Bíblia fó sai nanis kona-ba ema nia hahalok ohin loron ka lae?

Bíblia nia resposta

Sin, Bíblia fó-hatene nanis katak ema nia hahalok no hanoin sei sai aat liután ohin loron. Ema barak sei la moris tuir morál neʼebé diʼak atu bele moris ho unidade.a (2 Timóteo 3:1-5) Maibé Bíblia mós fó sai nanis katak iha ema balu neʼebé kontinua hakaʼas an atu tuir morál neʼebé diʼak. Ho Maromak nia ajuda, sira hakaʼas an atu la simu influénsia aat no mós troka sira-nia hanoin no hahalok atu bele halo Maromak kontente.—Isaias 2:2, 3.

Iha informasaun neʼe

• Bíblia fó sai profesia saida kona-ba ema nia hahalok no hanoin ohin loron?

• Hahalok hanoin an deʼit fó impaktu saida ba ema seluk?

• Tanbasá ema barak nia hahalok sai aat liután?

• Saida mak ita presiza halo?

• Ema hotu nia hahalok sei sai aat liután ka lae?

• Ema hotu nia hahalok ikusmai sei sai aat loos toʼo labele kontrola tan ka lae?

Bíblia fó sai profesia saida kona-ba ema nia hahalok no hanoin ohin loron?

Bíblia fó sai nanis hahalok aat oioin neʼebé ema hatudu tanba hanoin an deʼit. Ema sei “la kontrola an”, “hadomi deʼit sira-nia an”, no “hadomi deʼit ksolok duké hadomi Maromak”.—2 Timóteo 3:2-4.

Profesia neʼe sai loos duni, ohin loron ema hanoin demais kona-ba sira-nia an, buat neʼebé bele lori benefísiu ba sira, buat neʼebé halo sira kontente no sente katak sira-nia moris iha duni objetivu. Hanesan profesia neʼe fó sai nanis, ohin loron ema barak hanoin deʼit sira-nia an no neʼe sai aat liután. Rezultadu mak sira “la hadomi buat neʼebé diʼak”. Sira mós “la hatene fó agradese” ba buat neʼebé sira iha ona ka buat neʼebé ema seluk halo ba sira.—2 Timóteo 3:2, 3.

Hanoin an deʼit bele hamosu hahalok aat seluk neʼebé Bíblia fó sai nanis:

• Kaan-teen. Ema barak sei “hadomi osan”. Sira sukat sira-nia susesu liuhusi osan ka sasán neʼebé sira iha.—2 Timóteo 3:2.

• Foti an. Ema barak mak “gaba an, loko an”, no “foti an”. (2 Timóteo 3:2, 4) Ema hanesan neʼe gaba an demais kona-ba sira-nia talentu, abilidade, no rikusoin.

• Koʼalia aat. Ohin loron, iha fatin naran deʼit ita bele rona ema koʼalia aat. (2 Timóteo 3:2, 3) Neʼe bele refere ba hahalok hanesan insulta ka habelar lia-bosok kona-ba ema seluk ka Maromak.

• Ulun-toos. Ema barak sei “la hatudu laran-metin”, “la rona malu”, “traidór”, no “ulun-toos”. (2 Timóteo 3:2-4) Sira hatudu hahalok sira-neʼe hodi lakohi atu koʼalia ba malu ho didiʼak, lakohi serbisu hamutuk atu buka solusaun, ka la kaer metin ba sira-nia promesa.

• Violénsia. Ema barak ohin loron mak “siʼak”, fasil atu sai hirus, no baibain neʼe hamosu hahalok brutál ka violénsia.—2 Timóteo 3:3.

• Hahalok aat aumenta. Jesus fó sai nanis katak ‘hahalok aat sei aumenta ba beibeik’ durante ita-nia tempu. (Mateus 24:12) Jesus mós hatete katak sei mosu “konflitu sira” ka “povu kontra ukun-naʼin”.—Lucas 21:9, nota-rodapé.

• La iha domin iha família laran. Tanba ema barak “la halo tuir inan-aman” no “la hadomi” família, neʼe halo família barak sai vítima ba violénsia doméstika no abuzu.—2 Timóteo 3:2, 3.

• Laran-makerek. Ema neʼebé finje katak sira adora Maromak sei aumenta liután. (2 Timóteo 3:5) Duké halo buat neʼebé Maromak husu, sira halo tuir ulun-naʼin relijiaun sira neʼebé fó sai deʼit buat neʼebé sira hakarak atu rona.—2 Timóteo 4:3, 4.

Hahalok hanoin an deʼit fó impaktu saida ba ema seluk?

Tanba hahalok hanoin an deʼit aumenta, neʼe halo ema barak liután mak sai estrese no depresaun. (Eclesiastes 7:7) Porezemplu, ema balu neʼebé hadomi osan aproveita ema seluk. Ema neʼebé la iha domin karik abuza sira-nia membru família toʼo halo vítima sai depresaun ka hakarak atu oho an. Ema neʼebé trai ema seluk no la laran-metin bele fó impaktu neʼebé aat tebes ba vítima nia emosaun.

Tanbasá ema barak nia hahalok sai aat liután?

Bíblia esplika razaun loloos tanbasá ema nia hahalok troka:

• Ema nia domin ba Maromak no ema seluk sai malirin. (Mateus 24:12) Tan neʼe, hahalok hanoin an deʼit aumenta liután.

• Diabu Satanás soe tun tiha ona mai rai. (Apokalipse 12:9, 12) Husi tempu neʼebá, nia fó influénsia ba ema atu sai hanoin an liután.—1 João 5:19.

Saida mak ita presiza halo?

Bíblia hatete: “Hasees an husi ema sira hanesan neʼe.” (2 Timóteo 3:5) Neʼe la dehan katak ita lakohi ransu hamutuk ho ema seluk. Maibé ita presiza kuidadu atu la habelun ho ema neʼebé hanoin an deʼit no la hamtaʼuk Maromak.—Tiago 4:4.

Ema hotu nia hahalok sei sai aat liután ka lae?

Lae. Bíblia hatete katak ema balu sei “triste no halerik tanba buat aat hotu neʼebé ema halo”. (Ezequiel 9:4) Sira sei la haburas hahalok hanoin an deʼit no sira moris tuir Maromak nia matadalan. Sira-nia dalan koʼalia no hahalok la hanesan duni ho ema barak iha mundu neʼe. (Malaquias 3:16, 18) Porezemplu, sira sei koko atu mantein dame ho ema seluk no la envolve an iha funu no mós violénsia.—Miqueias 4:3.

Ema hotu nia hahalok ikusmai sei sai aat loos toʼo labele kontrola tan ka lae?

Lae. Maromak sei la husik hahalok aat no violénsia domina mundu. Lakleur tan Maromak sei halakon ema neʼebé kontra Maromak nia matadalan. (Salmo 37:38) Maromak sei halo “rai foun” neʼebé ema laran-maus deʼit mak sei moris ho dame ba nafatin. (2 Pedro 3:13; Salmo 37:11, 29) Esperansa neʼe laʼós mehi deʼit. Ohin loron, Bíblia ajuda daudaun ema barak atu troka sira-nia moris hodi tuir Maromak nia dalan neʼebé loos.—Éfeso 4:23, 24.