Maromak nia domin iha ba nafatin

1-2. Bainhira hasoru problema, ema Kristaun barak sente oinsá?

IMAJINA toʼok ró neʼebé iha tasi klaran ho anin neʼebé boot. Laloran boot baku ró neʼe bá-mai. Ró neʼe sei bá fatin naran deʼit neʼebé anin neʼe lori, só deʼit kuandu ema ida hatún ankor atu ró neʼe estavel no la bá fatin dook.

² Bainhira hasoru problema neʼebé boot, karik Ita sente hanesan ró neʼe. Ita-nia emosaun bele tun-saʼe. Loron ida Ita sente katak Jeová hadomi no ajuda Ita, maibé loron tuirmai, Ita hanoin katak nia la haree buat neʼebé akontese ba Ita. (Sal 10:1; 13:1) Karik belun ida koʼalia liafuan neʼebé halo Ita sente kmaan ba tempu uitoan. (Prov 17:17; 25:11) Maibé lakleur deʼit, Ita komesa duvida fali katak Jeová la hadomi Ita. Saida mak bele sai nuʼudar ankor kuandu Ita sente hanesan neʼe? Oinsá Ita bele nafatin fiar katak Jeová sei hadomi no ajuda Ita?

3. (a)Liafuan “domin neʼebé laran-metin” iha Salmo 31:7 no 136:1 fó ideia saida? (b)Tanbasá Jeová mak ezemplu neʼebé diʼak liu hotu kona-ba neʼe? (Haree mós dezeñu.)

³ Bainhira Ita hasoru susar, buat ida neʼebé bele sai nuʼudar ankor mak hodi hanoin-hetan Jeová nia domin neʼebé laran-metin. (Lee Salmo 31:7; 136:1.) Liafuan “domin neʼebé laran-metin” fó ideia kona-ba sentimentu neʼebé kleʼan no dura. Jeová mak ezemplu neʼebé diʼak liu hotu kona-ba domin neʼebé laran-metin. Tuir loloos, Bíblia temi katak Jeová “nakonu ho domin neʼebé laran-metin”. (Éx 34:​6, 7) Bíblia mós hatete kona-ba Jeová: “Ita nakonu ho domin neʼebé laran-metin ba ema hotu neʼebé bolu Ita.” (Sal 86:5) Neʼe katak Jeová nunka husik hela ninia atan neʼebé laran-metin! Hodi hanoin kona-ba Jeová nia laran-metin bele sai nuʼudar ankor bainhira Ita hasoru susar.—Sal 23:4.

HAREE JEOVÁ NIA DOMIN NUʼUDAR HANORIN BÁZIKU HUSI BÍBLIA

4. Fó toʼok ezemplu balu kona-ba hanorin báziku husi Bíblia, no esplika tanbasá ita fiar metin ba hanorin sira-neʼe.

⁴ Hodi haree Jeová nia domin nuʼudar hanorin báziku husi Bíblia sei ajuda Ita hametin Ita-nia fiar katak Jeová hadomi Ita. Liafuan “hanorin báziku husi Bíblia” katak sá? Karik Ita hanoin kona-ba lia-loos neʼebé Ita aprende ona husi Bíblia, porezemplu Maromak nia naran mak Jeová, Jesus mak Maromak nia Oan-Mane mesak, ema mate la hatene buat ida, no ema sei moris ba nafatin iha mundu paraízu. (Sal 83:18; Ecle 9:5; João 3:16; Apok 21:​3, 4) Bainhira Ita simu hanorin sira-neʼe nuʼudar lia-loos, Ita sei la husik ema ida troka Ita-nia hanoin. Tanbasá? Tanba Ita hatene katak hanorin sira-neʼe bazeia ba faktu sira. Mai ita haree oinsá hanorin báziku husi Bíblia kona-ba Jeová nia domin bele ajuda Ita atu halakon Ita-nia dúvida katak Jeová la hanoin Ita ka la interese kona-ba susar neʼebé Ita hasoru.

5. Esplika toʼok saida mak ajuda ema ida atu la simu tan hanorin falsu.

⁵ Bainhira Ita foin estuda Bíblia, saida mak ajuda Ita atu la simu tan hanorin falsu? Karik, Ita halo ida-neʼe hodi kompara Bíblia nia hanorin ho Ita-nia relijiaun nia hanorin. Haree toʼok ezemplu ida: Karik uluk Ita fiar katak Jesus mak Maromak Kbiit Boot Liu Hotu. Maibé nuʼudar Ita estuda Bíblia, karik Ita husu ba Ita-nia an: ‘Hanorin neʼe loos ka lae?’ Depois estuda tiha Bíblia, Ita foin hatene katak hanorin neʼe la loos. Tuirmai Ita troka hanorin falsu neʼe ho lia-loos husi Bíblia katak Jesus mak “oan primeiru husi kriasaun hotu”, no “Maromak nia Oan-Mane mesak”. (Kol 1:15; João 3:18) Klaru katak hanorin falsu bele sai “metin hanesan moru” no susar atu sobu rahun. (2 Kor 10:​4, 5) Maibé depois aprende tiha lia-loos, Ita sei la fila fali ba hanorin falsu neʼebé Ita husik ona.—Flp 3:13.

6. Tanbasá Ita bele fiar katak Jeová nia “domin neʼebé laran-metin iha ba nafatin”?

⁶ Ita bele halo buat neʼebé hanesan ho saida mak Bíblia hanorin kona-ba Jeová nia domin. Bainhira hasoru susar, se Ita komesa duvida kona-ba Jeová nia domin, husu ba Ita-nia an: ‘Buat neʼebé haʼu hanoin neʼe loos ka lae?’ Kompara Ita-nia dúvida kona-ba Jeová nia domin ho eskritura tema ba lisaun neʼe husi Salmo 136:1. Tanbasá Jeová fó sai katak ninia domin mak “laran-metin”? Tanbasá liafuan “ninia domin neʼebé laran-metin iha ba nafatin” temi dala 26 iha Salmo 136? Ita aprende ona katak Jeová nia domin neʼebé laran-metin ba ninia povu mak hanorin importante husi Bíblia, hanesan ho hanorin báziku seluk neʼebé Ita fiar ona. Ideia kona-ba Jeová la hafolin Ita ka la hadomi Ita mak bosok. Ita labele simu ideia neʼe, hanesan Ita la simu hanorin falsu seluk!

7. Temi toʼok eskritura ruma neʼebé halo Ita fiar katak Jeová hadomi Ita.

⁷ Bíblia fó evidénsia barak katak Jeová hadomi ita. Porezemplu, Jesus hanorin ninia dixípulu sira: “Imi folin-boot liu fali manu-liin barak.” (Mt 10:31) Jeová rasik mós hatete ba ninia povu: “Haʼu sei hametin ó, sin, haʼu sei ajuda ó, haʼu sei kaer metin ó ho haʼu-nia liman-loos justisa nian.” (Isa 41:10) Liafuan sira-neʼe mak klaru. Jesus la hatete ‘Karik imi folin-boot liu’, no Jeová mós la hatete ‘Karik haʼu sei ajuda ó’. Maibé Jeová no Jesus hatete: “Imi folin-boot liu” no “Haʼu sei ajuda ó”. Bainhira Ita hasoru susar no duvida kona-ba Jeová nia domin, eskritura sira-neʼe laʼós deʼit halo Ita sente diʼak, maibé mós hametin Ita-nia fiar katak Jeová hadomi Ita. Eskritura sira-neʼe mak evidénsia. Se Ita halo orasaun no hanoin kleʼan kona-ba neʼe, Ita bele koʼalia liafuan hanesan temi iha 1 João 4:16: “Ita hatene ona no fiar katak Maromak hadomi ita.”a

8. Saida mak Ita bele halo se dala ruma Ita duvida katak Jeová hadomi Ita?

⁸ Saida mak Ita bele halo se dala ruma Ita duvida katak Jeová hadomi Ita? Kompara buat neʼebé Ita sente no buat neʼebé Ita hatene kona-ba Jeová nia domin. Klaru katak Ita-nia sentimentu bele troka, maibé Bíblia nia hanorin mak faktu ida. Se Ita la fiar katak Jeová hadomi Ita, neʼe hanesan Ita la fiar Bíblia nia hanorin neʼebé dehan: “Maromak mak domin.”—1 João 4:8.

HANOIN KLEʼAN KONA-BA ‘AMAN RASIK HADOMI ITA’

9-10. Jesus hakarak koʼalia kona-ba saida bainhira nia temi liafuan “Aman rasik hadomi imi” iha João 16:​26, 27? (Haree mós foto.)

⁹ Ita bele aprende liután Jeová nia domin hodi hanoin kona-ba Jesus nia liafuan ba ninia dixípulu sira: “Aman rasik hadomi imi.” (Lee João 16:​26, 27.) Jesus koʼalia hanesan neʼe laʼós deʼit atu halo sira sente kmaan, tanba kontestu hatudu katak Jesus laʼós koʼalia kona-ba dixípulu sira-nia sentimentu, maibé nia koʼalia kona-ba halo orasaun.

¹⁰ Jesus foin fó-hatene ninia dixípulu sira katak sira presiza halo orasaun liuhusi nia, laʼós ba nia. (João 16:​23, 24) Importante ba sira atu hatene kona-ba neʼe. Depois Jesus moris hiʼas, karik dixípulu sira sei koko atu halo orasaun ba nia tanba Jesus mak sira-nia belun. Sira bele fó razaun katak tanba Jesus hadomi sira, Jesus sei rona ba sira no sei hatoʼo fali ida-neʼe ba ninia Aman. Maibé, Jesus hatete katak sira labele hanoin hanesan neʼe. Tanbasá? Tanba nia dehan: “Aman rasik hadomi imi.” Lia-loos neʼe mak hanorin báziku kona-ba orasaun. Hanoin toʼok oinsá neʼe kona Ita: Hodi estuda Bíblia, Ita bele hatene Jesus no hadomi nia. (João 14:21) Maibé hanesan Jesus nia dixípulu sira, Ita bele halo orasaun ba Maromak ho fiar metin tanba hatene katak ‘Aman rasik hadomi Ita’. Dala ida-idak neʼebé Ita halo orasaun ba Jeová, Ita hatudu katak Ita fiar liafuan sira-neʼe mak loos.—1 João 5:14.

BUAT NEʼEBÉ BELE HALO ITA DUVIDA

11. Tanbasá mak Satanás kontente se ita duvida kona-ba Jeová nia domin?

¹¹ Saida mak bele halo ita duvida katak Jeová hadomi ita? Karik ita-nia resposta mak Satanás, no neʼe mós loos. Diabu Satanás “buka atu han” ita, no nia hakarak ita duvida kona-ba Jeová nia domin. (1 Ped 5:8) Domin mak book Jeová atu fó Jesus nuʼudar sakrifísiu, maibé Satanás hakarak ita atu sente katak ita la merese simu ida-neʼe. (Ebr 2:9) Tan neʼe, sé mak sei kontente se ita duvida kona-ba Jeová nia domin? Satanás. No sé mak sei kontente se ita rende an toʼo la serbí tan Jeová? Dala ida tan, Satanás. Satanás mak ida neʼebé lakon Jeová nia domin maibé nia hakarak ita hanoin katak Jeová mós la hadomi ita. Neʼe mak “lasu” boot ida neʼebé Satanás uza. (Éf 6:11) Kuandu ita hatene didiʼak saida mak Diabu Satanás koko atu halo, neʼe bele hametin ita-nia hakarak atu “kontra hasoru Diabu”.—Tgo 4:7.

12-13. Oinsá mak ita-nia kondisaun nuʼudar sala-naʼin bele halo ita duvida kona-ba Jeová nia domin?

¹² Iha razaun seluk tan neʼebé bele halo ita duvida kona-ba Jeová nia domin. Neʼe mak ita-nia kondisaun nuʼudar ema sala-naʼin. (Sal 51:5; Rom 5:12) Sala mak estraga ita-nia relasaun ho Maromak. Neʼe mós estraga ita-nia hanoin, sentimentu, no saúde.

¹³ Sala afeta ita-nia emosaun iha dalan neʼebé negativu. Neʼe bele halo ita sente laran-taridu, la seguru, moe, no fó-sala ba ita-nia an. Ita bele iha sentimentu sira-neʼe kuandu ita halo sala ruma. Maibé sentimentu sira-neʼe mós bele mosu bainhira ita hanoin-hetan katak ita la perfeitu, no neʼe mak kondisaun neʼebé la tuir duni Jeová nia hakarak. (Rom 8:​20, 21) Hanesan motór neʼebé roda kuak labele halaʼo ninia funsaun ho kompletu, nuneʼe mós tanba ita sala-naʼin, ita-nia hanoin no emosaun la halaʼo ninia funsaun ho didiʼak. Tan neʼe, ita la hakfodak se dala ruma ita sente duvida kona-ba Jeová nia domin. Se neʼe akontese, ita presiza hanoin-hetan katak Jeová mak ‘Maromak neʼebé boot no kmanek tebes, neʼebé hatudu domin neʼebé laran-metin ba ema neʼebé hadomi nia no halo tuir ninia mandamentu sira’.—Neem 1:5.

14. Oinsá mak hodi hanoin kona-ba Jesus nia sakrifísiu bele ajuda ita atu fiar katak Jeová hadomi ita? (Roma 5:8) (Haree mós kaixa “Matan-moris kona-ba ‘sala nia kbiit atu lohi imi’”.)

¹⁴ Dala ruma ita sente katak ita la merese simu Jeová nia domin. No neʼe loos. Maski ita halo buat barak ba Jeová, ita nafatin la merese atu simu Jeová nia domin. Maibé Jeová nia domin mak espesiál tebes. Tanba hadomi ita, Jeová fó Jesus nuʼudar sakrifísiu atu ita-nia sala hetan perdua. (1 João 4:10) No mós hanoin-hetan katak Jesus mai mundu atu salva ema sala-naʼin, laʼós ema perfeitu. (Lee Roma 5:8.) Jeová hatene katak ita-nia kbiit la toʼo atu halo buat ida ho perfeitu. Bainhira ita komprende katak ita-nia kondisaun nuʼudar sala-naʼin bele halo ita duvida kona-ba Jeová nia domin, neʼe book ita atu hakaʼas an liután atu luta hasoru hanoin neʼe.—Rom 7:​24, 25.

KONTINUA LARAN-METIN

15-16. Ita bele fiar saida se ita kontinua laran-metin ba Jeová, no tanbasá? (2 Samuel 22:26)

¹⁵ Jeová hakarak ita halo desizaun neʼebé diʼak hodi “kontinua laran-metin ba nia”. (Deut 30:​19, 20) Bainhira ita halo nuneʼe, ita bele fiar katak nia sei nafatin hatudu laran-metin mai ita. (Lee 2 Samuel 22:26.) Ita mós bele fiar katak nia sei ajuda ita atu tahan hasoru situasaun naran deʼit iha ita-nia moris.

¹⁶ Hanesan ita aprende ona, ita iha razaun barak neʼebé bele sai hanesan ankor bainhira ita hasoru susar. Ita hatene katak Jeová hadomi ita no sei ajuda ita. Neʼe mak buat neʼebé Bíblia hanorin. Se ita duvida kona-ba Jeová nia domin, ita bele hanoin kleʼan saida mak ita hatene ona kona-ba Jeová nia domin duké fokus ba buat neʼebé ita sente daudaun. Mai ita kontinua fiar metin ba lia-loos husi Bíblia katak Jeová nia domin neʼebé laran-metin iha ba nafatin.