Ita hakarak atu hatene liu kona-ba Bíblia?

Tansá lee Bíblia?

BÍBLIA la hanesan livru sira seluk​—nia iha instrusaun neʼebé domin husi Maromak. (1 Tesalonia 2:13) Se Ita aplika buat saida neʼebé Bíblia hanorin, Ita sei hetan benefísiu boot. Ita sei aumenta Ita-nia domin ba Maromak no sei hakbesik ba nia, Fó-naʼin “presente diak ida-ida no kmanek lo-los ida-ida.” (Tiago[Yakobus] 1:17) Ita sei hatene oinsá atu hakbesik nia iha orasaun. Durante tempu susar nia laran, Ita bele simu Maromak nia ajuda. Se Ita halaʼo Ita-nia moris tuir norma sira neʼebé Bíblia hatoʼo, Maromak sei fó ba Ita moris rohan laek.​—Roma 6:23.

Bíblia iha lia-loos sira neʼebé fó esklaresimentu. Sira neʼebé hetan koñesimentu Bíblia nian sai livre husi hanoin sala sira neʼebé domina ema tokon sira nia moris. Porezemplu, hatene lia-loos kona-ba saida maka mosu depois ita mate, liberta ita husi taʼuk katak ema mate bele halo aat mai ita ou katak ita-nia maluk i kolega sira maka mate ona terus hela. (Eclesiastes[Pengkhotbah] 9:5, 10) Bíblia nia hanorin kona-ba resurreisaun fó konsolu ba sira neʼebé lakon tiha ona ema neʼebé sira hadomi iha mate. (Joao 11:25) Hatene lia-loos kona-ba anju aat sira halo ita matan-moris ba perigu sira husi espiritizmu no ajuda ita atu komprende tansá iha susar barak iha rai.

Maromak nia prinsípiu sira iha Bíblia laran hatudu mai ita oinsá atu moris iha dalan ida neʼebé lori benefísiu fíziku sira. Porezemplu, “hatene ukun an” [“moderadu iha kostume sira” NWa] kontribui ba saúde diʼak. (1 Timoteo 3:2) Hodi “hamos ita an housi buat foer hotu isin no klamar nian,” ita la estraga ita-nia saúde. (2 Korinto 7:1) Aplika Maromak nia konsellu iha Bíblia laran mós ajuda atu hetan ksolok iha kaben laran no respeita an.​—1 Korinto 6:18.

Se Ita aplika Maromak nia Liafuan, Ita sei sai ema ida haksolok liu. Koñesimentu Bíblia nian ajuda ita atu hetan dame iha laran no kontentamentu no fó mai ita esperansa. Nia ajuda ita atu haburas kualidade furak sira hanesan kompaixaun, domin, ksolok, dame, laran-diʼak, no fé. (Galasia 5:​22, 23; Efeso 4:​24, 32) Kualidade sira hanesan neʼe ajuda ita atu sai diʼak liu nuʼudar laʼen ou feen, aman ou inan, oan-mane ou oan-feto.

Dala ruma, Ita husu an kona-ba futuru ka lae? Profesía sira Bíblia nian hatudu mai ita katak ita moris iha tempu importante liu iha istória ema nian. Profesía hirak-neʼe laʼós deʼit deskreve kondisaun mundu nian ohin-loron, maibé sira mós hatudu katak Maromak besik ona atu halo rai sai paraízu ida.​—Apokalipse(Wahyu) 21:​3, 4.

Ajuda atu komprende Bíblia

Dala ruma Ita koko atu lee Bíblia maibé hetan susar atu komprende. Karik Ita la hatene iha-neʼebé atu buka hetan resposta ba Ita-nia pergunta sira iha Bíblia laran. Se nuneʼe, Ita laʼós mesak deʼit. Ita hotu presiza ajuda atu komprende Maromak nia Liafuan. Jeová nia Testemuña sira, iha rai maizumenus 235, fó instrusaun husi Bíblia gratis ba ema tokon sira. Sira sei kontente atu ajuda Ita mós.

Bain-bain, diʼak liu atu estuda Bíblia hakat ba hakat, hahú ho hanorin báziku sira. (Ebreu[Ibrani] 6:1) Nuʼudar Ita kontinua, sei sai fásil liu ba Ita atu simu “etu tasak” [“hahán toos” NW]​—ida-neʼe maka lia-loos sira kleʼan liu. (Ebreu[Ibrani] 5:14) Bíblia mak autoridade. Publikasaun neʼebé bazeia ba Bíblia, hanesan broxura Apa yang Allah Tuntut dari Kita?, sei ajuda Ita atu komprende referénsia Eskritura nian kona-ba tópiku oin-oin.

Ita prontu atu fó tempu kada semana atu komprende Bíblia?

Bain-bain, ami bele arranja estudu ida Bíblia nian iha tempu no fatin ruma diʼak liu ba Ita. Ema barak estuda iha sira-nia uma rasik. Ema balu mós estuda liu husi telefone. Estudu laʼós iha klase ho ema barak, maibé arranju ida neʼebé haktuir Ita-nia situasaun pesoál, inklui Ita-nia nivel koñesimentu no edukasaun nian. La iha ezame, no Ita sei la sente moe. Ita-nia pergunta sira husi Bíblia sei hetan resposta, i Ita sei aprende atu hakbesik ba Maromak.

Ita la presiza atu selu ba estudu Bíblia nian neʼe. (Mateus 10:8) Ida-neʼe fó gratis deʼit ba ema husi relijiaun hotu no sira neʼebé maka la pratika relijiaun ida maibé hakarak duni atu aumenta sira-nia koñesimentu kona-ba Maromak nia Liafuan.

Sé maka bele partisipa iha estudu neʼe? Ita-nia família tomak. Maluk ruma neʼebé Ita hakarak konvida mós bele partisipa. Ou, se Ita hakarak liu, bele halo estudu neʼe ho Ita deʼit.

Ema barak rai oras ida kada semana atu estuda Bíblia. Se Ita bele fó tempu barak liu tan ou uitoan liu kada semana, Jeová nia Testemuña sira sei halo sira-nia an prontu atu ajuda Ita.

Konvite atu aprende

Ami konvida Ita atu kontakta Jeová nia Testemuña sira. Dalan ida Ita bele halo ida-neʼe maka hakerek ba diresaun iha kraik. Ami depois sei halo arranju para ema ida atu halaʼo estudu-bíblia uma nian neʼebé gratis ho Ita.

□ Haruka mai haʼu broxura ida Apa yang Allah Tuntut dari Kita? Indika língua saida.

□ Fó informasaun mai haʼu oinsá atu hetan estudu-bíblia uma nian neʼebé gratis.