-ba ema neʼebé diʼak no ema neʼebé la diʼak. Nia hatete: “Dala ida tan, imi sei haree duni oinsá ema laran-loos la hanesan ho ema aat, ema neʼebé serbí Maromak la hanesan ho ema neʼebé la serbí nia.” (Mal 3:18) Tan neʼe, maski ita la perfeitu no halo sala, ita lakohi husik ida-neʼe ka buat naran deʼit atu hanetik ita serbí Jeová. Se ita para atu serbí Jeová, neʼe mak sala neʼebé sériu.

17. Oinsá mak ema neʼebé Ita hili atu kaben bele afeta Ita-nia relasaun ho Jeová?

¹⁷ Se Ita mak klosan no hakarak atu kaben, Ita bele haree oinsá Malaquias nia liafuan kona-ba serbí Maromak iha ligasaun ho ema neʼebé Ita hili atu kaben. Se ema ida iha hahalok diʼak maibé la serbí Maromak neʼebé loos, tuir Jeová nia haree, nia mak ema neʼebé laran-loos ka lae? (2 Kor 6:14) Se Ita kaben ho ema neʼe , nia sei ajuda Ita iha dalan espirituál ka lae? Hanoin toʼok: Liurai Salomão nia feen sira iha hahalok balu neʼebé diʼak. Maibé sira la serbí Jeová, no neineik-neineik sira book Salomão nia laran atu halo adorasaun falsu.—1 Reis 11:​1, 4.

18. Inan-aman sira presiza hanorin saida ba oan?

¹⁸ Inan-aman bele uza istória husi Bíblia kona-ba liurai sira atu ajuda oan hatudu laran-manas iha sira-nia adorasaun ba Jeová. Ajuda Ita-nia oan komprende katak liurai sira neʼebé Jeová simu mak sira neʼebé adora deʼit nia no anima povu atu adora nia. Hanorin Ita-nia oan liuhusi Ita-nia liafuan no ezemplu katak atividade espirituál hanesan estuda Bíblia, tuir reuniaun, no hola parte iha serbisu haklaken mak importante liu fali atividade sira seluk. (Mt 6:33) Tanba se lae, karik Ita-nia oan sei hanoin katak sira sai Testemuña ba Jeová tan deʼit neʼe mak “família nia relijiaun”. Rezultadu mak karik sira sei la tau uluk adorasaun iha sira-nia moris, ka husik tiha lia-loos.

19. Ema neʼebé husik ona Jeová bele fila fali ka lae? (Haree mós kaixa “Ita bele fila fali ba Jeová!”)

¹⁹ Se ema ida para atu serbí Jeová, nia bele fila fali ka lae? Sin, naran katak nia arrepende an no adora fali Jeová. Atu halo nuneʼe, nia presiza hatudu hahalok haraik an no simu ajuda husi katuas kongregasaun. (Tgo 5:14) Se ita hakaʼas an atu sai fali Jeová nia belun, nia sei simu ita!

20. Se ita banati-tuir liurai sira neʼebé laran-metin, Jeová sei haree ita oinsá?

²⁰ Lisaun saida mak ita aprende ona husi Izraél nia liurai sira? Ita bele banati-tuir liurai sira neʼebé laran-metin hodi fó ita-nia laran tomak ba Jeová. Ita presiza aprende husi ita-nia sala, arrepende an, no halo mudansa. No importante atu kaer metin ba adorasaun neʼebé loos no adora deʼit Maromak neʼebé loos. Se Ita nafatin laran-metin ba Jeová, nia sei haree Ita nuʼudar ema neʼebé halo buat neʼebé loos.