Oinsá atu bele komprende Bíblia?

Bíblia nia resposta

Bíblia rasik esplika saida mak ita presiza halo atu bele komprende Bíblia. Maski ita husi situasaun la hanesan, Maromak nia mensajen iha Bíblia ‘mak laʼós buat neʼebé susar liu ba ita, ka dook liu husi ita’.—Deuteronómio 30:11.

Dalan oinsá atu bele komprende Bíblia

1. Iha hanoin neʼebé loos. Ita tenke haree Bíblia nuʼudar Maromak nia Liafuan. Haraik an, tanba Maromak la gosta hahalok foti an. (1 Tesalónika 2:13; Tiago 4:6) No labele fiar ba buat ruma se la iha faktu. Maromak hakarak Ita atu uza ita-nia “kbiit atu hanoin”.—Roma 12:1, 2.

2. Halo orasaun husu matenek. Bíblia hatete iha Provérbios 3:5: “Labele sadere ba ó-nia matenek rasik.” Maibé “tenke husu beibeik ba Maromak” atu fó ita matenek hodi bele komprende Bíblia.—Tiago 1:5.

3. Estuda beibeik Bíblia. Duké dala ruma deʼit mak estuda Bíblia, diʼak atu halo ida-neʼe beibeik tanba neʼe sei lori benefísiu barak ba Ita.—Josué 1:8.

4. Estuda tuir tópiku. Neʼe katak ita hili tópiku ida atu analiza saida mak Bíblia hatete kona-ba tópiku neʼe. Neʼe mak dalan diʼak ida atu aprende kona-ba eskritura sira. Hahú hodi aprende “hanorin báziku”, no tuirmai “laʼo ba oin hodi sai ema maduru” liuhusi aprende kona-ba buat neʼebé kleʼan liután. (Ebreu 6:1, 2) Ita bele kompara eskritura ida ho eskritura seluk no haree katak parte balu iha Bíblia laran bele esplika fali parte seluk, maski parte sira neʼebé “susar atu komprende”.—2 Pedro 3:16.

5. Husu ajuda husi ema seluk. Bíblia anima ita atu husu ajuda husi ema seluk neʼebé komprende didiʼak Bíblia. (Apóstolu 8:30, 31) Testemuña ba Jeová oferese programa estudu Bíblia gratuitu. Hanesan ema Kristaun tempu uluk, sira uza eskritura sira atu ajuda ema seluk komprende loloos saida mak Bíblia hanorin.—Apóstolu 17:2, 3.

Buat neʼebé Ita la presiza

1. Iha matenek ka eskola boot. Jesus nia apóstolu naʼin-12 komprende Eskritura sira no hanorin fali ba ema seluk, maski ema balu haree sira hanesan ema neʼebé “la eskola no ema baibain deʼit”.—Apóstolu 4:13.

2. Osan. Ita bele aprende Bíblia hodi la selu. Jesus hatete ba ninia dixípulu sira: “Imi simu hodi la selu, tan neʼe fó mós hodi la hein atu ema selu imi.”—Mateus 10:8.