Ajuda ‘ema neʼebé prontu atu simu lia-loos’

1. Ema nia reasaun mak oinsá bainhira ita haklaken ba sira? (Após 13:​47, 48; 16:​14, 15)

EMA barak iha apóstolu sira-nia tempu simu kedas lia-loos bainhira sira rona liafuan diʼak. (Lee Apóstolu 13:​47, 48; 16:​14, 15.) Nuneʼe mós ohin loron, ema balu simu kedas liafuan diʼak bainhira sira rona ba dala primeiru. Iha mós ema neʼebé foufoun la hatudu interese ba liafuan diʼak, maibé ikusmai sira simu ho laran. Saida mak ita presiza halo bainhira hasoru ema neʼebé “prontu atu simu lia-loos”?

2. Oinsá mak serbisu haklaken hanesan ho toʼos-naʼin nia serbisu?

² Hanoin toʼok ilustrasaun tuirmai. Ita-nia serbisu haklaken mak hanesan ho toʼos-naʼin ida nia serbisu. Se iha modo neʼebé prontu ona atu koʼa, toʼos-naʼin neʼe sei koʼa maski nia presiza kontinua tau matan no rega modo neʼebé seidauk prontu. Nuneʼe mós, bainhira ita hetan ema neʼebé prontu atu simu liafuan diʼak, ita hakarak ajuda kedas ema neʼe atu sai Jesus nia dixípulu. Iha tempu hanesan, ita mós kontinua ajuda ema seluk neʼebé presiza tempu atu hafolin buat neʼebé sira aprende. (João 4:​35, 36) Bainhira ita hatene ema ida prontu ona ka lae, neʼe sei ajuda ita atu hatene dalan diʼak liu atu ajuda nia. Agora, mai ita buka-hatene saida mak ita bele halo bainhira hasoru ema neʼebé prontu atu simu lia-loos. Ita mós sei aprende oinsá ita bele ajuda ema hanesan neʼe atu kontinua laʼo ba oin.

BAINHIRA EMA PRONTU ATU SIMU

3. Saida mak ita presiza halo bainhira hasoru ema neʼebé interese? (1 Korinto 9:26)

³ Bainhira ita hasoru ema neʼebé interese, ita hakarak ajuda sira atu aprende kona-ba Jeová no hakbesik ba nia. Iha situasaun hanesan neʼe, ita labele dada an atu oferese estudu Bíblia no konvida sira atu tuir reuniaun maski foin hasoru dala primeiru.—Lee 1 Korinto 9:26.

4. Konta toʼok esperiénsia kona-ba feto joven ida neʼebé hakarak estuda kedas.

⁴ Oferese estuda. Dala ruma ita hasoru ema neʼebé hakarak estuda kedas. Porezemplu, iha loron-kinta, feto joven ida iha Kanadá hakbesik ba karrosa no foti broxura Moris Haksolok ba Nafatin. Irmán neʼebé hein karrosa esplika ba feto neʼe katak broxura neʼe uza atu halaʼo estudu Bíblia gratuitu ho ema. Feto neʼe interese no sira fó númeru kontaktu ba malu. Liutiha oras balu, feto neʼe haruka mensajen ba irmán neʼe atu husu kona-ba estudu Bíblia. Irmán neʼe oferese atu hasoru malu iha findesemana, maibé feto neʼe hatete: “Oinsá se aban? Haʼu iha tempu.” Sira estuda iha loron-sesta, no iha loron-domingu feto neʼe tuir reuniaun no kontinua laʼo ba oin.

5. Saida mak ita presiza halo se ema seidauk prontu atu estuda Bíblia? (Haree mós foto.)

⁵ Klaru, laʼós ema hotu mak hakarak kedas atu estuda Bíblia hanesan feto joven neʼe. Ema balu karik presiza tempu. Karik ita presiza dada lia hodi uza tópiku neʼebé sira interese. Maibé, se ita kontinua hanoin pozitivu no hatudu interese ba ema neʼe, karik iha tempu badak nia laran, sira sei hakarak estuda. Entaun, saida mak ita bele koʼalia kuandu oferese estudu Bíblia? Mai ita aprende husi irmaun-irmán balu neʼebé matenek kona-ba hahú estuda Bíblia ho ema.

6. Liafuan saida deʼit mak ita bele uza kuandu esplika kona-ba estudu Bíblia?

⁶ Irmaun-irmán balu esplika katak iha rai balu bainhira esplika kona-ba estudu Bíblia, diʼak atu la uza liafuan “estuda”, “kursu Bíblia”, ka “hanorin Ita”. Duké uza liafuan sira-neʼe, karik diʼak liu atu uza liafuan “konversa”, “diskusaun”, no “buka-hatene Bíblia nia hanorin”. Atu kontinua konversa, karik ita bele hatete: “Ita sei kontente atu haree katak Bíblia bele hatán ba pergunta importante sira kona-ba moris” ka “Bíblia laʼós ba ema relijiozu deʼit, maibé neʼe bele ajuda ita hotu atu moris kontente.” Ita mós bele hatete: “Diskusaun neʼe sei la han tempu barak, minutu 10 ka 15 mós toʼo atu aprende buat neʼebé kapás.” Ita bele koʼalia hodi la temi liafuan “arranja” ka “semana-semana”, tanba neʼe rona hanesan ita obriga sira.

7. Bainhira mak ema balu komesa rekoñese lia-loos husi Bíblia? (1 Korinto 14:​23-25)

⁷ Konvida atu tuir reuniaun. Iha apóstolu Paulo nia tempu, ema balu foin rekoñese lia-loos husi Bíblia bainhira sira tuir reuniaun. (Lee 1 Korinto 14:​23-25.) Nuneʼe mós ho ohin loron. Ema foun barak laʼo ba oin lalais kuandu sira komesa tuir reuniaun. Bainhira mak ita presiza konvida sira? Livru Moris Haksolok ba Nafatin lisaun 10 koʼalia kona-ba tuir reuniaun, maibé ita la presiza hein toʼo lisaun neʼe mak foin konvida sira. Bainhira hasoru ba dala primeiru, Ita bele konvida kedas ema neʼe atu tuir reuniaun, karik hodi fó-hatene tema ba diskursu públiku ka pontu neʼebé ita sei aprende husi Livru Haklaken.

8. Saida deʼit mak ita bele esplika ba estudante bainhira konvida nia tuir reuniaun? (Isaias 54:13)

⁸ Bainhira konvida ema neʼebé interese, esplika oinsá ita-nia reuniaun la hanesan ho relijiaun sira seluk. Bainhira estudante Bíblia ida tuir Estudu Livru Haklaken ba dala primeiru, nia husu ba ninia mestra: “Ema neʼebé dirije hatene ema hotu nia naran ka?” Irmán neʼe esplika katak ami koko atu hatene ema hotu nia naran iha kongregasaun, hanesan ita hatene família hotu nia naran. Estudante neʼe hatete katak neʼe la hanesan duni ho ninia igreja. Karik ema foun sira mós seidauk hatene objetivu husi ita-nia reuniaun. (Lee Isaias 54:13.) Ita halibur hamutuk atu adora Jeová, aprende husi nia, no fó laran-manas ba malu. (Ebr 2:12; 10:​24, 25) Tan neʼe mak reuniaun sira halaʼo hodi tuir arranju atu ajuda ita aprende, no la inklui serimónia sira. (1 Kor 14:40) Ita-nia Reuniaun-Fatin halo iha dalan neʼebé simples hodi fasil ba ita atu aprende. Tanba ita neutrál, ita nunka koʼalia kona-ba polítiku. No ita la debate kona-ba problema ka ita rasik nia opiniaun. Antes tuir reuniaun, diʼak atu hatudu vídeo Oinsá mak ami halaʼo reuniaun sira? Neʼe sei ajuda estudante atu hatene nanis kona-ba reuniaun sira.

9-10. Kuandu konvida ema ruma tuir reuniaun, saida deʼit mak ita bele halo atu nia sente kmaan? (Haree mós foto.)

⁹ Ema balu dada an atu tuir reuniaun tanba taʼuk ema sei husu sira atu troka relijiaun. Tan neʼe, diʼak atu fó-hatene katak ita kontente atu simu ema naran deʼit iha reuniaun no la obriga sira atu hola parte ka fó komentáriu. Família sira mós bele tuir, inklui oan kiʼik sira. Iha reuniaun, oan sira tuur ho inan-aman atu aprende hamutuk. No neʼe ajuda oan atu seguru nafatin no inan-aman mós bele hatene saida mak oan sira aprende. (Deut 31:12) Ita la husu ezmola iha reuniaun, tanba ita halo tuir Jesus nia liafuan neʼebé dehan: “Imi simu hodi la selu, tan neʼe fó mós hodi la hein atu ema selu imi.” (Mt 10:8) Ita mós bele temi katak la presiza hatais roupa neʼebé karun atu bele tuir reuniaun. Maromak haree ba ema nia laran, laʼós ba buat neʼebé matan haree.—1 Sam 16:7.

¹⁰ Se ema neʼe tuir reuniaun, hakaʼas an atu halo nia sente kmaan. Fó koñese nia ba katuas no irmaun-irmán sira. Se nia sente ema seluk hanoin nia, neʼe bele book nia atu tuir fali reuniaun. Durante reuniaun, se nia la iha Bíblia, hatudu Ita-nia Bíblia no ajuda nia komprende kona-ba diskursu no oinsá atu estuda.

BAINHIRA KOMESA ESTUDA BÍBLIA

11. Oinsá ita bele hatudu respeitu ba uma-naʼin nia tempu?

¹¹ Saida mak ita presiza hanoin bainhira estuda ho ema? Hanoin-hetan katak uma-naʼin mós okupadu no ladún iha tempu barak. Porezemplu, se Ita no uma-naʼin deside ona loron no oras, hakaʼas an atu tuir tempu maski ema iha Ita-nia área la halo nuneʼe. No bainhira halaʼo estudu ba dala primeiru, diʼak atu la halo kleur demais. Irmaun-irmán sira neʼebé halaʼo ona estudu Bíblia ho ema barak hatete katak diʼak atu remata estuda lalais maski estudante hakarak aprende liután. No keta koʼalia barak, maibé husik estudante atu fó sai ninia hanoin.—Prov 10:19.

12. Saida mak Ita hakarak halo kedas kuandu foin hahú estuda?

¹² Kuandu foin hahú estuda, Ita hakarak ajuda kedas estudante atu koñese Jeová no Jesus no haburas domin ba sira. Ita halo nuneʼe hodi dada sira-nia atensaun ba Maromak nia Liafuan duké ba Ita rasik nia koñesimentu. (Após 10:​25, 26) Bainhira hanorin ema, apóstolu Paulo dada sira-nia atensaun ba Jesus Kristu, neʼebé Jeová haruka mai mundu atu ajuda ema hatene no hadomi Nia. (1 Kor 2:​1, 2) Paulo mós fó-hatene ba ninia maluk sira katak importante atu ajuda dixípulu foun sira atu haburas hahalok diʼak oioin neʼebé kompara hanesan osan-mean, osan-mutin, no fatuk-murak. (1 Kor 3:​11-15) Hahalok sira-neʼe inklui fiar, matenek, kbiit atu tetu didiʼak, no hamtaʼuk Jeová. (Sal 19:​9, 10; Prov 3:​13-15; 1 Ped 1:7) Hodi banati-tuir Paulo nia dalan atu hanorin, Ita bele ajuda estudante atu haburas fiar neʼebé metin no iha relasaun besik ho sira-nia Aman iha lalehan neʼebé domin.—2 Kor 1:24.

13. Oinsá mak ita bele hatudu pasiénsia no komprende estudante nia situasaun? (2 Korinto 10:​4, 5) (Haree mós foto.)

¹³ Banati-tuir Jesus nia dalan atu hanorin hodi hatudu pasiénsia no komprende estudante nia situasaun. Keta husu pergunta sira neʼebé halo nia sente la diʼak. Se estudante sente susar atu komprende pontu ruma, Ita la presiza esplika naruk kona-ba pontu neʼe, maibé kontinua estuda deʼit, no depois mak fila fali ba pontu neʼe. Duké koko obriga nia simu kedas hanorin ruma, diʼak atu fó tempu ba nia atu halo mudansa ba ninia hanoin. (João 16:12; Kol 2:​6, 7) Bíblia kompara hanorin falsu hanesan ho moru neʼebé metin. (Lee 2 Korinto 10:​4, 5.) Duké koko atu sobu kedas moru neʼe, diʼak atu ajuda nia tau fiar ba Jeová nuʼudar fatin protesaun, no neʼe sei halo fasil ba nia atu husik hanorin falsu neʼebé nia fiar ba tempu kleur.—Sal 91:9.

BAINHIRA EMA FOUN TUIR REUNIAUN

14. Ita presiza hatudu hahalok saida ba ema foun neʼebé tuir reuniaun?

¹⁴ Jeová hakarak ita atu hatudu domin ba ema hotu hodi la todan ba sorin, maski sira mai husi kultura, rasa, no situasaun moris neʼebé la hanesan. (Tgo 2:​1-4, 9) Oinsá mak ita bele hatudu domin ba ema foun neʼebé tuir reuniaun?

15-16. Oinsá mak ita bele ajuda ema foun atu sente kmaan kuandu tuir reuniaun?

¹⁵ Ema balu tuir reuniaun tan deʼit hakarak hatene saida mak akontese ka tanba ema ruma neʼebé hela iha fatin seluk mak anima sira. Tan neʼe, keta dada an atu hakbesik ba sira. Fó benvindu ba sira, maibé keta halo ida-neʼe iha dalan neʼebé halo sira sente la diʼak. Konvida sira atu tuur hamutuk. Hatudu Ita-nia Bíblia no publikasaun durante reuniaun, ka fó ba sira. Hanoin mós kona-ba dalan seluk atu halo sira sente kmaan. Porezemplu, mane ida neʼebé foin tuir reuniaun hatete ba irmaun neʼebé fó benvindu ba nia katak nia sente la diʼak kona-ba ninia hatais. Irmaun neʼe halo nia sente kmaan no esplika katak Testemuña ba Jeová mak ema baibain deʼit. Ikusmai mane neʼe hetan batizmu, maibé nia nunka haluha irmaun neʼe nia laran-diʼak. Ita mós hakarak hatudu interese ba ema foun sira, maibé presiza kuidadu atu la husu pergunta pesoál neʼebé halo sira sente la diʼak.—1 Ped 4:15.

¹⁶ Iha dalan seluk tan atu halo ema foun neʼebé tuir reuniaun sente kmaan. Porezemplu, ita hakarak hatudu respeitu bainhira konversa, fó komentáriu, no hatoʼo parte kona-ba ema neʼebé laʼós Testemuña ka kona-ba sira-nia fiar. Ita labele uza liafuan neʼebé hatún ka halo sira sidi. (Tito 2:8; 3:2) Ita mós lakohi koʼalia kona-ba sira-nia fiar iha dalan neʼebé la respeitu. (2 Kor 6:3) Irmaun sira neʼebé hatoʼo diskursu públiku presiza kuidadu kona-ba neʼe. Sira hanoin-hetan katak rona-naʼin balu laʼós Testemuña, tan neʼe diʼak atu esplika iha dalan neʼebé sira bele komprende.

17. Saida mak ita presiza halo bainhira hetan ‘ema neʼebé prontu atu simu lia-loos’?

¹⁷ Nuʼudar tempu liu daudaun, ita-nia serbisu haklaken sai urjente liután, no ita kontinua hetan ‘ema neʼebé prontu atu simu lia-loos neʼebé lori ba moris rohan-laek’. (Após 13:48) Bainhira hetan ema neʼebé prontu, keta dada an atu oferese estudu Bíblia ka konvida sira tuir reuniaun. Hodi halo nuneʼe, ita bele ajuda sira laʼo iha dalan neʼebé ‘lori ba moris’.—Mt 7:14.