Bainhira mak funu sei remata?—Saida mak Bíblia dehan?

“Agora mak tempu atu hamenus no hapara perigu sira. Agora mak tempu atu kontrola an,” Sekretáriu jerál husi Nasoins Unidas, António Guterres hatete liafuan sira-neʼe bainhira Iraun ataka Izraél iha loron-sábadu, 13 Abríl 2024.

Funu iha Médiu Oriente mak ezemplu ida deʼit kona-ba buat neʼebé akontese daudaun iha mundu tomak.

“Husi tempu neʼebé Funu Mundiál Segundu remata, agora mak funu no konflitu akontese barak liu iha mundu tomak, no neʼe afeta ema biliaun rua nia moris.”—Konsellu Seguransa ONU, 26 Janeiru 2023.

Área sira neʼebé envolve iha konflitu inklui Izraél, Gaza, Síria, Azerbaijaun, Ukránia, Sudaun, Etiópia, Nijer, Myanmar, no Haití.a

Bainhira mak funu sei remata? Lideransa sira iha mundu bele lori dame ka lae? Saida mak Bíblia dehan?

Funu iha mundu neʼe

Konflitu iha mundu tomak mak sinál neʼebé hatudu katak lakleur tan funu hotu sei remata. Funu sira-neʼe kumpre profesia iha Bíblia kona-ba tempu neʼebé ita moris daudaun. Bíblia hanaran tempu neʼe nuʼudar “mundu neʼe nia rohan”.—Mateus 24:3.

• “Imi sei rona kona-ba funu iha fatin oioin, . . . Nasaun ida sei kontra nasaun seluk no ukun ida sei kontra ukun seluk.”—Mateus 24:6, 7.

Lee informasaun “Saida mak sinál kona-ba ’loron ikus sira’, ka ’mundu neʼe nia rohan’?” atu haree oinsá mak funu ohin loron kumpre profesia iha Bíblia.

Funu neʼebé sei hapara funu hotu

Bíblia fó-hatene nanis katak ema nia konflitu sira sei remata. Oinsá mak neʼe sei akontese? Laʼós ema mak sei halakon funu, maibé neʼe sei akontese liuhusi Armagedon, “funu iha Maromak neʼebé Kbiit Boot Liu Hotu nia loron boot”. (Apokalipse 16:14, 16) Depois funu Armagedon remata, Maromak sei kumpre ninia promesa ba ema atu moris iha dame ba nafatin.—Salmo 37:10, 11, 29.

Atu aprende liután kona-ba Maromak nia funu sei hapara funu hotu, lee informasaun “Saida mak funu Armagedon?”