Hetan dame maski funu no konflitu akontese
Gary neʼebé uluk serbí nuʼudar tropa hatete: “Antes estuda Bíblia, haʼu la hatene tanbasá mak iha hahalok aat, hahalok la justisa no problema iha mundu. Maibé agora haʼu sente dame iha laran. Haʼu hatene katak Maromak Jeová sei halo mundu sai fatin neʼebé seguru.”
Tuir loloos iha mós ema barak neʼebé sente hanesan Gary. Haree toʼok oinsá Bíblia ajuda ona sira.
BÍBLIA HATETE: “Ita, oh Jeová, Ita mak diʼak no prontu atu fó perdua.”—Salmo 86:5.
OINSÁ NEʼE AJUDA EMA: “Versíkulu neʼe hametin haʼu-nia fiar katak Jeová mak laran-sadiʼa. Haʼu hatene katak nia prontu atu perdua buat hotu neʼebé uluk haʼu halo iha funu.”—Wilmar, Kolómbia.
BÍBLIA HATETE: “Haʼu kria daudaun lalehan foun no rai foun; no ema sei la hanoin tan buat uluk nian, no buat sira-neʼe sei la rai nafatin iha ema nia laran.”—Isaias 65:17.
OINSÁ NEʼE AJUDA EMA: “Agora haʼu kona moras mentál no depresaun tanba buat aat neʼebé haʼu haree kuandu haʼu sai soldadu. Maibé eskritura neʼe fó-hanoin haʼu katak lakleur tan Jeová sei halakon haʼu-nia memória aat hotu ba nafatin. Neʼe furak loos!”—Zafirah, Estadus Unidus.
BÍBLIA HATETE: “Iha ninia tempu, ema laran-loos sei buras, no dame sei sai barak toʼo fulan la iha tan.”—Salmo 72:7.
OINSÁ NEʼE AJUDA EMA: “Haʼu hanoin beibeik liafuan sira-neʼe. Lakleur tan funu no rezultadu aat husi funu sei lakon, no ita la presiza taʼuk tan katak ita-nia família no belun sira iha perigu laran.”—Oleksandra, Ukránia.
BÍBLIA HATETE: “Imi-nia ema neʼebé mate sei moris fali. . . . Oh imi neʼebé hela iha rai-rahun, hadeer bá no haklalak ho kontente!”—Isaias 26:19.
OINSÁ NEʼE AJUDA EMA: “Haʼu-nia família barak mate kuandu suku seluk mai atu oho ema hotu husi suku Tutsi. Maibé eskritura neʼe fó kmaan mai haʼu katak haʼu sei hasoru fali sira. Haʼu hein namanas atu rona sira koʼalia ho kontente bainhira sira moris hiʼas!”—Marie, Ruanda.
BÍBLIA HATETE: “Hela tempu uitoan tan, ema aat sei la iha ona . . . Maibé ema laran-maus sei simu rai nuʼudar sira-nian, no sira sei hetan ksolok boot ho dame neʼebé barak.”—Salmo 37:10, 11.
OINSÁ NEʼE AJUDA EMA: “Maski funu remata ona, maibé nafatin iha hahalok la justisa no mós ema aat. Eskritura neʼe ajuda tebes haʼu. Jeová haree buat hotu no komprende haʼu-nia situasaun. Nia promete katak lakleur tan buat aat hotu sei lakon no ema sei la hanoin tan ida-neʼe.”—Daler, Tajikistaun.
Bíblia ajuda ona ema sira-neʼe no mós Testemuña ba Jeová millaun ba millaun atu hetan dame. Sira aprende atu la diskrimina tan ema nia rasa, nasionalidade, no suku. (Éfeso 4:31, 32) Testemuña ba Jeová neutrál kona-ba polítiku no la hola parte atu halo violénsia.—João 18:36.
Testemuña ba Jeová mak hanesan família ida iha mundu tomak neʼebé apoia malu. (João 13:35) Porezemplu, Oleksandra, neʼebé ohin temi ona, tenke halai ba nasaun seluk hamutuk ho ninia biin tanba funu. Nia hatete: “Kuandu ami liu fronteira, ami haree kedas Testemuña ba Jeová neʼebé hein hela ami. Sira ajuda ami atu sai toman ho ami-nia moris nuʼudar refujiadu.”
Ami konvida Ita atu asiste ami-nia reuniaun hodi aprende Bíblia nia mensajen kona-ba dame no oinsá atu aplika ida-neʼe. Loke jw.org atu hetan Reuniaun-Fatin iha Ita-nia área ka husu kursu Bíblia interativu neʼebé gratuitu ho Testemuña ba Jeová ida hodi uza publikasaun Moris Haksolok ba Nafatin.