Terus hotu mai husi Diabu ka lae?

Bíblia nia resposta

Bíblia fó sai katak Diabu Satanás iha duni. Hanesan ulun-naʼin ba grupu kriminozu ida, Diabu Satanás uza “sinál bosok” no “lia-bosok oioin hodi lohi ema” atu kumpre ninia hakarak. Tuir loloos, Bíblia dehan katak nia “kontinua finje sai hanesan anju naroman nian”. (2 Tesalónika 2:9, 10; 2 Korinto 11:14) Ita bele rekoñese katak Satanás iha duni kuandu haree buat aat oioin neʼebé nia halo.

Maski nuneʼe, laʼós Diabu mak hamosu terus hotu. Tanbasá? Maromak kria ema ho abilidade atu deside rasik kona-ba halo buat neʼebé diʼak ka la diʼak. (Josué 24:15) Kuandu ita foti desizaun neʼebé la diʼak, ita sei hetan konsekuénsia aat.—Galásia 6:7, 8.