Livru Job bele ajuda Ita bainhira fó konsellu

1-2. Job nia kolega naʼin-tolu no Eliú hasoru situasaun saida?

BAINHIRA Job lakon buat hotu neʼebé nia iha, ema barak iha área Leste rona kona-ba neʼe. Job nia kolega naʼin-tolu naran Elifaz, Bildad, no Zofar mós rona kona-ba saida mak akontese ba Job, no sira halo viajen ba Uz atu fó kmaan ba nia. Maibé bainhira sira toʼo, sira hakfodak ho buat neʼebé sira haree.

² Imajina toʼok situasaun neʼe. Job lakon ninia rikusoin hotu. Uluk nia iha animál barak tebes inklui bibi, karau, kuda-kamelu, no kuda-burru, maibé buat sira-neʼe la iha tan. Ema oho ninia atan sira. No ninia oan hotu mate bainhira sira-nia uma monu. Laʼós neʼe deʼit, moras aat kona Job no ninia isin tomak nakonu ho fisur. Husi dook, Job nia kolega naʼin-tolu haree katak nia tuur ho oin triste iha ahi-kadesan laran. Sira-nia reasaun mak oinsá? Sira tuur besik Job durante loron hitu, maibé la iha ema ida mak koʼalia ba nia maski sira haree nia terus tebes. (Job 2:​12, 13) Mane ida naran Eliú, neʼebé idade kiʼik liu sira, nia mós mai no tuur besik sira. Ikusmai Job komesa koʼalia. Nia hatete katak nia hakarak mate deʼit no diʼak liu se nia la moris mai. (Job 3:​1-3, 11) Job presiza duni ajuda husi ninia belun sira! Mane sira-neʼe iha oportunidade atu fó kmaan ba Job no hatudu katak sira mak Job nia belun neʼebé loos.

3. Iha lisaun neʼe, ita sei koʼalia kona-ba saida?

³ Jeová dirije Moisés atu hakerek Job nia kolega naʼin-tolu no Eliú nia liafuan no sira-nia hahalok. Nuʼudar ita lee livru Job, diʼak atu hanoin-hetan katak Eliú koʼalia buat neʼebé Jeová hakarak nia atu fó sai, maibé karik espíritu aat mak book Elifaz atu fó sai liafuan balu. (Job 4:​12-16; 33:​24, 25) Tan neʼe, livru Job fó sai konsellu neʼebé diʼak liu, no mós konsellu neʼebé aat liu. Iha lisaun neʼe, ita sei koʼalia kona-ba oinsá mak livru Job bele ajuda ita bainhira presiza fó konsellu ba ema ruma. Ulukliu, ita sei koʼalia kona-ba ezemplu la diʼak husi Job nia kolega naʼin-tolu. Tuirmai, ita sei koʼalia kona-ba ezemplu diʼak husi Eliú. Iha situasaun ida-idak, ita sei haree oinsá mak livru Job bele lori benefísiu ba ema Izraél iha tempu uluk, no mós ba ita.

OINSÁ MAK JOB NIA KOLEGA NAʼIN-TOLU FÓ KONSELLU BA NIA

4. Tanbasá Job nia kolega naʼin-tolu la konsege kumpre sira-nia objetivu? (Haree mós dezeñu.)

⁴ Bíblia hatete katak Job nia kolega naʼin-tolu mai atu “fó kmaan ba Job no hatudu sira hanoin nia” tanba sira rona kona-ba susar neʼebé Job hasoru. (Job 2:11) Maibé, sira la konsege kumpre sira-nia objetivu. Tanbasá? Iha pelumenus razaun tolu. Primeiru, sira la rona didiʼak ba Job no foti lalais konkluzaun neʼebé sala. Porezemplu, sira hanoin katak Maromak mak fó kastigu ba Job tanba nia halo sala boot.a (Job 4:7; 11:14) Segundu, sira-nia konsellu barak mak la ajuda, la hatoʼo ho laran-diʼak, no hakanek deʼit Job nia laran. Sira hotu uza liafuan furak, maibé liafuan sira-neʼe mak mamuk deʼit. (Job 13:12) Bildad kritika Job dala rua katak nia koʼalia barak demais. (Job 8:2; 18:2) No Zofar hatete katak Job mak hanesan “ema beik”. (Job 11:12) Terseiru, karik sira la koʼalia ho lian makaʼas ba Job, maibé dalan neʼebé sira koʼalia mak hanesan hatún nia, goza nia, no duun nia. (Job 15:​7-11) Sira naʼin-tolu koko atu prova katak Job mak sala duké anima nia no hametin ninia fiar.

5. Elifaz, Bildad, no Zofar nia konsellu lori rezultadu saida?

⁵ Elifaz, Bildad, no Zofar nia konsellu halo Job sente aat liu fali uluk. (Job 19:2) Tan neʼe, nia sente katak nia presiza defende ninia an. Ita komprende tanbasá mak nia sai laran-manas demais atu prova katak nia la sala toʼo ikusmai koʼalia liafuan arbiru. (Job 6:​3, 26) Job nia kolega naʼin-tolu nia liafuan la haleno Jeová nia hanoin. Sira mós la hatudu laran-sadiʼa ba Job. Rezultadu mak Satanás bele uza sira atu halo Job laran-kraik. (Job 2:​4, 6) Oinsá mak istória neʼe bele lori benefísiu ba ema Izraél iha tempu uluk no mós ita?

6. Lisaun saida mak katuas sira iha Izraél bele aprende husi Job nia kolega naʼin-tolu nia ezemplu la diʼak?

⁶ Oinsá ema Izraél bele hetan benefísiu? Depois Jeová harii nasaun Izraél, nia fó knaar ba mane sira neʼebé kumpre kritéria no katuas sira atu tesi-lia ba ninia povu hodi tuir ninia lei. (Deut 1:​15-18; 27:1) Katuas sira-neʼe presiza rona didiʼak ba povu antes atu fó konsellu ka tesi-lia. (2 Krón 19:6) Sira mós presiza husu pergunta sira atu buka-hatene faktu duké hanoin katak sira hatene buat hotu. (Deut 19:18) Sira presiza koʼalia ho laran-diʼak ba ema neʼebé mai husu ajuda. Tanbasá? Tanba se sira la hatudu laran-diʼak, neʼe sei hanetik povu atu fó sai sira-nia sentimentu. (Éx 22:​22-24) Katuas sira iha Izraél bele aprende lisaun furak husi istória kona-ba Job.

7. Iha Izraél nia tempu, sé deʼit mak bele fó konsellu, no saida mak sira bele aprende husi livru Job? (Provérbios 27:9)

⁷ Tuir loloos, laʼós katuas sira deʼit mak presiza fó konsellu. Ema Izraél hotu, maski joven ka idade, mane ka feto bele fó konsellu ba maluk sira neʼebé presiza ajuda atu hadiʼa sira-nia hahalok ka dalan atu adora Jeová. (Sal 141:5) Belun neʼebé loos prontu atu ajuda malu iha dalan hanesan neʼe. (Lee Provérbios 27:9.) Job nia kolega naʼin-tolu nia ezemplu bele ajuda ema Izraél komprende saida mak sira labele koʼalia no saida mak sira labele halo kuandu fó konsellu.

8. Saida deʼit mak ita labele halo kuandu fó konsellu? (Haree mós foto.)

⁸ Oinsá ita bele hetan benefísiu? Nuʼudar ema Kristaun, ita hakarak ajuda irmaun-irmán sira bainhira sira hasoru susar. Maibé kuandu halo ida-neʼe, ita labele sai hanesan Job nia kolega naʼin-tolu. Primeiru, ita labele foti konkluzaun lalais antes hatene faktu sira. Segundu, ita labele fó konsellu hodi bazeia deʼit ba ita rasik nia esperiénsia hanesan buat neʼebé Elifaz halo dala barak, maibé ita-nia konsellu tenke bazeia ba Bíblia. (Job 4:8; 5:​3, 27) Terseiru, ita labele hatoʼo konsellu iha dalan neʼebé hatún ka kritika ema. Hanoin-hetan, Elifaz no ninia maluk sira-nia liafuan balu mak loos. Sira ida nia liafuan mak ikusmai temi fali iha apóstolu Paulo nia karta. (Kompara Job 5:13 ho 1 Korinto 3:19.) Maski nuneʼe, buat barak neʼebé sira koʼalia kona-ba Maromak mak la loos no hakanek Job nia laran, tan neʼe Jeová la kontente ho sira. (Job 42:​7, 8) Kuandu fó konsellu, ita presiza kuidadu atu la halo ema hanoin sala kona-ba Maromak ka halo ema sente katak Maromak la hadomi sira. Agora, mai ita koʼalia kona-ba Eliú nia ezemplu.

OINSÁ MAK ELIÚ FÓ KONSELLU BA JOB

9. Depois kolega naʼin-tolu koʼalia hotu tiha, tanbasá mak Job presiza hetan ajuda no oinsá mak Jeová ajuda nia?

⁹ Job no ninia kolega naʼin-tolu diskute malu kleur tebes. Sira koʼalia barak no sira-nia liafuan hakerek hamutuk toʼo kapítulu 28 iha Bíblia. Husi sira-nia liafuan hatudu katak sira la kontente no hirus. Ita bele komprende tanbasá Job nafatin sente laran-kraik! Nia presiza hetan kmaan no ajuda atu hadiʼa ninia hanoin. Oinsá mak Jeová ajuda Job? Jeová uza Eliú atu fó konsellu. Tanbasá Eliú la koʼalia kedas antes neʼe? Eliú hatete: “Haʼu mak tinan kiʼik liu no imi mak tinan boot. Tan neʼe mak haʼu nonook deʼit hodi hatudu respeitu ba imi.” (Job 32:​6, 7) Eliú hatene katak baibain ema neʼebé idade boot mak matenek tanba iha esperiénsia barak se kompara ho ema neʼebé idade kiʼik. Maibé depois rona tiha ho pasiénsia ba Job no ninia kolega sira, Eliú sente nia mós presiza koʼalia. Nia hatete: “Laʼós tan deʼit tinan boot mak halo ema sai matenek, no mós laʼós katak katuas sira deʼit mak bele komprende buat loos.” (Job 32:9) Tuirmai saida mak Eliú hatete, no oinsá nia fó sai ida-neʼe?

10. Saida mak Eliú halo antes fó konsellu ba Job? (Job 33:​6, 7)

¹⁰ Antes fó konsellu ba Job, Eliú hakarak Job atu sente kalma no prontu hodi rona ba nia. Oinsá Eliú halo nuneʼe? Ulukliu, nia kontrola ninia sentimentu. Ita hatene ida-neʼe tanba Bíblia hatete katak foufoun Eliú hirus tebes, maibé nia la hatudu ida-neʼe. (Job 32:​2-5) Nia ho haraik an koʼalia ba Job nuʼudar belun. Porezemplu, nia hatete ba Job: “Haʼu ho Ita hanesan deʼit iha Maromak loos nia oin.” (Lee Job 33:​6, 7.) Tuirmai, Eliú hatudu ho klaru katak nia rona didiʼak ona ba Job nia liafuan antes fó konsellu. Ita hatene ida-neʼe tanba Eliú repete fali pontu importante balu neʼebé Job hatete. (Job 32:11; 33:​8-11) No nia mós halo buat neʼebé hanesan durante nia fó konsellu ba Job.—Job 34:​5, 6, 9; 35:​1-4.

11. Eliú fó konsellu ba Job iha dalan oinsá? (Job 33:1)

¹¹ Bainhira Eliú fó konsellu ba Job, nia halo ida-neʼe ho respeitu no la halo Job sente la iha folin. Porezemplu, Eliú uza Job nia naran, no neʼe mak buat neʼebé Job nia kolega naʼin-tolu la halo. (Lee Job 33:1.) Karik Eliú hanoin-hetan katak nia hakarak tebes atu koʼalia kuandu Job no ninia kolega sira debate hela, tan neʼe nia hatudu laran-diʼak ba Job hodi fó oportunidade atu koʼalia durante nia fó konsellu. (Job 32:4; 33:32) Eliú mós fó sai ho klaru tanbasá mak buat balu neʼebé Job hatete no halo mak la diʼak, no nia ho laran-diʼak fó-hanoin Job kona-ba Jeová nia matenek, kbiit, justisa, no domin neʼebé laran-metin. (Job 36:​18, 21-26; 37:​23, 24) Ita fiar katak Eliú nia konsellu diʼak neʼe prepara Job atu simu konsellu liután husi Jeová. (Job 38:​1-3) Oinsá Eliú nia ezemplu neʼe bele lori benefísiu ba ema Izraél iha tempu uluk no ita?

12. Oinsá mak Jeová uza profeta sira atu ajuda ninia povu, no oinsá mak ema Izraél bele hetan benefísiu husi Eliú nia ezemplu?

¹² Oinsá ema Izraél bele hetan benefísiu? Dala barak Jeová uza profeta sira atu hanorin no korrije ema Izraél. Porezemplu, durante juís sira-nia tempu, Jeová uza profeta feto ida naran Débora atu hanorin povu Izraél. Jeová mós uza Samuel atu fó matadalan ba ninia povu maski Samuel sei joven. (Juís 4:​4-7; 5:7; 1 Sam 3:​19, 20) Tuirmai, durante liurai sira-nia tempu, Jeová kontinua uza profeta oioin atu ajuda ninia povu halaʼo adorasaun iha dalan neʼebé loos no mós atu fó konsellu ba sira neʼebé laʼo sala dalan. (2 Sam 12:​1-4; Após 3:24) Eliú nia ezemplu iha livru Job bele ajuda mane no feto sira neʼebé laran-metin atu komprende saida mak sira bele koʼalia no oinsá atu fó konsellu.

13. Oinsá mak ema Kristaun ohin loron bele anima maluk Kristaun sira?

¹³ Oinsá ita bele hetan benefísiu? Nuʼudar ema Kristaun, ita fó-hatene ema seluk kona-ba Maromak nia hakarak neʼebé hakerek iha Bíblia. Ita mós fó kmaan no anima maluk Kristaun sira liuhusi ita-nia liafuan. (1 Kor 14:3) Eliú nia ezemplu bele ajuda ita atu halo nuneʼe. Liuliu katuas sira presiza hakaʼas an atu “koʼalia hodi fó kmaan” ba irmaun-irmán sira, inklui sira neʼebé laran-susar ka “koʼalia liafuan arbiru”.—1 Tes 5:14; Job 6:3.

14-15. Fó toʼok ezemplu kona-ba oinsá mak katuas ida bele halo tuir Eliú nia ezemplu.

¹⁴ Imajina toʼok situasaun neʼe: Katuas kongregasaun ida hatene katak irmán ida iha ninia kongregasaun sente laran-kraik. Katuas neʼe ho irmaun ida tan bá vizita irmán neʼe atu anima nia. Durante vizita, irmán neʼe fó sai ninia sentimentu negativu. Nia hatete katak maski nia tuir reuniaun no bá haklaken, neʼe la ajuda nia atu sente kontente. Irmaun katuas neʼe sei halo saida?

¹⁵ Primeiru, nia sei koko atu komprende didiʼak irmán neʼe nia sentimentu. Atu halo ida-neʼe, nia presiza rona ho pasiénsia. Karik irmán neʼe sente katak nia la merese simu Maromak nia domin, ka “hanoin resin kona-ba moris”. (Lc 21:34) Segundu, katuas neʼe buka oportunidade atu gaba irmán neʼe, karik kona-ba irmán neʼe kontinua tuir reuniaun no haklaken maski nia sente laran-kraik. No Terseiru, depois komprende didiʼak irmán neʼe nia situasaun no tanbasá nia la kontente, katuas neʼe sei uza Bíblia atu ajuda nia fiar katak Jeová hadomi nia.—Gal 2:20.

KONTINUA HETAN BENEFÍSIU HUSI LIVRU JOB

16. Oinsá mak ita bele kontinua hetan benefísiu husi livru Job?

¹⁶ Klaru, ita bele hetan benefísiu barak bainhira estuda kona-ba livru Job! Hanesan ita aprende ona iha lisaun antes neʼe, livru Job ajuda ita komprende tanbasá Maromak husik terus akontese, no oinsá ita bele tahan. No liuhusi lisaun neʼe, ita bele aprende oinsá atu fó konsellu neʼebé diʼak hodi la sai hanesan Job nia kolega naʼin-tolu, maibé banati-tuir Eliú nia ezemplu. Se iha futuru Ita presiza fó konsellu ba ema ruma, diʼak atu hanoin fali lisaun sira husi livru Job. No se Ita la lee livru Job kleur ona, Ita bele halo planu atu lee fali livru neʼe. Hanesan ema iha tempu uluk, Ita mós bele hetan benefísiu barak husi livru Job.