Funu mak buat neʼebé aat tebetebes
Funu no konflitu fó impaktu aat ba ema. Soldadu sira no povu baibain iha mundu tomak sente ona ida-neʼe.
SOLDADU SIRA
“Durante funu, haʼu haree beibeik ema neʼebé mate ka hetan kanek todan. Haʼu nunka sente seguru.”—Gary, Bretaña.
“Haʼu hetan tiru iha haʼu-nia kotuk laran no oin, no haʼu haree ema barak mate inklui labarik no ferik-katuas sira. Funu halo ema sente katak terus no mate mak buat neʼebé baibain deʼit.”—Wilmar, Kolómbia.
“Bainhira ita haree ema hetan tiru iha ita-nia oin, neʼe nunka lakon husi ita-nia neon. Ita hanoin fila-fila kona-ba ema neʼe nia hakilar no halerik. Ita nunka haluha ninia oin.”—Zafirah, Estadus Unidus.
POVU BAIBAIN
“Haʼu hanoin katak haʼu nunka bele sente kontente fali. Haʼu taʼuk atu mate. Maibé haʼu taʼuk liu se haʼu-nia família no belun mak mate.”—Oleksandra, Ukránia.
“Ami presiza forma atu simu hahán husi tuku 2 madrugada toʼo tuku 11 kalan no ami sente taʼuk tanba karik kilat-musan bele kona ami.”—Daler, Tajikistaun.
“Haʼu-nia inan-aman mate iha funu. Tan neʼe la iha ema ida atu fó kmaan no tau matan haʼu.”—Marie, Ruanda.
Maski ema sira-neʼe hasoru ona susar tanba funu, maibé ikusmai sira sente dame iha laran. Sira mós fiar katak lakleur tan funu no konflitu hotu sei remata. Livru Haklaken neʼe sei uza liafuan husi Bíblia atu esplika kona-ba oinsá ida-neʼe sei akontese.