Funu iha Médiu Oriente​—Saida mak Bíblia dehan?

Ema iha mundu tomak hanoin barak kona-ba saida mak sei akontese tuirmai ho konflitu entre Estadus Unidus, Izraél no Iraun. Situasaun sei sai manas liután no sai funu boot neʼebé sei afeta nasaun barak ka lae? Governu sira bele halo buat ruma atu konflitu neʼe la sai boot no lori dame ba mundu tomak ka lae?

Ema neʼebé hatene kona-ba Bíblia nia profesia karik hanoin katak konflitu neʼebé akontese iha Médiu Oriente mak sei sai funu Armagedon neʼebé temi iha livru Apokalipse.

Saida mak Bíblia dehan?

Governu sira sei hapara funu iha Médiu Oriente ka lae?

Bíblia hatete: “Imi keta tau fiar ba ulun-naʼin sira ka ema neʼebé labele lori salvasaun.”—Salmo 146:3.

Ita la hatene se governu sira sei hetan susesu atu lori dame ba Médiu Oriente ka lae. Maibé, Bíblia fó sai ho klaru katak la iha ulun-naʼin polítiku, ema nia governu, ka grupu ruma mak bele hapara funu no lori dame ba nafatin. Só Maromak deʼit mak bele “hapara funu sira iha mundu tomak”.—Salmo 46:9.

• Atu aprende liután, lee Livru Haklaken ho títulu “Funu sei remata ka lae?”

Funu iha Médiu Oriente kumpre profesia ka lae?

Bíblia hatete: “Imi sei rona kona-ba funu iha fatin oioin. . . . Nasaun ida sei kontra nasaun seluk no ukun ida sei kontra ukun seluk.”—Mateus 24:6, 7.

Konflitu neʼebé akontese daudaun iha Médiu Oriente mak sai evidénsia ida tan katak ita moris iha “mundu neʼe nia rohan”, neʼebé Bíblia mós temi nuʼudar “loron ikus sira”. (Mateus 24:3; 2 Timóteo 3:1) Funu sira neʼebé ita haree ohin loron hatudu katak lakleur tan Maromak sei hapara funu no problema sira seluk neʼebé lori susar ba ema.

• Atu aprende liután, lee informasaun “Saida mak sinál kona-ba ‘loron ikus sira’, ka ‘mundu neʼe nia rohan’?”

Funu Armagedon sei komesa iha Médiu Oriente ka lae?

Bíblia hatete: “Sira halibur liurai sira hamutuk iha fatin ida neʼebé iha lian Ebraiku hanaran Armagedon.”—Apokalipse 16:16.

Funu Armagedon laʼós funu entre ema nia governu sira neʼebé komesa iha Médiu Oriente. Neʼe mak funu entre Maromak ho ema nia governu hotu no afeta mundu tomak.

• Atu aprende liután, lee informasaun “Saida mak funu Armagedon?”

Saida mak bele ajuda ita atu sente kalma bainhira akontese buat aat oioin?

Bíblia hatete: “Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan no mós fó agradese.”—Filipe 4:6.

Maromak Jeováa hakarak ita atu halo orasaun ba nia. Tanba Maromak hanoin ita, nia sei rona ita-nia orasaun no ajuda ita atu tahan ita-nia laran-taridu hotu. (1 Pedro 5:7) Dalan ida neʼebé nia halo ida-neʼe mak hodi ajuda ita komprende tanbasá akontese funu, no mós oinsá funu sira sei remata no saida mak nia sei halo atu halakon ita-nia terus hotu.—Apokalipse 21:3, 4.

• Atu aprende liután kona-ba oinsá Maromak sei fó ajuda ba ita, lee informasaun “Haʼu bele hetan kmaan husi Bíblia nia liafuan ka lae?”