LISAUN ESTUDU 33
KNANANUK 4 “Jeová mak haʼu-nia Bibi-Atan”
Fiar bá katak Jeová hadomi Ita
“Haʼu dada ó besik mai haʼu ho domin neʼebé laran-metin.”—JER 31:3.
OBJETIVU
Aprende tanbasá importante atu fiar katak Jeová hadomi ita, no saida mak ita bele halo atu fiar liután kona-ba neʼe.
1. Tanbasá Ita dedika an ba Jeová? (Haree mós foto.)
ITA hanoin-hetan ka lae tempu neʼebé Ita dedika an ba Jeová? Ita halo desizaun neʼe tanba Ita komesa koñese nia no hadomi nia. Ita promete katak Ita sei tau uluk ninia hakarak iha Ita-nia moris no sei kontinua hadomi nia ho Ita-nia laran tomak, moris tomak, neon tomak, no kbiit tomak. (Mc 12:30) Husi tempu neʼebá, Ita-nia domin ba nia sai buras ba beibeik. Se ema ida husu Ita: “Ó hadomi duni Jeová ka lae?”, Ita sei hatán ho fiar an: “Haʼu hadomi Jeová liu fali buat hotu!”
Ita hanoin-hetan ka lae domin neʼebé Ita sente ba Jeová bainhira Ita dedika an no hetan batizmu? (Haree parágrafu 1)
2-3. Jeová hakarak ita atu fiar saida, no iha lisaun neʼe ita sei aprende kona-ba saida? (Jeremias 31:3)
2 Maibé, oinsá se ema husu: “Ó fiar duni katak Jeová hadomi ó?” Karik Ita dada an atu hatán ba pergunta neʼe tanba sente katak Ita la merese simu ninia domin. Irmán ida neʼebé la sente domin husi kiʼik hatete: “Haʼu hadomi Jeová no la duvida kona-ba neʼe. Maibé dala barak haʼu hanoin: ‘Jeová hadomi haʼu ka lae?’” Entaun, saida mak bele ajuda Ita atu hatene kona-ba Jeová nia sentimentu ba Ita?
3 Jeová hakarak Ita atu fiar katak nia hadomi Ita. (Lee Jeremias 31:3.) Tuir loloos, Jeová mak dada Ita atu hakbesik ba nia. Bainhira Ita dedika an ba nia no hetan batizmu, Ita simu prezente neʼebé folin-boot, neʼe mak ninia domin neʼebé laran-metin. Neʼe katak nia hadomi tebes Ita no nunka husik hela Ita. Domin neʼe book nia atu haree ninia atan sira neʼebé laran-metin, inklui Ita, nuʼudar ‘rikusoin neʼebé nia hafolin tebes’. (Mal 3:17, nota) Jeová hakarak Ita atu sente hanesan apóstolu Paulo neʼebé hatete: “Haʼu fiar duni katak mate ka moris, anju ka governu sira, buat neʼebé iha agora ka buat neʼebé atu mai ka kbiit, aas ka kleʼan, ka kriasaun sira seluk sei labele haketak ita husi Maromak nia domin.” (Rom 8:38, 39) Iha lisaun neʼe, ita sei aprende kona-ba tanbasá ita presiza hametin ita-nia fiar katak Jeová hadomi ita no saida mak bele ajuda ita atu fiar liután kona-ba neʼe.
TANBASÁ ITA PRESIZA FIAR KATAK JEOVÁ HADOMI ITA?
4. Saida mak Satanás nia lasu ida, no oinsá ita bele kontra hasoru ida-neʼe?
4 Hodi fiar katak Jeová hadomi ita, ita bele kontra hasoru Satanás nia “lasu” ida. (Éf 6:11) Satanás sei halo buat naran deʼit atu hanetik ita serbí Jeová. Satanás nia lasu ida mak habelar lia-bosok katak Jeová la hadomi ita. Bíblia kompara Satanás hanesan leaun. (1 Ped 5:8, 9) Baibain leaun ataka animál neʼebé fraku ka labele defende an. Satanás mós ataka ita bainhira ita fraku, kole, ka triste tanba ita-nia pasadu neʼebé la diʼak, hasoru daudaun problema, ka hanoin barak kona-ba futuru. (Prov 24:10) Satanás koko makaʼas atu halo ita fraku liután toʼo rende an atu serbí Jeová. Maibé ita bele “kontra hasoru” Satanás no ninia lasu sira hodi hametin ita-nia fiar katak Jeová hadomi ita.—Tgo 4:7.
5. Tanbasá importante atu sente katak Jeová hadomi ita?
5 Hodi fiar katak Jeová hadomi ita, ita bele hakbesik liután ba nia. Tanbasá ita bele dehan nuneʼe? Jeová kria ita ho hakarak atu hatudu domin no simu domin. Bainhira ema ida hatudu domin mai ita, neʼe motiva ita atu hatudu fali domin ba nia. Tan neʼe, bainhira ita sente katak Jeová hadomi ita, neʼe book ita atu hadomi fali nia. (1 João 4:19) No kuandu ita-nia domin ba nia sai metin liután, nia mós sei hadomi ita liután. Bíblia hatete: “Hakbesik ba Maromak, no nia sei hakbesik ba imi.” (Tgo 4:8) Maibé, oinsá mak ita bele hametin ita-nia fiar katak Jeová hadomi ita?
SAIDA MAK AJUDA ITA ATU FIAR KATAK JEOVÁ HADOMI ITA?
6. Atu fiar katak Jeová hadomi ita, ita presiza halo orasaun kona-ba saida?
6 Kontinua halo orasaun neʼebé espesífiku. (Lc 18:1; Rom 12:12) Karik Ita presiza halo orasaun ba Jeová dala barak iha loron ida-idak atu ajuda Ita hatene Jeová nia sentimentu kona-ba Ita. Dala ruma, Ita fó-sala demais ba Ita-nia an no neʼe halo susar ba Ita atu fiar katak Jeová hadomi Ita. Maibé, hanoin-hetan katak Jeová mak boot liu fali Ita-nia laran. (1 João 3:19, 20) Nia hatene Ita diʼak liu fali Ita-nia an, no nia haree buat neʼebé Ita la haree. (1 Sam 16:7; 2 Krón 6:30) Tan neʼe, keta dada an atu “fakar sai” Ita-nia sentimentu ba nia, no husu nia ajuda Ita atu fiar katak nia hadomi Ita. (Sal 62:8) Depois halo tiha orasaun, importante atu halo tuir hakat tuirmai.
7-8. Oinsá mak livru Salmo ajuda ita fiar katak Jeová hadomi ita?
7 Tau fiar ba Jeová nia liafuan. Jeová mak dirije ema atu hakerek Bíblia, tan neʼe ita bele fiar buat neʼebé Bíblia hatete kona-ba Jeová. Porezemplu, iha livru Salmo, David hakerek: “Jeová besik ema sira neʼebé laran-kanek; nia salva sira neʼebé laran-triste.” (Sal 34:18) Bainhira Ita triste, karik Ita hanoin katak la iha ida mak komprende Ita. Maibé Jeová promete katak nia sei besik ho Ita, tanba hatene katak Ita presiza tebes nia. David mós hakerek: “Halibur haʼu-nia matan-been sira iha Ita-nia bee-fatin husi animál kulit.” (Sal 56:8) Jeová haree bainhira Ita hasoru susar, no nia hanoin tebes Ita. Hanesan ema neʼebé laʼo iha rai-fuik maran hafolin tebes bee neʼebé nia lori iha bee-fatin, Jeová mós hafolin Ita-nia matan-been no hanoin-hetan tempu ida-idak neʼebé Ita tanis. Salmo 139:3 hatete: “Ita [Jeová] hatene ho didiʼak haʼu-nia dalan sira hotu.” Jeová haree ba Ita-nia dalan hotu, maibé nia fokus ba buat diʼak neʼebé Ita halo. (Ebr 6:10) Tanbasá? Tanba nia hafolin Ita-nia hakaʼas an hotu atu halo nia kontente.a
8 Liuhusi eskritura sira hanesan neʼe, Jeová hakarak hatete: “Haʼu hakarak ó hatene katak haʼu hadomi tebes ó no hanoin tebes ó.” Maibé hanesan ita aprende ona, Satanás hakarak ita fiar katak Jeová la hadomi Ita. Tan neʼe, se Ita duvida kona-ba Jeová nia domin, husu Ita-nia an: ‘Haʼu sei fiar ba sé, “lia-bosok nia aman” ka “Maromak lia-loos nian”?’—João 8:44; Sal 31:5.
9. Jeová promete saida ba ema neʼebé hadomi nia? (Éxodo 20:5, 6)
9 Hanoin kona-ba Jeová nia sentimentu ba ema neʼebé hadomi nia. Haree toʼok saida mak Jeová hatete ba Moisés no povu Izraél. (Lee Éxodo 20:5, 6.) Jeová promete katak nia sei nunka haluha atu hatudu domin neʼebé laran-metin ba ema neʼebé hadomi nia. (Neem 1:5) Tan neʼe, se Ita komesa hanoin katak Jeová la hadomi Ita, husu Ita-nia an: ‘Haʼu hadomi Jeová ka lae?’ Se Ita hadomi nia no hakaʼas an atu halo nia kontente, Ita bele fiar katak nia mós hadomi tebes Ita. (Dan 9:4; 1 Kor 8:3) Se Ita la duvida kona-ba Ita-nia domin ba Jeová, Ita mós la presiza duvida kona-ba ninia domin ba Ita. Ita bele fiar katak nia hadomi Ita no nunka husik hela Ita.
10-11. Jeová hakarak Ita haree Jesus nia sakrifísiu iha dalan oinsá? (Galásia 2:20)
10 Hanoin kleʼan kona-ba Jesus nia sakrifísiu. Neʼe mak prezente folin-boot liu neʼebé Jeová fó ba ema hotu. (João 3:16) Maibé prezente neʼe mak ba Ita rasik ka lae? Sin! Hanoin toʼok kona-ba apóstolu Paulo. Antes sai ema Kristaun, nia halo sala sériu balu, no nia mós presiza kontinua kontra hasoru ninia fraku. (Rom 7:24, 25; 1 Tim 1:12-14) Maski nuneʼe, Paulo fiar metin katak Jesus nia sakrifísiu mak prezente neʼebé Jeová fó ba nia. (Lee Galásia 2:20.) Hanoin-hetan katak Jeová mak dirije Paulo atu hakerek liafuan sira-neʼe. Tan neʼe, Jeová hakarak ita atu aprende husi buat neʼebé Paulo hakerek. (Rom 15:4) Paulo nia liafuan hatudu katak Jeová hakarak Ita atu haree Jesus nia sakrifísiu nuʼudar prezente ba Ita rasik. Bainhira Ita halo nuneʼe, neʼe sei hametin Ita-nia fiar katak Jeová hadomi Ita nuʼudar individuál.
11 Ita agradese ba Jeová tanba haruka Jesus mai mundu atu mate ba ita. Maibé, razaun seluk tanbasá Jesus mai mundu mak atu haklaken lia-loos kona-ba Maromak. (João 18:37) Jesus mós hanorin lia-loos kona-ba oinsá Jeová hadomi tebes ita, ninia oan sira.
OINSÁ MAK JESUS AJUDA ITA FIAR KATAK JEOVÁ HADOMI ITA?
12. Tanbasá ita bele tau fiar ba buat neʼebé Jesus hatete kona-ba Jeová?
12 Bainhira iha rai, Jesus gosta hanorin kona-ba Jeová. (Lc 10:22) No ita iha razaun diʼak atu tau fiar ba buat neʼebé Jesus hatete kona-ba Jeová. Loloos antes Jesus mai mundu, nia hamutuk ona ho Jeová ba tempu naruk tebes. (Kol 1:15) Jesus hatene oinsá ninia Aman hadomi nia, no nia mós haree oinsá Aman hatudu domin ba ninia oan sira hotu neʼebé laran-metin. Oinsá mak Jesus ajuda ita fiar katak Jeová hadomi ita?
13. Jesus hakarak ita atu hatene saida kona-ba Jeová?
13 Jesus hakarak ita hatene oinsá Jeová sente kona-ba ita. Iha Evanjellu haat, Jesus temi Jeová nuʼudar “Aman” ba dala 160 liu. No bainhira koʼalia ba dixípulu sira, Jesus uza beibeik liafuan “imi-nia Aman” ka “imi-nia Aman iha lalehan”. (Mt 5:16; 6:26) Antes Jesus mai mundu, Jeová nia atan sira temi Jeová ho títulu oioin, hanesan “Maromak neʼebé Kbiit Boot Liu Hotu”, “Maromak neʼebé Aas Liu Hotu”, no “Kriadór Boot”. Maibé, dala barak Jesus temi Jeová nuʼudar “Aman”. Hodi halo nuneʼe, Jesus hanorin katak Jeová hadomi ita hanesan aman hadomi oan. Mai ita aprende kona-ba ezemplu rua bainhira Jesus uza liafuan “Aman”.
14. Oinsá mak Jesus hatudu katak ita ida-idak mak folin-boot ba ita-nia Aman iha lalehan? (Mateus 10:29-31) (Haree mós dezeñu.)
14 Primeiru, mai ita haree Jesus nia liafuan iha Mateus 10:29-31. (Lee.) Jeová hatene didiʼak manu-liin ida-idak maski sira mak kiʼik no la hadomi ka adora nia. Se Jeová hafolin no hatene bainhira sira ida monu ba rai, ita bele fiar katak Jeová hafolin tebes ita ida-idak neʼebé hadomi no adora nia! Jesus mós hatete katak ita-nia Aman sura ita-nia fuuk-lahan hotu. Tanba Jeová hatene buat hotu kona-ba ita maski neʼe mak kiʼik deʼit, ita bele fiar metin katak nia interese tebes ho ita. Sin, Jesus hakarak ita atu fiar katak ita ida-idak mak folin-boot ba ita-nia Aman iha lalehan.
Se Jeová hafolin manu-liin ida-idak no hatene bainhira sira ida monu ba rai, ita bele fiar katak Jeová hafolin tebes ita ida-idak neʼebé hadomi no adora nia! (Haree parágrafu 14)
15. Jesus nia liafuan iha João 6:44 hanorin saida mai Ita kona-ba Ita-nia Aman iha lalehan?
15 Haree toʼok ezemplu segundu bainhira Jesus uza liafuan “Aman”. (Lee João 6:44.) Ita-nia Aman iha lalehan mak dada Ita atu hakbesik ba nia. Tanbasá nia dada Ita? Tanba nia haree buat neʼebé diʼak iha Ita-nia laran. (Após 13:48) Bainhira Jesus temi liafuan iha João 6:44, karik nia refere ba Jeová nia liafuan husi eskritura tema ba lisaun neʼe, neʼebé dehan: “Haʼu dada ó besik mai haʼu ho domin neʼebé laran-metin [ka, haʼu kontinua hatudu domin neʼebé laran-metin ba ó].” (Jer 31:3, nota; kompara ho Oseias 11:4.) Neʼe katak sá? Ita-nia Aman iha lalehan kontinua haree ba buat diʼak husi Ita maski Ita rasik la haree.
16. (a) Jesus hakarak hatete saida mai ita, no tanbasá ita presiza tau fiar ba nia? (b) Saida mak bele ajuda Ita atu fiar katak Jeová mak Ita-nia Aman neʼebé diʼak liu? (Haree kaixa “Aman neʼebé ita hotu presiza”.)
16 Hodi temi Jeová nuʼudar ita-nia Aman, Jesus hakarak hatete mai ita: “Jeová laʼós deʼit haʼu-nia Aman, maibé mós ó-nia Aman. No haʼu hakarak ó fiar katak nia hadomi ó no hanoin tebes ó.” Tan neʼe, bainhira Ita duvida katak Jeová hadomi Ita, hanoin-hetan buat neʼebé Jesus hatete no tau fiar ba nia, tanba nia sempre koʼalia buat neʼebé loos no nia mak hatene ita-nia Aman diʼak liu fali ita.—1 Ped 2:22.
KONTINUA HAMETIN ITA-NIA FIAR
17. Tanbasá ita tenke kontinua hametin ita-nia fiar katak Jeová hadomi ita?
17 Ita presiza kontinua hametin ita-nia fiar katak Jeová hadomi ita. Hanesan ita aprende ona, Satanás koko makaʼas atu halo ita rende an. Atu kumpre ida-neʼe, Satanás hakaʼas an atu halo ita fraku no fiar katak Jeová la hadomi ita. Ita labele husik Satanás manán!—Job 27:5.
18. Oinsá mak Ita bele hametin Ita-nia fiar katak Jeová hadomi Ita?
18 Atu hametin Ita-nia fiar katak Jeová hadomi Ita, Ita presiza kontinua halo orasaun atu haree Ita-nia an hanesan Jeová haree Ita. Hanoin kleʼan eskritura sira neʼebé fó sai Jeová nia domin. Hanoin-hetan katak Jeová sempre hadomi ema neʼebé hadomi nia. Keta haluha katak Jeová fó ninia oan nuʼudar sakrifísiu ba Ita rasik. Tau fiar ba Jesus nia liafuan katak Jeová mak Ita-nia Aman. Tuirmai se ema husu: “Ó fiar duni katak Jeová hadomi ó?”, Ita sei hatán ho fiar an: “Sin, nia hadomi haʼu! No haʼu hakaʼas an loroloron atu hatudu domin ba nia!”
KNANANUK 154 Domin nunka lakon