Funu Armagedon sei hahú iha Izraél ka lae?—Saida mak Bíblia dehan?

Bíblia koʼalia kona-ba Armagedon, laʼós nuʼudar konflitu iha área ida, maibé nuʼudar funu entre Maromak ho ema nia governu hotu iha mundu tomak.

• “Liafuan sira-neʼe mai husi anju aat . . . Sira halibur hamutuk liurai sira iha mundu tomak, atu bá funu iha Maromak neʼebé Kbiit Boot Liu Hotu nia loron boot. . . . Sira hamutuk iha fatin ida neʼebé iha lian Ebraiku hanaran Armagedon.”—Apokalipse 16:14, 16.

“Armagedon” mai husi liafuan Ebraiku Har Meghid·dohnʹ, neʼebé signifika “Foho Megido”. Megido mak sidade ida iha rai-Izraél antigu. Tan neʼe, ema balu hanoin katak funu Armagedon sei akontese iha Izraél. Maski nuneʼe, área Megido no mós área seluk iha Médiu Oriente nia luan la toʼo atu halibur “liurai sira iha mundu tomak” no sira-nia tropa hotu hodi halo funu.

Livru Apokalipse hakerek hodi fó sai “sinál oioin”, ka liafuan simbóliku neʼebé reprezenta buat ruma. (Apokalipse 1:1) Tan neʼe, Armagedon la refere ba fatin espesífiku ida, maibé neʼe refere ba situasaun iha mundu tomak neʼebé nasaun hotu halibur hamutuk hodi halo funu hasoru Maromak ba dala ikus.—Apokalipse 19:11-16, 19-21.