Polítiku-naʼin sira fó avizu kona-ba Armagedon—Saida mak Bíblia dehan?

Iha segunda dadeer, 10 Outubru 2022, Rúsia tiru misil barak iha Ukránia tomak atu selu fali buat neʼebé akontese loron rua antes neʼe bainhira bomba harahun ponte importante neʼebé liga Krimeia no Rúsia. Akontesimentu neʼe mosu lakleur depois polítiku-naʼin sira fó avizu katak Armagedon sei mai.

• “Husi tempu neʼebé [Prezidente U.S. John F.] Kennedy no krize ho misil iha Kuba, ita seidauk hasoru perigu boot atu Armagedon mosu mai. . . . Haʼu fiar katak se uza armas nukleár, neʼe sei hamosu duni Armagedon.”—Prezidente U.S. Joe Biden, 6 Outubru 2022.

• “Haʼu konkorda katak ita besik loos ona tama ba Armagedon, neʼe mak risku ba planeta tomak.”—Prezidente Ukránia Volodymyr Zelensky nia liafuan kuandu hatán ba pergunta husi BBC News kona-ba konsekuénsia husi uza armas nukleár, 8 Outubru 2022.

Armas nukleár sei hamosu Armagedon ka lae? Saida mak Bíblia dehan?

Armas nukleár sei hamosu Armagedon ka lae?

Lae. Liafuan “Armagedon” mosu dala ida deʼit iha Bíblia iha Apokalipse 16:16. Neʼe la refere ba funu entre nasaun maibé funu entre Maromak no “liurai sira iha mundu tomak”. (Apokalipse 16:14) Maromak sei uza funu Armagedon atu halakon ema nia ukun.—Daniel 2:44.

Atu aprende liután kona-ba Armagedon sei lori impaktu saida mai mundu, lee informasaun Saida mak funu Armagedon?

Mundu no kriatura moris sei lakon hotu liuhusi funu nukleár ka lae?

Lae. Maski ukun-naʼin sira iha mundu neʼe karik uza armas nukleár iha futuru, Maromak sei la husik ida-neʼe atu halakon planeta mundu. Bíblia dehan:

• “Mundu iha ba nafatin.”—Eclesiastes 1:4.

• “Ema laran-loos sira sei simu rai nuʼudar sira-nian, no sira sei moris ba nafatin iha rai.”—Salmo 37:29.

Bíblia nia profesia no akontesimentu oioin ohin loron hatudu katak lakleur tan sei mosu akontesimentu boot ida neʼebé sei troka ema nia istória. (Mateus 24:3-7; 2 Timóteo 3:1-5) Buka-hatene saida mak Bíblia dehan kona-ba futuru liuhusi ami-nia kursu Bíblia interativu.