Saida mak funu Armagedon?
Bíblia nia resposta
Armagedon refere ba funu ikus entre ema nia governu ho Maromak. Governu no ema sira neʼebé apoia sira kontra daudauk Maromak tanba lakohi hakruʼuk ba Maromak nia ukun. (Salmo 2:2) Funu Armagedon mak sei halakon tiha ema nia ukun hotu.—Daniel 2:44.
Liafuan Armagedon akontese dala ida deʼit iha Bíblia, iha Apokalipse 16:16. Profesia husi livru Apokalipse fó sai katak “fatin ida neʼebé iha lian Ebraiku hanaran Armagedon,” “liurai sira iha rai tomak” sei halibur “hamutuk ba funu neʼebé mosu iha Maromak Kbiit Boot Liu Hotu nia loron boot”.—Apokalipse 16:14.
Se mak sei kontra malu iha funu Armagedon? Jesus Kristu sei dirije tropa husi lalehan atu halakon Maromak nia inimigu hotu. (Apokalipse 19:11-16, 19-21) Inimigu sira-neʼe inklui ema neʼebé kontra Maromak nia podér no la hatudu respeitu ba nia.—Ezequiel 39:7.
Funu Armagedon sei akontese duni iha Médiu Oriente ka lae? Lae. Neʼe laʼós akontese iha área ida deʼit, funu neʼe sei akontese iha mundu tomak.—Jeremias 25:32-34; Ezequiel 39:17-20.
Armagedon, dala ruma temi “Har Magedón” (Lian Ebraiku Har Meghiddohn), katak “Foho Megido”. Megido mak uluk sidade ida iha tempu Izraél antigu. Istória hatudu kona-ba funu neʼebé akontese iha área neʼe, inklui funu balu neʼebé hakerek iha Bíblia. (Juís 5:19, 20; 2 Reis 9:27; 23:29) Maibé, Armagedon laʼós refere ba fatin neʼebé tebes iha Megido antigu. La iha foho boot iha neʼebá, no rai tetuk hotu iha Jezreel mós labele halibur ema hotu atu funu hasoru Maromak. Armagedon mak situasaun ida iha mundu tomak neʼebé nasaun hotu sei halibur malu ba dala ikus atu kontra Maromak nia ukun.
Iha funu Armagedon, situasaun sei sai hanesan saida? Ita la hatene Maromak sei uza saida atu hatudu sai ninia forsa, maibé nia bele uza buat oioin hanesan buat neʼebé nia uza iha tempu uluk hanesan udan jelu, rai-nakdoko, udan boot, ahi, rai-lakan no moras. (Job 38:22, 23; Ezequiel 38:19, 22; Habakuk 3:10, 11; Zacarias 14:12). Situasaun sei aat, Maromak nia inimigu balu sei sai bilán no runguranga toʼo sira rasik mak sei oho malu, no ikusmai sira hotu sei rekoñese katak Maromak mak halo daudauk funu hasoru sira.—Ezequiel 38:21, 23; Zacarias 14:13.
Armagedon sei halakon tiha planeta mundu neʼe ka lae? Armagedon sei la halakon planeta mundu, tanba mundu mak ema nia hela fatin ba nafatin. (Salmo 37:29; 96:10; Eclesiastes 1:4) Armagedon laʼós atu halakon ema hotu maibé atu lori salvasaun, tanba Maromak nia atan ka “ema-lubun boot” sei hetan salvasaun.—Apokalipse 7:9, 14; Salmo 37:34.
Dala barak Bíblia uza liafuan “mundu” hodi refere ba ema neʼebé kontra Maromak. (1 João 2:15-17) Tan neʼe, mundu neʼebé Armagedon sei halakon tiha mak kona-ba ema neʼebé kontra Maromak.—Mateus 24:3, King James Version.
Bainhira mak Armagedon sei akontese? Bainhira koʼalia kona-ba “terus boot” neʼebé sei lori ita ba Armagedon, Jesus hatete: “Kona-ba loron no oras, ema ida la hatene, anju sira iha lalehan la hatene no Oan-Mane mós la hatene, só Aman deʼit mak hatene.” (Mateus 24:21, 36) Maski nuneʼe, Bíblia hatudu katak Armagedon sei akontese durante tempu neʼebé Jesus toʼo ona mai neʼebé hahú husi 1914.—Mateus 24:37-39.