Oinsá Jeová ajuda ita atu tahan

1. Tanbasá ita presiza tahan, no sé mak bele ajuda ita? (1 Pedro 5:10)

DURANTE loron ikus sira, Jeová nia povu presiza tahan hasoru susar oioin. Ema balu tahan moras ba tempu kleur. Balu fali tahan tanba ema neʼebé sira hadomi mate. Ema balu tan tahan hasoru ema neʼebé kontra, karik husi família ka governu. (Mt 10:​18, 36, 37) Maibé, fiar bá katak maski Ita hasoru susar naran deʼit, Jeová bele ajuda Ita tahan.—Lee 1 Pedro 5:10.

2. Tanbasá ita bele tahan?

² Tahan signifika katak nafatin laran-metin ba Jeová no iha esperansa katak buat hotu sei sai diʼak maski hasoru susar, tentasaun, ka ema fó-terus. Ita bele tahan laʼós ho ita-nia kbiit rasik, maibé tanba Jeová mak fó ita “kbiit neʼebé la hanesan baibain”. (2 Kor 4:7) Iha lisaun neʼe, ita sei koʼalia kona-ba buat haat neʼebé Jeová fó atu ajuda ita tahan. Ita mós sei haree oinsá ita bele hetan benefísiu husi buat sira-neʼe.

ORASAUN

3. Tanbasá ita bele dehan katak orasaun mak hanesan milagre ida?

³ Jeová halo buat kmanek ida atu ajuda ita tahan. Nia konvida ita atu komunika ho nia maski ita sala-naʼin. (Ebr 4:16) Hanoin toʼok: Ita bele halo orasaun ba Jeová kona-ba buat naran deʼit no iha tempu naran deʼit. Nia bele rona ita iha língua naran deʼit no iha fatin naran deʼit, maski ita iha fatin izoladu ka iha prizaun. (Jonas 2:​1, 2; Após 16:​25, 26) Bainhira ita laran-taridu tebes no la hatene atu koʼalia saida, Jeová nafatin komprende saida mak ita hakarak koʼalia. (Rom 8:​26, 27) Sin, orasaun mak hanesan milagre ida!

4. Tanbasá ita bele fiar katak bainhira ita husu Jeová ajuda ita tahan, nia sei ajuda ita?

⁴ Liuhusi Bíblia, Jeová fó sai katak “nia rona buat naran deʼit neʼebé ita husu”. (1 João 5:14) Ita bele husu Jeová atu ajuda ita tahan ka lae? Bele! Tanba neʼe mak tuir ninia hakarak. Tanbasá ita bele dehan nuneʼe? Bainhira ita tahan susar, Jeová bele hatán ba Satanás neʼebé koʼalia aat Nia. (Prov 27:11) Liután neʼe, Bíblia dehan katak Jeová hakarak “hatudu ninia kbiit hodi salva ninia atan sira neʼebé laran-metin ba nia”. (2 Krón 16:9) Tan neʼe, ita bele fiar katak Jeová iha kbiit no hakarak atu ajuda ita tahan.—Isa 30:18; 41:10; Lc 11:13.

5. Oinsá mak orasaun bele ajuda ita sente dame? (Isaias 26:3)

⁵ Bíblia hatete katak bainhira ita halo orasaun ho laran, ‘Maromak nia dame neʼebé aas liu ema nia hanoin hotu sei proteje ita-nia laran no ita-nia kbiit atu hanoin’. (Flp 4:7) Hanoin toʼok, ema neʼebé la serbí Jeová mós hasoru susar, no sira barak uza dalan oioin atu bele sente dame iha laran. Porezemplu, ema balu koko atu halo mamuk sira-nia neon atu bele sente kalma. Maibé neʼe perigu tanba bele fó oportunidade ba anju aat atu kontrola sira-nia hanoin. (Kompara ho Mateus 12:​43-45.) No maski sira sente dame tanba uza dalan hanesan neʼe, maibé dame neʼebé mai husi Jeová mak diʼak liu hotu. Bainhira ita halo orasaun ba Jeová, ita hatudu katak ita tau fiar tomak ba nia no nia sei kontinua fó dame mai ita. (Lee Isaias 26:3.) Dalan ida neʼebé Jeová uza atu fó ita dame mak hodi ajuda ita hanoin-hetan eskritura sira neʼebé fó kmaan mai ita. Eskritura sira-neʼe fó-hanoin ita oinsá Jeová hadomi ita no hakarak ajuda ita, no neʼe halo ita sente dame.—Sal 62:​1, 2.

6. Saida mak Ita bele halo atu hetan benefísiu husi orasaun? (Haree mós foto.)

⁶ Saida mak Ita bele halo. Kuandu hasoru susar, ‘entrega Ita-nia laran-susar ba Jeová’ no husu nia atu fó Ita dame. (Sal 55:22) Husu mós matenek neʼebé Ita presiza hodi bele tahan. (Prov 2:​10, 11) Ita mós labele haluha atu fó agradese ba Jeová. (Flp 4:6) Hanoin kona-ba oinsá loroloron nia ajuda Ita tahan, no hatoʼo obrigadu ba buat diʼak neʼebé nia fó ba Ita. Keta husik Ita-nia susar hanetik Ita atu haree bensaun sira neʼebé Ita simu ona.—Sal 16:​5, 6.

MAROMAK NIA LIAFUAN

7. Oinsá mak estuda Bíblia bele ajuda ita tahan?

⁷ Jeová fó ninia Liafuan atu ajuda ita tahan. Ita bele hetan eskritura barak neʼebé hatudu katak Jeová apoia ita. Hanoin toʼok ezemplu ida. Iha Mateus 6:​8, Jesus hatete: “Imi-nia Aman hatene saida mak imi presiza antes imi husu ba nia.” Jesus hatene Jeová diʼak liu fali ema seluk. Tan neʼe, ita bele fiar katak bainhira hasoru susar, Jeová hatene buat neʼebé ita presiza no nia sei ajuda ita. Bíblia fó sai promesa oioin husi Jeová neʼebé bele fó ita kbiit atu tahan hasoru susar.—Sal 94:19.

8. (a) Fó toʼok ezemplu kona-ba Bíblia nia prinsípiu neʼebé bele ajuda ita. (b) Saida mak bele ajuda ita atu hanoin-hetan Bíblia nia prinsípiu sira bainhira ita presiza?

⁸ Bíblia nia prinsípiu sira bele ajuda ita tahan. Prinsípiu sira-neʼe bele fó ita matenek neʼebé ita presiza atu halo desizaun neʼebé diʼak. (Prov 2:​6, 7) Porezemplu, Bíblia anima ita atu labele hanoin demais kona-ba loron aban, maibé sadere ba Jeová loroloron. (Mt 6:34) Se ita iha toman atu lee Bíblia no hanoin kleʼan, neʼe sei halo fasil ba ita atu hanoin-hetan Bíblia nia prinsípiu sira bainhira ita presiza halo desizaun ruma ka tahan hasoru susar.

9. Oinsá mak istória sira iha Bíblia bele hametin ita-nia fiar ba Jeová?

⁹ Bíblia mós konta istória kona-ba ema baibain hanesan ita neʼebé tau fiar ba Jeová no simu ajuda husi Nia. (Ebr 11:​32-34; Tgo 5:17) Bainhira hanoin didiʼak kona-ba istória sira-neʼe, neʼe bele hametin ita-nia fiar katak Jeová mak “ita-nia fatin protesaun no ita-nia kbiit, ita sempre hetan ajuda husi nia iha tempu susar”. (Sal 46:1) Nuʼudar ita hanoin kona-ba fiar-naʼin sira iha tempu uluk neʼebé serbí Jeová ho laran-metin, neʼe book ita atu banati-tuir sira-nia fiar no kontinua tahan hanesan sira.—Tgo 5:​10, 11.

10. Saida mak Ita bele halo atu hetan benefísiu husi Maromak nia Liafuan?

¹⁰ Saida mak Ita bele halo. Lee Bíblia loroloron, no halo lista ba eskritura sira neʼebé bele ajuda Ita. Ema barak mós hetan benefísiu hodi lee eskritura loroloron nian iha dadeer, tanba neʼe ajuda sira atu hanoin-hetan kona-ba pontu neʼebé anima sira iha loron neʼe. Irmán ida naran Mariaa sente nuneʼe duni bainhira ninia inan-aman kona moras kankru. Maria hatete: “Dadeer-dadeer haʼu lee eskritura loroloron nian no hanoin kleʼan. Toman neʼe ajuda haʼu atu hanoin kona-ba Jeová no ninia hanorin furak sira duké fokus deʼit ba haʼu-nia an no problema sira.”—Sal 61:2.

MALUK FIAR-NAʼIN SIRA

11. Ita sente oinsá hodi hatene katak ita-nia irmaun-irmán sira mós tahan hasoru susar?

¹¹ Jeová fó ita maluk fiar-naʼin sira atu ajuda ita tahan. Hodi hatene katak ‘ita-nia maluk fiar-naʼin iha mundu tomak mós tahan terus neʼebé hanesan ita-nian’, neʼe hametin ita katak ita la mesak. (1 Ped 5:9) Loos duni, irmaun-irmán sira mós hasoru susar no sira kontinua tahan. Neʼe katak ita mós bele tahan!—Após 14:22.

12. Oinsá mak maluk fiar-naʼin sira bele ajuda ita, no saida mak ita bele halo ba sira? (2 Korinto 1:​3, 4)

¹² Nuʼudar ita tahan, ita-nia maluk fiar-naʼin sira bele enkoraja ita. Neʼe mak buat neʼebé akontese ba apóstolu Paulo. Iha ninia karta, nia fó agradese ba maluk sira hodi temi sira-nia naran tanba ajuda ona nia kuandu nia sai dadur iha uma. Sira fó kmaan, korajen, no tau matan ba Paulo nia presiza. (Flp 2:​25, 29, 30; Kol 4:​10, 11) Nuneʼe mós ho ita ohin loron. Bainhira ita presiza ajuda atu tahan, irmaun-irmán sira prontu ajuda ita. No bainhira sira presiza ita-nia apoiu, ita mós prontu apoia sira.—Lee 2 Korinto 1:​3, 4.

13. Saida mak ajuda irmán Maya atu tahan?

¹³ Irmán Maya iha Rúsia hetan duni kmaan husi irmaun-irmán sira. Iha tinan 2020, polísia tama ninia uma atu pasa-revista. Tuirmai, nia tenke defende an iha tribunál tanba nia fahe ninia fiar ba ema seluk. Maya hatete: “Durante tempu neʼebá, haʼu sente kole, hanoin barak, no triste. Maibé irmaun-irmán sira telefone no hakerek karta hodi fó sai sira-nia domin mai haʼu. Tuir loloos, haʼu hatene katak irmaun-irmán sira hadomi haʼu no sira mak haʼu-nia família. Maibé husi tinan 2020, haʼu bele sente duni ida-neʼe.”

14. Saida mak Ita bele halo atu hetan benefísiu husi maluk fiar-naʼin sira? (Haree mós foto.)

¹⁴ Saida mak Ita bele halo. Nuʼudar Ita tahan hasoru susar, importante atu kontinua hakbesik ba irmaun-irmán sira. Keta dada an atu husu ajuda husi katuas sira. Sira bele sai hanesan “subar-fatin husi anin, no fatin mahon husi udan boot”. (Isa 32:2) Hanoin-hetan katak irmaun-irmán sira mós hasoru susar. Hodi halo buat diʼak ba sira neʼebé presiza ajuda, neʼe sei halo Ita sente kontente no ajuda Ita atu tahan Ita-nia susar.—Após 20:35.

ESPERANSA KONA-BA FUTURU

15. Oinsá mak esperansa ajuda ona Jesus no mós ita? (Ebreu 12:2)

¹⁵ Jeová fó ita esperansa neʼebé metin atu ajuda ita tahan. (Rom 15:13) Hanoin toʼok oinsá esperansa ajuda Jesus atu tahan hasoru situasaun neʼebé susar liu hotu kuandu nia iha rai. (Lee Ebreu 12:2.) Jesus hatene katak ninia laran-metin bele halo santu Jeová nia naran. Jesus mós hein namanas atu hamutuk fali ho ninia Aman iha lalehan no ikusmai ukun hamutuk ho ema naʼin-144.000. Nuneʼe mós, ita-nia esperansa atu moris ba nafatin iha mundu foun ajuda ita atu tahan susar naran deʼit neʼebé ita hasoru iha Satanás nia mundu.

16. Oinsá mak esperansa ajuda irmán Alla atu tahan, no saida mak Ita aprende husi ninia liafuan?

¹⁶ Hanoin toʼok oinsá esperansa kona-ba Maromak nia Ukun ajuda irmán Alla iha Rúsia. Polísia kaer ninia laʼen no hatama ba komarka hodi hein ba julgamentu. Alla hatete: “Hodi halo orasaun kona-ba ita-nia esperansa no hanoin kleʼan kona-ba neʼe ajuda haʼu atu la sente laran-kraik demais. Haʼu hatene katak ikusmai buat diʼak sei akontese. Jeová sei manán no fó kolen mai ita.”

17. Oinsá mak ita bele hatudu katak ita hafolin esperansa neʼebé Jeová fó mai ita? (Haree mós foto.)

¹⁷ Saida mak Ita bele halo. Uza tempu atu hanoin didiʼak kona-ba futuru kapás neʼebé Jeová promete. Imajina Ita-nia an iha mundu foun no bensaun barak neʼebé Ita sei simu. Neʼe sei ajuda Ita atu haree susar neʼebé Ita hasoru mak “ba tempu uitoan deʼit no kmaan”. (2 Kor 4:17) No mós, hakaʼas an atu fahe ba ema seluk kona-ba Maromak nia promesa. Hanoin toʼok kona-ba ema neʼebé la serbí Jeová. Sira mós hasoru susar oioin, maibé sira la hatene kona-ba buat furak oioin neʼebé Jeová promete ona. Tan neʼe, ita hakarak dada sira-nia atensaun ba esperansa husi Maromak nia Ukun maski neʼe mak ho liafuan badak deʼit.

18. Tanbasá ita bele tau fiar ba Jeová nia promesa?

¹⁸ Depois tahan tiha susar barak, Job hatete ba Jeová: “Agora haʼu hatene ona katak Ita-Boot bele halo buat hotu-hotu no la iha buat ida mak bele hanetik Ita atu halo buat neʼebé Ita hakarak.” (Job 42:2) Job aprende katak la iha buat ida mak bele hapara Jeová atu kumpre Ninia hakarak. Lia-loos neʼe bele fó kbiit mai ita atu tahan. Porezemplu, imajina toʼok kona-ba feto ida neʼebé moras todan. Nia bá hasoru doutór oioin, maibé sira labele kura ninia moras. Maibé, ikusmai nia hasoru doutór neʼebé hatene kona-ba ninia moras no oinsá atu halo tratamentu ba nia. Feto neʼe kontente kedas maski presiza hein ba tempu balu atu sai diʼak. Agora nia bele tahan tanba iha duni esperansa katak ninia moras sei sai diʼak. Nuneʼe mós, ita-nia esperansa kona-ba mundu foun bele ajuda ita tahan.

19. Saida mak ita presiza halo atu bele tahan?

¹⁹ Hanesan ita aprende ona, Jeová ajuda ita atu tahan ita-nia susar sira liuhusi orasaun, ninia Liafuan, maluk fiar-naʼin, no esperansa kona-ba futuru. Se ita aproveita didiʼak buat sira-neʼe, Jeová sei ajuda ita tahan hasoru susar naran deʼit toʼo tempu neʼebé Satanás nia mundu aat neʼe no susar hotu lakon.—Flp 4:13.