Ita hanoin-hetan ka lae?
Ita bele ka lae hatán ba pergunta sira tuirmai neʼebé bazeia ba Livru Haklaken 2025:
Saida mak motiva ita atu fó glória ba Jeová?
Ita fó glória ba Jeová tanba respeitu no hadomi tebes nia. Ita mós fó glória ba Jeová tanba hakarak atu ema seluk koñese nia.—w25.01, p. 3.
Se ema ruma hakanek ita-nia laran, oinsá ita bele prontu liután atu fó perdua?
Ita la ignora deʼit ita-nia sentimentu, maibé hodi husik tiha sentimentu hirus bele ajuda ita atu sente diʼak fali.—w25.02, p. 15-16.
Oinsá mak Marcos nia ezemplu bele ajuda irmaun joven sira?
Marcos prontu atu serbí ema seluk. Bainhira Paulo lakohi lori Marcos, karik Marcos sente laran-kanek no triste, maibé nia la rende an. Ikusmai nia serbisu hamutuk ho Paulo no mós ema Kristaun seluk neʼebé maduru.—w25.04, p. 27.
Jesus halo orasaun: “Haʼu fó sai tiha ona Ita-nia naran ba sira.” Neʼe katak sá? (João 17:26)
Jesus nia dixípulu sira hatene ona Maromak nia naran. Maibé Jesus hanorin sira kona-ba signifikadu husi naran neʼe, inklui Maromak nia hakarak, buat neʼebé Nia halo, no Ninia hahalok sira.—w25.05, p. 20-21.
Se ita haraik an, ita rekoñese saida deʼit?
Ita rekoñese katak iha buat barak neʼebé ita la hatene. Porezemplu, ita la hatene bainhira mak mundu nia rohan sei mai ka saida mak Jeová sei halo iha tempu neʼebá. Ita mós la hatene saida mak sei akontese aban no oinsá Jeová hatene didiʼak kona-ba ita.—w25.06, p. 15-18.
Oinsá mak ita bele hetan benefísiu husi ita-nia publikasaun ka diskursu públiku?
Ita bele husu ba ita-nia an: ‘Evidénsia saida mak bele ajuda ema atu fiar ba Bíblia? Iha ka lae ilustrasaun diʼak neʼebé haʼu bele uza atu hanorin lia-loos ba ema seluk? Sé mak interese ba tópiku neʼe?’—w25.07, p. 19.
Ita aprende saida kona-ba Jeová nia perdua husi dalan neʼebé nia trata David?
Maski David halo sala neʼebé sériu, bainhira nia arrepende an ho laran, Jeová perdua nia. (1 Reis 9:4, 5) Bainhira Jeová fó ona perdua, nia sei la temi fali kona-ba sala neʼebé ita halo ona, no sei la fó kastigu ba ita iha futuru.—w25.08, p. 17.
Se estudante Bíblia la komprende pontu ruma, Ita bele halo saida?
Kuandu ita hanorin didiʼak husi Bíblia maibé susar ba estudante atu komprende, diʼak atu kontinua estuda pontu seluk, no halo planu atu fila fali ba pontu neʼe iha tempu tuirmai.—w25.09, p. 24.
Bíblia koʼalia kona-ba ‘sala nia kbiit atu lohi ita’. (Ebr 3:13) Neʼe katak sá?
Sala nia kbiit bele book ita atu halo hahalok neʼebé la diʼak. Neʼe mós bele lohi ita no halo ita iha dúvida neʼebé susar atu halakon, porezemplu Jeová hadomi duni ita ka lae.—w25.10, p. 16.
Saida deʼit mak bele ajuda ita atu hadiʼa liután ita-nia orasaun?
(1) Hanoin didiʼak kona-ba Jeová nia hahalok sira. (2) Hanoin uluk kona-ba situasaun neʼebé ita hasoru daudaun, porezemplu ita presiza fó perdua ba ema ruma. (3) Labele ansi kuandu halo orasaun. Neʼe bele ajuda ita atu fó sai ita-nia sentimentu.—w25.10, p. 19-20.
Oinsá mak ita bele ajuda ferik-katuas sira?
Ita bele vizita ka telefone sira, no mós akompaña sira kuandu bá konsulta. Ita mós bele haklaken iha dalan oioin hamutuk ho sira.—w25.11, p. 6-7.
Oinsá mak bele halaʼo kazamentu neʼebé lori hahiʼi ba Jeová?
Halo tuir governu nia lei kona-ba kaben. Kria ambiente neʼebé haleno hahalok neʼebé Maromak nia espíritu lori mai. Hatais ho respeitu no hasees an husi toman neʼebé la tuir Bíblia. Komunika ho didiʼak kuandu halo planu kona-ba kazamentu.—w25.12, p. 21-24.