Diabu hela iha neʼebé?

Bíblia nia resposta

Nuʼudar kriatura espíritu, Diabu hela iha fatin neʼebé ita labele haree ho matan. Maibé, neʼe la dehan katak nia hela iha infernu no fó kastigu ba ema aat sira, hanesan dezeñu iha lisaun neʼe.

Funu iha lalehan

Uluk, Diabu Satanás bele bá-mai lalehan tuir ninia hakarak, inklui tama iha Maromak nia oin hamutuk ho anju sira neʼebé laran-metin. (Job 1:6) Maibé, Bíblia fó sai nanis katak sei mosu funu iha lalehan no rezultadu mak Satanás sei duni sai tiha husi lalehan no “soe tun tiha ba rai”. (Apokalipse 12:7-9) Bíblia no istória mundu nian fó prova katak funu iha lalehan neʼe akontese ona. Diabu la livre ona atu saʼe ba lalehan no agora ninia fatin mak iha mundu neʼe.

Neʼe katak Diabu hela iha fatin ida iha ita-nia planeta ka lae? Porezemplu, sidade antigu Pérgamo bolu nuʼudar “fatin neʼebé Satanás tau ninia kadunan” no “iha fatin neʼebé Satanás hela bá”. (Apokalipse 2:13) Tuir loloos, liafuan sira-neʼe refere ba adorasaun falsu neʼebé barak iha sidade neʼe. Bíblia hatete katak Diabu ukun “nasaun hotu iha mundu tomak”, tan neʼe nia la hela iha fatin ida maibé nia bá-mai haleʼu mundu neʼe.​—Lucas 4:​5, 6.