Jeová “kura ema neʼebé laran-kanek”

1. Jeová sente oinsá kona-ba ninia atan sira?

JEOVÁ haree buat hotu neʼebé akontese ba ninia atan sira. Nia haree kuandu ita kontente no kuandu ita triste. (Sal 37:18) Jeová orgullu tebes bainhira haree ita hakaʼas an serbí nia ho laran tomak maski ita sente laran-kanek no neon-susar. Liután neʼe, nia hakarak tebes atu apoia no fó kmaan ba ita.

2. Saida mak Jeová halo ba ema neʼebé laran-kanek, no oinsá ita bele hetan benefísiu husi ninia domin?

² Salmo 147:3 hatete katak Jeová ‘kura ema neʼebé laran-kanek no falun ninia kanek’. Eskritura neʼe fó sai oinsá Jeová tau matan ba ema neʼebé laran-kanek no neon-susar. Saida mak ita tenke halo atu bele hetan benefísiu husi Jeová nia domin? Hanoin toʼok kona-ba ilustrasaun tuirmai. Doutór neʼebé matenek bele ajuda ema neʼebé hetan kanek. Maibé atu ema neʼe hetan benefísiu, nia tenke halo tuir doutór nia matadalan. Entaun ita mós presiza halo tuir Jeová nia matadalan se ita hakarak hetan kura. Iha lisaun neʼe, ita sei haree Jeová nia Liafuan ba ema neʼebé neon-susar, no oinsá atu aplika ninia matadalan iha ita-nia moris.

JEOVÁ HATETE KATAK ITA MAK FOLIN-BOOT

3. Tanbasá ema balu sente la iha folin?

³ Ita moris iha mundu neʼebé la iha domin, no neʼe halo ema barak sente katak sira la iha folin. Irmán ida naran Helena hatete: “Haʼu boot iha família neʼebé la hatudu domin. Haʼu-nia apá gosta halo violénsia, no loroloron nia hatete ba haʼu katak haʼu la iha folin.” Karik Ita mós hasoru situasaun neʼebé hanesan, ema trata aat Ita ka halo Ita sente la iha folin. Se nuneʼe, karik Ita sente katak la iha ema ida mak hanoin Ita.

4. Tuir Salmo 34:​18, Jeová promete saida mai ita?

⁴ Maski ema seluk trata aat Ita, Ita bele fiar katak Jeová hadomi no hafolin Ita. Nia “besik ema sira neʼebé laran-kanek”. (Lee Salmo 34:18.) Se Ita “laran-triste” ka “neon-susar”, hanoin-hetan katak Jeová haree buat diʼak iha Ita-nia laran no dada Ita ba nia. (João 6:44) Nia sempre prontu ajuda Ita tanba Ita mak folin-boot ba nia.

5. Saida mak ita aprende husi dalan neʼebé Jesus trata ema neʼebé ema seluk la hafolin?

⁵ Ita bele aprende kona-ba Jeová nia sentimentu liuhusi Jesus nia ezemplu. Bainhira iha rai, Jesus hatudu laran-diʼak ba ema neʼebé ema seluk la hafolin. (Mt 9:​9-12) Bainhira feto ida neʼebé moras todan kona Jesus nia roupa tanba hakarak hetan kura, Jesus fó kmaan ba nia no gaba ninia fiar. (Mc 5:​25-34) Jesus haleno ninia Aman nia hahalok ho perfeitu. (João 14:9) Tan neʼe, Ita bele fiar katak Jeová hafolin Ita no tau atensaun ba Ita-nia hahalok diʼak, inklui Ita-nia fiar no domin ba nia.

6. Saida mak Ita bele halo se Ita sente la iha folin?

⁶ Saida mak Ita bele halo se Ita sente la iha folin, ka hanoin negativu mosu fali? Lee eskritura balu husi Bíblia neʼebé ajuda Ita atu fiar katak Jeová hafolin Ita, no medita kona-ba neʼe.b (Sal 94:19) Keta fokus ba buat neʼebé Ita labele halo, no keta kompara Ita-nia an ho ema seluk. Jeová la husu Ita atu halo buat neʼebé Ita labele halo. (Sal 103:​13, 14) Se ema trata aat, halo violénsia, ka abuza Ita iha tempu uluk, keta fó-sala Ita-nia an! Hanoin-hetan, Jeová sei tesi-lia ba sira, laʼós ba Ita. (1 Ped 3:12) Sandra neʼebé hasoru violénsia husi inan-aman kuandu sei kiʼik, hatete: “Haʼu sempre husu Jeová ajuda haʼu atu haree haʼu-nia an tuir Jeová nia haree.”

7. Oinsá mak ita-nia esperiénsia uluk nian bele ajuda ita atu serbí Jeová diʼak liután?

⁷ Ita bele fiar katak Jeová bele uza Ita atu ajuda ema seluk. Nia fó Ita priviléjiu atu halo serbisu haklaken hamutuk ho nia. (1 Kor 3:9) Ita-nia esperiénsia uluk nian kuandu hasoru susar bele ajuda Ita atu komprende ema seluk nia sentimentu. Ita bele halo buat barak atu ajuda sira. Helen neʼebé temi ona, simu ajuda no agora ajuda fali ema seluk. Nia hatete: “Uluk haʼu sente la iha folin, maibé Jeová ajuda haʼu atu sente domin no uza haʼu atu ajuda fali ema seluk.” Agora Helen serbí nuʼudar pioneiru regulár ho kontente.

JEOVÁ HAKARAK ITA SIMU NINIA PERDUA

8. Saida mak Jeová hatete iha Isaias 1:18?

⁸ Jeová nia atan balu nafatin sente neon-susar kona-ba sala neʼebé sira halo iha tempu uluk, maski sala neʼebé sira halo mak antes ka depois hetan batizmu. Maibé ita presiza hanoin-hetan katak Jeová hadomi tebes ita no fó Jesus nia sakrifísiu atu perdua ita-nia sala. Klaru, nia hakarak ita atu simu prezente folin-boot neʼe. Jeová hatete katak kuandu ita “hadiʼa problema”c entre ita ho Jeová, nia sei perdua ita iha dalan neʼebé kompletu. (Lee Isaias 1:18.) Ita agradese tebes tanba Jeová la hanoin-hetan tan ita-nia sala! No iha tempu neʼebé hanesan, nia nunka haluha buat diʼak neʼebé ita halo ona.—Sal 103:​9, 12; Ebr 6:10.

9. Duké hanoin beibeik kona-ba ita-nia pasadu, saida mak ita presiza halo?

⁹ Se Ita sente neon-susar kona-ba Ita-nia pasadu, hakaʼas an atu fokus ba buat neʼebé Ita halo agora no sei halo iha futuru. Hanoin toʼok apóstolu Paulo nia ezemplu. Nia arrepende an tanba uluk fó-terus ba ema Kristaun, no nia hatene katak Jeová fó perdua ona ba nia. (1 Tim 1:​12-15) Paulo hanoin beibeik kona-ba sala neʼebé uluk nia halo ka lae? Lae, no nia mós la hanoin beibeik kona-ba ninia pasadu nuʼudar ema Farizeu. (Flp 3:​4-8, 13-15) Duké halo nuneʼe, Paulo kontinua hakaʼas an atu haklaken no fokus ba futuru. Hanesan Paulo, Ita labele troka Ita-nia pasadu, maibé Ita bele fó hahiʼi ba Jeová no halo nia kontente agora. Ita mós bele hanoin kona-ba futuru kapás neʼebé nia promete ba Ita.

10. Saida mak ita bele halo se ita-nia hahalok uluk hakanek ema seluk?

¹⁰ Karik Ita sente neon-susar tanba Ita-nia hahalok uluk neʼebé hakanek ema seluk. Saida mak bele ajuda Ita? Halo buat neʼebé Ita bele atu hadiʼa situasaun, inklui husu deskulpa. (2 Kor 7:11) Husu Jeová atu ajuda ema neʼebé Ita hakanek. Jeová bele ajuda Ita no ema neʼe atu kontinua serbí nia no iha dame.

11. Saida mak ita aprende husi profeta Jonas nia ezemplu? (Haree mós dezeñu.)

¹¹ Aprende husi sala uluk nian, no prontu atu husik Jeová uza Ita atu kumpre ninia hakarak. Hanoin toʼok kona-ba profeta Jonas nia ezemplu. Duké halo viajen ba Nínive hodi tuir Maromak nia mandamentu, Jonas halai fali ba fatin seluk. Jeová fó dixiplina ba Jonas no Jonas aprende husi ninia sala. (Jonas 1:​1-4, 15-17; 2:​7-10) Jeová kontinua uza Jonas nuʼudar ninia profeta hodi fó ba nia oportunidade atu bá fali Nínive, no agora Jonas prontu atu halo tuir. Nia la husik ninia sala uluk nian hanetik nia atu simu knaar neʼe husi Jeová.—Jonas 3:​1-3.

JEOVÁ FÓ KMAAN MAI ITA LIUHUSI ESPÍRITU SANTU

12. Kuandu hasoru susar, oinsá mak Jeová fó ita dame? (Filipe 4:​6, 7)

¹² Liuhusi espíritu santu, Jeová fó kmaan mai ita bainhira ita hasoru situasaun neʼebé lori trauma. Hanoin toʼok esperiénsia husi Ron no Carol. Sira-nia oan-mane oho an. Sira hatete: “Ami hasoru ona susar oioin, maibé ida-neʼe mak susar neʼebé boot liu. Kalan-kalan ami toba la dukur, tan neʼe ami halo orasaun ba Jeová, no ami sente duni dame hanesan temi iha Filipe 4:​6, 7.” (Lee.) Se Ita hasoru daudaun susar, Ita bele halo orasaun beibeik ba Jeová iha tempu naran deʼit. (Sal 86:3; 88:1) Husu beibeik Jeová atu fó ninia espíritu santu. Nia sempre ajuda Ita.—Lc 11:​9-13.

13. Oinsá mak espíritu santu bele ajuda ita kontinua serbí Jeová ho laran-metin? (Éfeso 3:16)

¹³ Ita sente la iha forsa tanba susar ruma ka lae? Espíritu santu bele fó Ita forsa atu kontinua serbí Jeová ho laran-metin. (Lee Éfeso 3:16.) Hanoin toʼok esperiénsia husi irmán ida naran Flora. Bainhira nia no ninia laʼen serbí nuʼudar misionáriu, ninia laʼen halo adultériu no ikusmai soe malu. Nia hatete: “Haʼu laran-kanek tebes toʼo labele hanoin kona-ba buat seluk. Haʼu husu Jeová nia espíritu santu atu bele tahan. Jeová fó forsa no hametin haʼu atu tahan maski foufoun haʼu sente susar tebes.” Flora sente Jeová nia ajuda no fiar katak Jeová prontu apoia nia iha situasaun naran deʼit. Nia hatete: “Liafuan iha Salmo 119:32 aplika ba haʼu: ‘Haʼu sei buka tuir Ita-nia mandamentu sira ho laran-manas tanba Ita loke luan haʼu-nia laran.’”

14. Atu bele simu espíritu santu, saida mak ita presiza halo?

¹⁴ Kuandu Ita husu ona espíritu santu, saida tan mak Ita presiza halo? Halo buat ruma neʼebé ajuda Ita atu simu liután espíritu santu. Neʼe inklui tuir reuniaun sira no haklaken. Hakaʼas an atu iha hanoin hanesan Jeová nian hodi lee Bíblia loroloron. (Flp 4:​8, 9) No kuandu Ita lee, tau atensaun ba ema iha Bíblia nia tempu neʼebé hasoru susar, no medita kona-ba oinsá Jeová ajuda sira tahan. Sandra neʼebé temi ona, hasoru susar tuituir malu iha ninia moris. Nia hatete: “Istória kona-ba José anima tebes haʼu. Maski nia hasoru susar oioin no situasaun la justisa, maibé nia la husik ida-neʼe estraga ninia relasaun ho Jeová.”—Gén 39:​21-23.

JEOVÁ HAMETIN ITA LIUHUSI IRMAUN-IRMÁN SIRA

15. Ita bele hetan kmaan husi sé, no oinsá sira bele ajuda ita? (Haree mós foto.)

¹⁵ Bainhira ita hasoru susar, irmaun-irmán sira bele sai “ajuda-naʼin neʼebé fó kmaan”. (Kol 4:11) Dalan ida neʼebé Jeová hatudu sai ninia domin mak liuhusi irmaun-irmán sira. Sira bele fó kmaan mai ita hodi rona ba ita, ka apoia ita hodi gasta tempu hamutuk. Karik sira bele hametin ita hodi hatudu eskritura ruma ka halo orasaun ho ita.d (Rom 15:4) Dala ruma irmaun-irmán sira bele fó-hanoin ita kona-ba Jeová nia hanoin no ajuda ita atu kontinua tahan. Sira mós bele ajuda ita iha dalan seluk tan atu bele sente kmaan, porezemplu prepara hahán ba ita.

16. Saida mak Ita presiza halo atu bele simu ajuda husi irmaun-irmán sira?

¹⁶ Atu bele simu ajuda husi irmaun-irmán sira, karik Ita presiza husu kona-ba neʼe. Sira hadomi Ita no hakarak ajuda Ita. (Prov 17:17) Maibé karik sira la hatene saida mak Ita sente ka saida mak Ita presiza. (Prov 14:10) Se Ita sente estrese, Ita bele fó sai ida-neʼe ba maluk neʼebé maduru hodi sira bele hatene oinsá atu ajuda Ita. Karik Ita mós bele koʼalia ho katuas ida ka rua neʼebé Ita sente besik. Irmán balu sente kontente atu koʼalia ho irmán seluk neʼebé maduru.

17. Saida deʼit mak bele hanetik ita atu simu laran-manas, no oinsá mak ita bele hasoru ida-neʼe?

¹⁷ Keta haketak an husi irmaun-irmán sira. Karik Ita lakohi ransu ho ema seluk tanba sente laran-kanek. Dala ruma irmaun-irmán sira la komprende Ita-nia sentimentu no fó sai buat neʼebé hakanek Ita-nia laran. (Tgo 3:2) Maibé, keta husik situasaun susar sira-neʼe hanetik Ita atu simu laran-manas. Katuas kongregasaun ida naran Gavin neʼebé iha moras depresaun hatete: “Dala barak haʼu lakohi ransu ho haʼu-nia belun sira.” Maski nuneʼe, Gavin hakaʼas an atu hamutuk ho irmaun-irmán sira, no nia sente kontente bainhira halo ida-neʼe. Irmán ida naran Amy hatete: “Buat neʼebé haʼu hasoru iha pasadu halo susar ba haʼu atu tau fiar ba ema seluk. Maibé haʼu aprende atu hadomi no tau fiar ba irmaun-irmán sira hanesan buat neʼebé Jeová halo. Haʼu hatene katak neʼe halo Jeová kontente no haʼu mós kontente.”

JEOVÁ NIA PROMESA KONA-BA FUTURU FÓ KMAAN MAI ITA

18. Ita-nia futuru sei sai oinsá, no saida mak ita presiza halo agora?

¹⁸ Ita bele tau fiar ba futuru tanba hatene katak lakleur tan Jeová sei halakon ita-nia susar hotu iha dalan neʼebé kompletu. (Apok 21:​3, 4) Iha tempu neʼebá, buat neʼebé halo ita laran-kanek sei “la rai nafatin iha ema nia laran”. (Isa 65:17) Hanesan ita aprende ona, Jeová sei ‘falun ita-nia kanek’. Jeová fó ona buat barak atu ajuda ita hetan kmaan, tan neʼe aproveita didiʼak buat sira-neʼe. Keta duvida katak ‘nia hanoin Ita’.—1 Ped 5:7.