Tansá mak Testemuña ba Jeová la simu transfuzaun raan?

Ema barak hanoin sala kona-ba ami, porezemplu:

Ema nia hanoin sala: Testemuña ba Jeová la fiar ba ospitál. Sira lakohi halo tuir doutór sira kona-ba hemu ai-moruk ka simu tratamentu ruma.

Realidade: Ami Testemuña ba Jeová buka duni tratamentu médiku nian neʼebé diʼak ba ami-nia an rasik no ba ami-nia família. Bainhira ami iha moras ruma, ami buka doutór matenek sira atubele hetan tratamentu diʼak ka halo operasaun neʼebé la presiza uza transfuzaun raan. Tuir loloos, tratamentu balu neʼebé foufoun doutór sira uza deʼit ba ami Testemuña sira neʼebé la simu raan, ikusmai doutór sira aumenta sira-nia matenek no ohin loron uza tratamentu hanesan neʼe ba pasiente seluk. Iha rai balu, doutór sira tenke husu pasiente sira atu hili se sira hakarak simu raan ka lakohi, tanba transfuzaun raan mós bele lori perigu ba ema nia saúde, hanesan daʼet ema seluk nia moras, ka ema ida-nia raan la simu malu ho pasiente nia isin.

Ema nia hanoin sala: Testemuña ba Jeová tau fiar ba milagre kona-ba kura fiar-naʼin nia moras.

Realidade: Iha ami Testemuña ba Jeová nia leet, la iha ema ida mak halo milagre hanesan kura ema nia moras.

Ema nia hanoin sala: Se pasiente ida la simu transfuzaun raan no hetan fali tratamentu seluk, ida-neʼe han osan barak tebes.

Realidade: Tratamentu médiku neʼebé la uza transfuzaun raan bele hamenus osan neʼebé pasiente tenke gasta.a

Ema nia hanoin sala: Tinan-tinan Testemuña barak inklui mós sira-nia oan sira mate tanba sira lakohi simu transfuzaun raan.

Realidade: Hanoin hanesan neʼe sala duni. Doutór matenek sira halo operasaun oioin neʼebé komplikadu tebes, hanesan operasaun fuan, kanuruk, ka transfere ema nia orgaun hodi la uza transfuzaun raan.b Pasiente sira, ema boot no labarik sira, neʼebé la simu raan, sira baibain sai isin-diʼak lalais liu fali pasiente sira neʼebé simu transfuzaun raan.c Tuir loloos, la iha ema ida mak bele hatene ho loloos se pasiente ida sei mate tanba nia la simu transfuzaun raan, ka nia sei moris kuandu nia simu raan.

Tansá mak Testemuña ba Jeová la simu transfuzaun raan?

Ami la simu transfuzaun raan tanba ami-nia fiar. Iha Bíblia Testamentu Tuan no Testamentu Foun hotu haruka ema atu hadook an husi raan. (Gênesis 9:4; Levítico 17:10; Deuteronômio 12:23; Apóstolu 15:28, 29) Liután neʼe, tuir Maromak nia haree, raan reprezenta moris. (Levítico 17:14) Nuneʼe, ami lakohi simu raan laʼós deʼit tanba ami tenke halo tuir Maromak, maibé mós tanba ami respeitu Maromak nuʼudar Hun ba ami-nia moris.

Mudansa ba doutór sira-nia hanoin

Tinan barak liubá, doutór barak hanoin katak ema neʼebé la simu transfuzaun raan mak hanesan ema fanátiku sira neʼebé hakarak oho an, maibé ohin loron, sira troka sira-nia hanoin. Porezemplu iha tinan 2004, jornál médiku nian ida fó sai kona-ba “métodu sira neʼebé doutór sira uza ba Testemuña ba Jeová”, katak “lakleur tan, doutór hotu sei uza métodu sira-neʼe”.d Iha tinan 2010 mós jornál ida naran Heart, Lung and Circulation hakerek: “‘operasaun neʼebé la uza raan’ laʼós deʼit ba pasiente Testemuña ba Jeová sira, maibé tenkesér implementa ba operasaun hotu neʼebé doutór sira halaʼo loroloron.”

Ohin loron, doutór rihun ba rihun uza métodu oioin atu pasiente sira labele lakon sira-nia raan durante halaʼo operasaun oioin neʼebé komplikadu. No ema barak iha rai kiak neʼebé laʼós Testemuña mós husu métodu hanesan neʼe tanba sira lakohi simu ema seluk nia raan.