Ita nunka mesak

1-2. (a) Tanbasá ita bele fiar katak ita sei nunka hasoru susar mesak deʼit? (b) Iha lisaun neʼe, ita sei koʼalia kona-ba saida?

BAINHIRA ita hasoru susar boot ruma, karik ita sente hanesan ita mesak deʼit iha ró kiʼik iha tasi klaran ho laloran boot neʼebé baku bá-mai. Maibé, tuir loloos ita la hasoru susar neʼe mesak deʼit. Ita-nia Aman iha lalehan neʼebé nakonu ho domin laʼós deʼit haree ita-nia susar, maibé mós promete atu ajuda ita. Jeová ho domin hatete ba ninia atan sira neʼebé laran-metin: “Haʼu sei ajuda ó.”—Isa 41:10.

² Iha lisaun neʼe, ita sei koʼalia kona-ba oinsá mak Jeová ajuda ita (1) hodi dirije ita, (2) fó buat neʼebé ita presiza, (3) proteje ita, no (4) fó kmaan mai ita. Jeová fó garantia katak maski ita hasoru susar naran deʼit, nia sei nunka haluha ita. Nia sei nunka husik hela ita. Tan neʼe ita nunka mesak.

JEOVÁ DIRIJE ITA

3-4. Oinsá mak Jeová dirije ita? (Salmo 48:14)

³ Lee Salmo 48:14. Jeová hatene katak ita labele dirije ita-nia an rasik no ita presiza nia atu dirije ita. Ohin loron, oinsá nia dirije ninia atan sira neʼebé laran-metin? Dalan ida mak liuhusi Bíblia. (Sal 119:105) Liuhusi Bíblia, Jeová ajuda ita oinsá atu halo desizaun no haburas hahalok diʼak sira neʼebé lori kontente mai ita agora no moris ba nafatin iha futuru.a Porezemplu, nia hanorin ita atu fó perdua no la rai odi, laran-moos iha buat hotu, no kontinua hadomi ema seluk ho laran. (Sal 37:8; Ebr 13:18; 1 Ped 1:22) Bainhira ita hatudu hahalok sira-neʼe, ita bele sai inan-aman, feen-laʼen, no belun neʼebé diʼak liután.

⁴ Iha Bíblia, Jeová mós fó-hatene ita istória kona-ba ema neʼebé hasoru susar no iha sentimentu neʼebé hanesan ho ita. (1 Kor 10:13; Tgo 5:17) Bainhira ita lee istória sira-neʼe no aplika ninia lisaun sira, ita sei hetan benefísiu iha dalan rua. Primeiru, ita bele rekoñese katak ita la mesak no ema seluk mós hasoru ona situasaun neʼebé hanesan no manán ida-neʼe. (1 Ped 5:9) Segundu, ita aprende oinsá atu tahan hasoru ita-nia susar.—Rom 15:4.

5. Jeová uza sé atu dirije ita?

⁵ Jeová mós uza irmaun-irmán sira atu dirije ita.b Porezemplu, katuas área sira vizita beibeik kongregasaun atu hametin ita. Sira-nia diskursu no liafuan sira hametin ita-nia fiar no ajuda ita atu nafatin unidade. (Após 15:40–16:5) Katuas kongregasaun sira mós serbisu makaʼas atu ajuda ema ida-idak atu kontinua hakbesik ba Jeová. (1 Ped 5:​2, 3) Inan-aman sira hanorin sira-nia oan atu hadomi Jeová, oinsá atu halo desizaun neʼebé matenek, no iha toman neʼebé diʼak. (Prov 22:6) No irmán Kristaun neʼebé maduru mós ajuda irmán joven sira liuhusi sira-nia ezemplu, fó matadalan neʼebé bele ajuda, no anima sira ho domin.—Tito 2:​3-5.

6. Saida mak ita tenke halo atu hetan benefísiu husi Jeová nia matadalan?

⁶ Jeová fó ona buat hotu neʼebé ita presiza atu halo desizaun neʼebé diʼak. Oinsá mak ita bele hatudu katak ita hafolin buat neʼebé nia fó ona mai ita? Provérbios 3:​5, 6 hatete: “Tau fiar ba Jeová ho ó-nia laran tomak, no labele sadere ba ó-nia matenek rasik.” Bainhira ita halo nuneʼe, Jeová “sei halo loos [ita-nia] dalan sira”, neʼe katak nia sei ajuda ita atu hasees an husi problema barak no goza moris neʼebé kontente liu. Ita agradese tebes tanba Jeová ho domin fó matadalan neʼebé ita ida-idak presiza!—Sal 32:8.

JEOVÁ FÓ BUAT NEʼEBÉ ITA PRESIZA

7. Iha dalan saida deʼit mak Jeová fó buat neʼebé ita presiza? (Filipe 4:19)

⁷ Lee Filipe 4:19. Jeová laʼós deʼit dirije ita iha dalan espirituál, maibé nia mós haraik bensaun ba ita-nia hakaʼas an atu hetan ai-han, roupa, no hela-fatin. (Mt 6:33; 2 Tes 3:12) La sala atu hanoin kona-ba ita-nia presiza fíziku, maibé Jeová anima ita atu la hanoin demais kona-ba buat sira-neʼe. (Mt 6:25) Tanbasá? Tanba ita-nia Aman sei nunka husik hela ninia atan sira neʼebé laran-metin. (Mt 6:8; Ebr 13:5) Ita bele fiar duni ninia liafuan neʼebé dehan katak nia sei fó buat neʼebé ita presiza.

8. Saida mak Jeová halo ba David?

⁸ Hanoin toʼok oinsá Jeová ajuda David. Durante tinan balu neʼebé David halai husi Liurai Saul, Jeová fó ba nia no mane sira neʼebé laʼo ho nia buat neʼebé sira presiza atu moris. Kuandu David hanoin fali kona-ba oinsá Jeová tau matan ona nia iha tempu neʼebá, nia hatete: “Uluk haʼu joven no agora haʼu idade ona, maibé haʼu seidauk haree Maromak husik hela ema laran-loos, no seidauk haree ninia oan sira husu hahán.” (Sal 37:25) Hanesan David, karik Ita mós haree ona oinsá Jeová ho domin tau matan ba Ita ka irmaun-irmán sira iha tempu susar.

9. Oinsá mak Jeová tau matan ba ninia povu ohin loron bainhira akontese dezastre? (Haree mós foto.)

⁹ Jeová mós tau matan ba ninia povu durante tempu dezastre. Porezemplu, bainhira akontese hamlaha boot iha apóstolu sira-nia tempu, irmaun-irmán sira husi fatin seluk fó ajuda ba sira neʼebé presiza. (Após 11:​27-30; Rom 15:​25, 26) Jeová nia povu ohin loron mós halo buat neʼebé hanesan. Bainhira akontese dezastre, Jeová ho domin book ninia povu atu fó ajuda neʼebé presiza, hanesan ai-han, bee, roupa, no ai-moruk ba sira neʼebé kona dezastre. Irmaun-irmán sira mós halo serbisu atu hadiʼa uma no Reuniaun-Fatin neʼebé hetan estragu. No Jeová nia atan sira lalais atu ajuda iha dalan emosaun no espirituál ba maluk sira neʼebé lakon sira-nia uma ka ema neʼebé sira hadomi.c

10-11. Saida mak Ita aprende husi Borys nia esperiénsia?

¹⁰ Jeová mós hatudu laran-luak ba ema neʼebé seidauk serbí nia. Tan neʼe, ita mós buka oportunidade atu hatudu laran-diʼak ba sira neʼebé la serbí Jeová. (Gal 6:10) Baibain neʼe bele fó sasin diʼak ba ema seluk. Hanoin toʼok esperiénsia husi diretór eskola ida naran Borys iha Ukránia. Maski Borys laʼós Testemuña ba Jeová, nia sempre hatudu laran-diʼak ba estudante Testemuña sira no respeitu sira-nia fiar. Kuandu Borys deside atu halai husi área neʼebé akontese funu hodi bá área neʼebé seguru, irmaun-irmán sira ajuda nia. Tuirmai, Borys asiste Memoriál kona-ba Jesus nia mate. Bainhira hanoin fali ninia esperiénsia, Borys hatete: “Testemuña sira hatudu laran-diʼak no tau matan didiʼak haʼu. Haʼu agradese tebes ba sira.”

¹¹ Ita mós bele banati-tuir ita-nia Aman iha lalehan neʼebé laran-sadiʼa hodi hatudu domin ba ema neʼebé presiza, maski sira fiar hanesan ho ita ka lae. (Lc 6:​31, 36) Ita hein katak domin neʼebé ita hatudu ba ema bele motiva sira atu aprende kona-ba Jeová no serbí nia. (1 Ped 2:12) Maibé, maski sira serbí Jeová ka la serbí nia, ita nafatin bele sente kontente tebes tanba ita fó ba ema seluk.—Após 20:35.

JEOVÁ PROTEJE ITA

12. Jeová promete atu proteje ninia povu nuʼudar grupu iha dalan oinsá? (Salmo 91:​1, 2, 14)

¹² Lee Salmo 91:​1, 2, 14. Ohin loron, Jeová promete atu proteje ita iha dalan espirituál. Nia sei nunka husik Satanás estraga adorasaun neʼebé loos. (João 17:15) No bainhira “terus boot” akontese, ita bele fiar metin katak Jeová sei kumpre ninia promesa atu proteje ninia povu iha dalan espirituál no mós fíziku.—Apok 7:​9, 14.

13. Oinsá mak Jeová proteje ita ida-idak?

¹³ Oinsá mak Jeová proteje ita ida-idak? Liuhusi Bíblia, Jeová ajuda ita atu hatene saida mak loos no sala. (Ebr 5:14) Bainhira ita moris tuir Bíblia nia prinsípiu sira, ita hetan protesaun iha dalan espirituál no fíziku. (Sal 91:4) No Jeová mós proteje ita liuhusi kongregasaun. (Isa 32:​1, 2) Kuandu ita hamutuk beibeik ho irmaun-irmán sira neʼebé hadomi Jeová no halo tuir nia, ita bele hetan anima no forsa atu hasees an husi influénsia neʼebé la diʼak.—Prov 13:20.

14. (a) Tanbasá Jeová husik ita atu hasoru susar? (b) Oinsá mak Salmo 9:10 hametin ita? (Haree mós nota-rodapé.)

¹⁴ Iha tempu uluk, dala ruma Jeová proteje ninia atan sira husi perigu ka mate, maibé nia la halo ida-neʼe iha situasaun hotu. Bíblia hatete katak “situasaun neʼebé mosu derrepente deʼit” bele kona ita hotu. (Ecle 9:11) No mós, atu prova katak Satanás mak bosok-teen, Jeová husik ninia atan sira hasoru susar husi ema neʼebé kontra lia-loos no balu mate. (Job 2:​4-6; Mt 23:34) Hanesan neʼe mós ho ohin loron. Maski karik Jeová la halakon ita-nia susar sira, maibé ita bele fiar katak nia sei nunka husik hela ema neʼebé hadomi nia.d—Sal 9:10.

JEOVÁ FÓ KMAAN MAI ITA

15. Oinsá mak ita bele hetan kmaan liuhusi orasaun, Bíblia, no maluk Kristaun sira? (2 Korinto 1:​3, 4)

¹⁵ Lee 2 Korinto 1:​3, 4. Dala ruma ita sente triste, hanoin barak, ka estrese. Karik Ita hasoru hela susar neʼebé halo Ita sente mesamesak. Iha ka lae ida neʼebé komprende buat neʼebé Ita sente? Jeová komprende. Nia laʼós deʼit sente ita-nia susar, maibé nia mós “fó kmaan ba ita iha ita-nia susar hotu”. Oinsá? Bainhira ita fakar sai ita-nia sentimentu ba Jeová liuhusi orasaun, nia fó mai ita “dame neʼebé aas liu ema nia hanoin hotu”. (Flp 4:​6, 7) Ita mós hetan kmaan bainhira ita lee Jeová nia liafuan sira iha Bíblia. Sin, Jeová fó-hatene ita oinsá nia hadomi tebes ita, hanorin ita sai ema neʼebé matenek, no fó ita esperansa. No liuhusi reuniaun sira, ita hetan kmaan husi Bíblia nia hanorin no maluk Kristaun sira neʼebé hadomi ita.

16. Saida mak Ita aprende husi Nathan no Priscilla nia esperiénsia?

¹⁶ Atu esplika oinsá Jeová fó kmaan no anima ita liuhusi ninia Liafuan, hanoin toʼok esperiénsia husi Nathan no Priscilla neʼebé hela iha Estadus Unidus. Tinan balu liubá, sira deside atu muda ba fatin neʼebé presiza liután haklaken-naʼin. Nathan hatete: “Ami fiar katak Jeová sei haraik bensaun ba ami-nia hakaʼas an.” Maibé depois toʼo tiha fatin neʼe, sira hasoru problema saúde neʼebé mosu derrepente no problema ekonomia. Feen-laʼen neʼe ikusmai tenke fila fali no kontinua hasoru problema ekonomia. Nathan hatete: “Haʼu hanoin beibeik tanbasá Maromak la haraik bensaun tuir buat neʼebé ami espera. Haʼu mós komesa hanoin katak karik ami halo sala ruma.” Maibé liutiha tempu balu, Nathan no Priscilla komesa rekoñese katak Maromak nunka husik hela sira. Nathan hatete: “Durante tempu susar, Bíblia mak hanesan belun matenek ida neʼebé anima no dirije ami. Hodi fokus ba oinsá Jeová ajuda ami tahan hasoru susar duké fokus ba susar neʼe rasik, neʼe halo ami fiar metin katak Jeová sei kontinua ajuda ami iha futuru.”

17. Oinsá mak irmán Helga hetan kmaan? (Haree mós foto.)

¹⁷ Irmaun-irmán sira bele ajuda ita hodi fó kmaan tuir ita-nia presiza. Oinsá? Hanoin toʼok ezemplu kona-ba Helga neʼebé hela iha Ungria. Durante tinan barak, nia hasoru susar oioin neʼebé halo nia laran-kraik no sente la iha folin. Maibé, bainhira hanoin fali kona-ba neʼe, nia bele haree oinsá Jeová fó kmaan ba nia liuhusi kongregasaun. Nia hatete: “Jeová sempre ajuda haʼu bainhira nia haree katak haʼu-nia forsa besik atu lakon tanba serbisu neʼebé haʼu halo, tau matan ba haʼu-nia oan neʼebé moras, no susar seluk tan. Durante tinan 30, la iha loron ida mak Jeová la kumpre ninia promesa atu fó kmaan mai haʼu. Jeová hametin beibeik haʼu liuhusi irmaun-irmán sira-nia liafuan neʼebé fó kmaan mai haʼu. Dala barak haʼu simu mensajen, karta, no liafuan gaba iha tempu neʼebé haʼu presiza tebes.”

18. Oinsá mak ita bele fó kmaan ba ema seluk?

¹⁸ Ita iha priviléjiu atu banati-tuir ita-nia Maromak hodi fó kmaan ba ema seluk. Oinsá atu halo nuneʼe? Ita bele rona ba sira ho pasiénsia, koʼalia hodi fó kmaan, no ajuda sira tuir sira-nia presiza. (Prov 3:27) Ita hakaʼas an atu fó kmaan ba ema hotu neʼebé hasoru susar, inklui sira neʼebé seidauk serbí Jeová. Bainhira ita-nia viziñu sente triste, moras, ka hanoin barak, ita vizita sira hodi rona ba sira no fahe eskritura neʼebé anima sira. Bainhira ita banati-tuir Jeová, “Maromak neʼebé fó kmaan”, karik ita laʼós deʼit ajuda ita-nia maluk tahan susar, maibé mós ajuda sira neʼebé seidauk serbí Jeová atu hakarak aprende kona-ba nia.—Mt 5:16.

JEOVÁ SEMPRE IHA BA ITA

19. Saida mak Jeová halo ba ita, no oinsá ita bele banati-tuir nia?

¹⁹ Jeová hanoin tebes ema hotu neʼebé hadomi nia. Nia la husik hela ita bainhira ita hasoru susar. Hanesan inan-aman neʼebé ho domin tau matan ba sira-nia oan, Jeová mós tau matan ba ninia atan sira neʼebé laran-metin. Nia dirije ita, fó buat neʼebé ita presiza, proteje ita, no fó kmaan mai ita. Ita banati-tuir ita-nia Aman iha lalehan bainhira ita apoia no anima ema neʼebé hasoru susar. Iha mundu neʼe, ita bele deʼit hasoru susar no terus oioin, maibé ita bele fiar katak Jeová hamutuk ho ita. Jeová promete mai ita: “Keta taʼuk, tanba haʼu hamutuk ho ó.” (Isa 41:10) Sin, ita bele fiar metin katak ita sei nunka mesak!