Banati-tuir Jeová nia hahalok haraik an

1. Tanbasá ita admira kona-ba Jeová nia haraik an?

KUANDU Ita hanoin kona-ba ukun-naʼin sira ohin loron, Ita sente sira mak ema neʼebé haraik an ka lae? Karik lae. Maibé, Maromak Jeová hatudu haraik an maski nia mak ida neʼebé kbiit boot liu hotu. (Sal 113:​5-8) La iha ema ida mak haraik an hanesan Jeová. Nia nunka foti an. Iha lisaun neʼe, ita sei aprende kona-ba Jeová nia hahalok haat neʼebé hatudu katak nia mak Maromak neʼebé haraik an. Ita mós sei aprende oinsá mak Jesus banati-tuir ninia Aman nia hahalok. Hodi aprende buat sira-neʼe sei ajuda ita hakbesik liután ba Jeová no hatudu haraik an liután.

JEOVÁ MAK MAROMAK NEʼEBÉ FASIL ATU HAKBESIK

2. Salmo 62:8 fó-hatene saida mai ita kona-ba Jeová? (Haree mós foto.)

² Baibain susar ba ita atu hakbesik ba ema neʼebé foti an. Dala barak ema neʼebé foti an la hatudu laran-diʼak ba ema seluk tanba sira hanoin katak sira mak diʼak liu. Neʼe la hanesan duni ho Aman Jeová! Tanba nia mak haraik an, nia konvida ita atu hakbesik ba nia no fó sai ita-nia hanoin no sentimentu hotu. (Lee Salmo 62:8.) Hanesan aman neʼebé hadomi oan hakarak tebes atu hatene oan nia laran-susar, Jeová mós kontente atu rona ita-nia orasaun. Tuir loloos, Jeová dirije ema atu hakerek orasaun sira hanesan neʼe iha Bíblia. Neʼe hatudu katak nia mak Maromak neʼebé fasil atu hakbesik. (Jos 10:​12-14; 1 Sam 1:​10-18) Maibé oinsá se ita sente la merese atu hakbesik ba Jeová?

3. Tanbasá Ita fiar katak Jeová hakarak Ita halo orasaun beibeik atu hakbesik ba nia?

³ Ita bele hakbesik ba Jeová liuhusi orasaun maski ita sente la merese simu ninia domin. Tanbasá ita bele dehan nuneʼe? Iha ai-knanoik kona-ba oan neʼebé lakon, Jesus kompara Jeová ho aman ida neʼebé ninia oan halo ona sala barak tebes. Oan neʼe sente katak ninia aman sei la simu fali nia. Maibé, bainhira oan neʼe fila fali, aman nia reasaun mak oinsá? Jesus hatete katak kuandu aman neʼe haree ninia oan husi dook, aman neʼe “halai hasoru nia hodi hakoʼak no reʼi”. (Lc 15:​17-20) Jeová mak hanesan aman neʼe. Bainhira ita halo orasaun tanba hanoin barak ka sente triste kona-ba sala neʼebé ita halo, nia rona didiʼak mai ita tanba nia haraik an. (Lam 3:​19, 20) Hanesan aman neʼebé halai hasoru ninia oan, Jeová hanoin tebes ita no halo ita fiar katak nia hadomi no fó kmaan mai ita. (Isa 57:15) Oinsá mak Jeová halo nuneʼe? Dala barak nia uza katuas sira, família neʼebé iha lia-loos, no irmaun-irmán sira. (Tgo 5:​14, 15) Jeová ajuda ita iha dalan hanesan neʼe tanba nia hakarak ita atu hakbesik ba nia.

4. Tanbasá fasil ba ema atu hakbesik ba Jesus?

⁴ Oinsá Jesus banati-tuir ninia Aman? Hanesan Jeová, Jesus mós haraik an. Tan neʼe, bainhira nia iha rai, ema barak sente kontente atu hakbesik nia. Sira mós la taʼuk atu husu pergunta ba nia. (Mc 4:​10, 11) No kuandu Jesus husu sira-nia hanoin kona-ba buat ruma, sira la dada an atu fó sai sira-nia hanoin. (Mt 16:​13-16) No kuandu sira halo sala, sira la taʼuk katak Jesus sei hirus ho sira. Sira hatene katak Jesus mak laran-diʼak, laran-sadiʼa, no pasiénsia. (Mt 17:​24-27) Tanba Jesus banati-tuir ninia Aman ho didiʼak, ninia dixípulu sira bele hatene diʼak liután kona-ba Jeová. (João 14:9) Sira komprende katak Jeová mak Maromak neʼebé haraik an no fasil atu hakbesik, la hanesan ho ulun-naʼin relijiaun sira neʼebé laran-aat, foti an, no la hanoin ema seluk.

5. Oinsá mak haraik an bele halo fasil ba ema seluk atu hakbesik ita?

⁵ Oinsá ita bele banati-tuir Jeová? Kuandu ita haburas haraik an, neʼe sei halo fasil ba ema seluk atu hakbesik ba ita. Se ita la haraik an, ita sai laran-moras lalais, foti an, no lakohi fó perdua ba ema neʼebé hakanek ita-nia laran, no neʼe bele halo ema hadook an husi ita. Maibé se ita haraik an, ita sei hatudu laran-diʼak, pasiénsia, no prontu fó perdua, no neʼe halo ema seluk kontente atu hakbesik ba ita. (Kol 3:​12-14) Liuliu katuas sira presiza hakaʼas an atu hatudu hahalok neʼe. Atu halo nuneʼe, sira presiza hamutuk beibeik ho irmaun-irmán sira. Neʼe katak sira presiza hakaʼas an atu tuir reuniaun iha Reuniaun-Fatin duké tuir deʼit husi vídeo konferénsia. No se bele, sira mós haklaken husi uma ba uma hamutuk ho irmaun-irmán sira. Hodi halo nuneʼe, ema iha kongregasaun sei hatene katuas sira diʼak liután no sente livre atu koʼalia ba sira kuandu presiza.

JEOVÁ LA ULUN-TOOS

6-7. Fó toʼok ezemplu oinsá Jeová prontu rona ba ninia atan sira-nia orasaun.

⁶ Baibain ema neʼebé foti an hanoin katak sira mak hatene buat neʼebé diʼak liu no lakohi troka sira-nia hanoin. Maibé Jeová la hanesan neʼe. Tanba nia haraik an, nia la ulun-toos maski nia mak matenek liu fali ema hotu iha buat hotu. Hanoin toʼok kona-ba tempu neʼebé Miriam hamutuk ho Arão muramura hasoru sira-nia alin Moisés. Loloos, Miriam la respeitu Jeová tanba Moisés mak Jeová nia reprezentante. Tan neʼe Jeová sai hirus no halo nia kona moras-lepra. Maibé, tuirmai Arão husu Moisés atu ajuda Miriam, no Moisés harohan ba Jeová atu kura Miriam. Jeová nia reasaun mak oinsá? Jeová la hatudu hahalok foti an hodi la troka ninia desizaun. Maibé tanba haraik an, Jeová rona ba Moisés no kura Miriam.—Núm 12:​1-15.

⁷ Jeová mós hatudu haraik an bainhira nia rona ba Liurai Ezequias nia orasaun. Jeová haruka ona profeta Isaias atu fó-hatene Ezequias katak nia sei mate. Ezequias tanis no harohan ba Jeová atu kura nia. Jeová hatudu laran-sadiʼa hodi halo Ezequias moris ba tinan 15 tan. (2 Reis 20:​1, 5, 6) Sin, Jeová hanoin tebes ema, no tanba haraik an, nia prontu rona ba sira.

8. Saida deʼit mak hatudu katak Jesus la ulun-toos? (Mc 3:​1-6)

⁸ Oinsá Jesus banati-tuir ninia Aman? Bainhira iha rai, Jesus la ulun-toos hodi prontu halo buat diʼak ba ema seluk iha tempu naran deʼit kuandu sira presiza. Porezemplu, nia kura ema iha loron Sábadu maski ulun-naʼin relijiaun sira kontra. (Lee Marcos 3:​1-6.) Jesus mós la ulun-toos nuʼudar nia dirije kongregasaun Kristaun. Porezemplu, bainhira ema ruma iha kongregasaun halo sala sériu, Jesus hatudu pasiénsia hodi fó oportunidade ba sira atu troka sira-nia hahalok.—Apok 2:​2-5.

9. Oinsá mak ita bele hatudu katak ita la ulun-toos? (Haree mós foto.)

⁹ Oinsá ita bele banati-tuir Jeová? Ita tenke aprende husi Jeová kona-ba oinsá atu la ulun-toos liuhusi ita-nia hanoin no hahalok. (Tgo 3:17) Porezemplu, inan-aman neʼebé banati-tuir Jeová sei la espera atu sira-nia oan halo buat neʼebé sira labele halo. Ita bele haree Jacob nia ezemplu kapás husi Génesis 33:​12-14. Inan-aman neʼebé haraik an no la ulun-toos sei la kompara oan ida ho oan seluk. Katuas kongregasaun mós labele ulun-toos. Porezemplu, katuas ida labele kaer metin deʼit ba ninia ideia, maibé nia sei apoia desizaun neʼebé katuas maioria mak hili kuandu neʼe la kontra Bíblia nia prinsípiu. (1 Tim 3:​2, 3) No ita hotu bele koko atu komprende ema seluk nia hanoin maski ita-nia hanoin mak la hanesan. (Rom 14:1) Sin, ita hotu iha kongregasaun presiza hakaʼas an atu ‘halo ema hotu haree katak ita la ulun-toos’.—Flp 4:5.

JEOVÁ HATUDU PASIÉNSIA

10. Iha situasaun saida deʼit mak Jeová hatudu pasiénsia?

¹⁰ Baibain ema neʼebé foti an la iha pasiénsia atu hein. Maibé Jeová la hanesan neʼe. Nia hatudu pasiénsia liu fali ema hotu! Porezemplu, iha Noé nia tempu, Jeová hatete katak nia sei hein ba tinan 120 antes halakon ema aat. (Gén 6:3) Neʼe fó tempu ba Noé atu haboot ninia oan no halo ró boot hamutuk ho ninia família. Iha situasaun seluk, Jeová mós rona ho pasiénsia bainhira Abraão husu pergunta kona-ba halakon Sodoma no Gomorra. Se Jeová mak foti an, nia bele deʼit hatete: ‘Ó la iha direitu atu husu!’ Maibé tanba Jeová haraik an, nia rona ba Abraão ho pasiénsia.—Gén 18:​20-33.

11. Tuir 2 Pedro 3:​9, tanbasá Jeová hatudu pasiénsia ohin loron?

¹¹ Jeová ho haraik an hatudu pasiénsia ohin loron. Nia hein hela ba tempu neʼebé deside ona atu halakon buat aat hotu. Tanbasá? “Tanba nia lakohi ema ida lakon maibé nia hakarak ema hotu atu arrepende sala.” (Lee 2 Pedro 3:9.) Jeová nia pasiénsia mak saugati deʼit ka lae? Lae! Tanba Jeová pasiénsia, ema rihun ba rihun sai ona ninia belun. No ita mós espera katak sei iha ema barak liután mak hakbesik ba nia. Maski nuneʼe, Jeová nia pasiénsia iha limite. Jeová hadomi ema, maibé nia la tolera deʼit hahalok neʼebé aat. Nia sei halakon ema aat ba nafatin.—Hab 2:3.

12. Oinsá mak Jesus banati-tuir Jeová nia pasiénsia?

¹² Oinsá Jesus banati-tuir ninia Aman? Ba tinan barak, Jesus banati-tuir Jeová nia pasiénsia. Jesus haree oinsá Satanás koʼalia bosok kona-ba Jeová no ema neʼebé laran-metin. (Gén 3:​4, 5; Job 1:11; Apok 12:10) Jesus mós haree ema barak hasoru susar no terus. Ita bele imajina oinsá Jesus hein namanas atu “harahun Diabu nia serbisu hotu”! (1 João 3:8) Tanbasá Jesus hein ho pasiénsia ba tempu neʼebé Jeová fó lisensa atu halakon Diabu nia serbisu? Razaun ida mak tanba Jesus haraik an. Nia hatene katak Jeová mak iha direitu atu deside kona-ba tempu neʼe.—Após 1:7.

13. Oinsá no tanbasá mak Jesus hatudu pasiénsia ba ninia apóstolu sira?

¹³ Jesus mós hatudu pasiénsia ba ninia apóstolu sira. Porezemplu, kuandu apóstolu sira diskute malu beibeik kona-ba sé mak boot liu entre sira, Jesus la rende an no kontinua hatudu pasiénsia ba sira. (Lc 9:46; 22:​24-27) Nia fiar katak sira sei haraik an no troka sira-nia hahalok. Ita halo beibeik sala ruma neʼebé hanesan ka lae? Se nuneʼe, Ita bele sente agradese tanba Ita iha Liurai neʼebé haraik an no pasiénsia!

14. Oinsá mak ita bele haburas pasiénsia?

¹⁴ Oinsá ita bele banati-tuir Jeová? Bainhira ita haleno “Kristu nia hanoin”, ita sei iha hanoin no hahalok neʼebé hanesan ho Jeová. (1 Kor 2:16) Oinsá mak ita bele komprende liután Kristu nia hanoin? Ita tenke lee Evanjellu sira. Tuirmai ita presiza uza tempu atu hanoin kleʼan kona-ba buat neʼebé Jesus halo no tanbasá nia halo ida-neʼe. Ita mós presiza halo orasaun ba Jeová atu ajuda ita hatudu haraik an no pasiénsia hanesan Jesus. Nuʼudar ita haleno liután Kristu nia hanoin, ita bele banati-tuir Jeová hodi haburas pasiénsia ba ema seluk no ita-nia an rasik.—Mt 18:​26-30, 35.

JEOVÁ HAFOLIN EMA KIʼIK SIRA

15. Fó toʼok ezemplu kona-ba oinsá Jeová hafolin ema kiʼik sira. (1 Samuel 2:8)

¹⁵ Lee 1 Samuel 2:8. Maski Jeová mak Maromak neʼebé Aas Liu Hotu, nia tau atensaun ba ema kiʼik sira. Hanoin toʼok kona-ba ema balu neʼebé haree hanesan la iha folin maibé Jeová tau atensaun ba sira no inklui sira-nia naran iha Bíblia. Porezemplu, Jeová dirije Moisés atu hakerek kona-ba atan feto ida naran Débora. Nia serbí iha Isaac no Jacob nia umakain maizumenus ba tinan 125! Ita ladún hatene kona-ba feto laran-metin neʼe, maibé Jeová dirije Moisés atu hakerek detalla kona-ba Débora hodi hatudu katak Jeová no Jacob nia umakain hotu hadomi nia. (Gén 24:59; 35:​8, nota) Tinan barak liu tiha, Jeová hili bibi-atan joven ida naran David no halo nia sai liurai ba nasaun Izraél. (2 Sam 22:​1, 36) Lakleur Jesus moris iha rai, Maromak haruka anju sira bá hasoru bibi-atan sira neʼebé la iha pozisaun boot atu fó-hatene uluk ba sira katak Mesias moris ona iha Belein. (Lc 2:​8-11) No bainhira José no Maria lori Jesus ba templu, Jeová hatudu katak nia hafolin Simeão no Ana neʼebé idade ona hodi fó priviléjiu ba sira atu haree Ninia Oan-Mane. (Lc 2:​25-30, 36-38) Sin, “Jeová foti saʼe ema kiʼik husi rai-rahun”!

16. Oinsá mak Jesus banati-tuir dalan neʼebé ninia Aman trata ema?

¹⁶ Oinsá Jesus banati-tuir ninia Aman? Hanesan ninia Aman, Jesus mós hafolin ema kiʼik sira. Nia hanorin lia-loos kona-ba Maromak nia Ukun ba “ema la eskola no ema baibain deʼit”. (Após 4:13; Mt 11:25) Jesus mós kura ema moras no trata sira iha dalan neʼebé halo sira sente katak nia hadomi no respeitu sira. (Lc 5:13) Iha kalan ikus antes Jesus mate, nia fase apóstolu sira-nia ain maski neʼe mak atan nia serbisu. (João 13:5) No antes saʼe ba lalehan, Jesus fó priviléjiu ba ninia dixípulu sira inklui ita ohin loron atu halaʼo serbisu importante liu hotu, neʼe mak ajuda ema seluk atu hetan moris rohan-laek.—Mt 28:​19, 20.

17. Oinsá mak ita bele hafolin ema seluk? (Haree mós foto.)

¹⁷ Oinsá ita bele banati-tuir Jeová? Ita hafolin ema seluk kuandu fahe liafuan diʼak ba ema hotu hodi la haree ba rasa, kór, situasaun moris, ka edukasaun. No ita hafolin irmaun-irmán sira hodi haree sira boot liu fali ita maski ita rasik iha abilidade ka priviléjiu ruma. (Flp 2:3) Jeová kontente bainhira ita ho haraik an “buka uluk” atu hatudu domin no respeitu ba malu iha dalan hanesan neʼe no dalan seluk tan.—Rom 12:10; Sof 3:12.

18. Tanbasá Ita hakarak banati-tuir Jeová nia hahalok haraik an?

¹⁸ Bainhira ita hakaʼas an banati-tuir ita-nia Aman Jeová nia haraik an, ita sei sai ema neʼebé fasil atu hakbesik, la ulun-toos, no pasiénsia liután. No hanesan Jeová, ita mós sei hafolin ema seluk. No hanoin-hetan, kuandu ita hakaʼas an atu hakbesik liután ba ita-nia Aman Jeová neʼebé haraik an, nia sei haree ita nuʼudar ema neʼebé folin-boot liután!—Isa 43:4.