Manán hasoru sentimentu mesamesak hodi habelun ho ema seluk—Oinsá Bíblia bele ajuda?

Iha tinan 2023, matenek-naʼin sira kona-ba saúde rekoñese katak sentimentu mesamesak mak problema neʼebé fó impaktu sériu ba ema nia saúde. Problema neʼe iha solusaun ka lae?

• Dr. Vivek Murthy, U.S. surgeon general dehan: “Bainhira ita sente mesamesak no izola an husi ema seluk, neʼe bele estraga duni ita-nia saúde no halakon ksolok.” Maibé nia mós dehan: “Ita bele halo buat ruma. . . . Ita bele halo buat neʼebé kiʼik loroloron atu hametin relasaun ho ema seluk”.a

Sentimentu mesamesak laʼós deʼit rezultadu husi izola an. Ema balu sente mesamesak maski hamutuk hela ho ema seluk. Bíblia bele ajuda ita maski ita iha razaun oioin atu sente mesamesak. Bíblia fó sai sujestaun oioin kona-ba oinsá atu hametin ita-nia relasaun ho ema seluk, no neʼe bele ajuda ita atu manán hasoru sentimentu mesamesak.

Bíblia nia matadalan neʼebé bele ajuda ita

Komunika diʼak ho ema seluk. Atu komunika malu ho diʼak, la toʼo atu fó sai deʼit Ita-nia sentimentu ba ema seluk, maibé Ita mós presiza sai rona-naʼin neʼebé diʼak ba ema seluk bainhira sira fó sai sira-nia sentimentu. Kuandu Ita hatudu liután interese ba ema seluk, Ita-nia relasaun ho sira sei sai metin liután.

• Bíblia nia prinsípiu: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.

Sai kolega ho ema oioin. Prontu atu sai kolega ho ema neʼebé idade la hanesan ho Ita, ka ema neʼebé iha kultura la hanesan ka husi nasaun seluk.

• Bíblia nia prinsípiu: ‘Loke luan imi-nia laran bá.’—2 Korinto 6:13.

Atu hetan informasaun liután kona-ba oinsá atu haburas relasaun neʼebé diʼak ho ema seluk, lee informasaun “Memuaskan Rasa Lapar akan Persahabatan”.