Haʼu kumpre duni haʼu-nia hakarak atu ajuda ema neʼebé defisiente tilun

Haʼu moris iha tinan 1941 no haʼu ho família hela iha Virrat, Finlándia. Haʼu-nia inan-aman, haʼu-nia alin-mane, alin-feto no família seluk mós defisiente tilun. Ami komunika ba malu ho língua jestuál.

Aprende buat furak sira husi Bíblia

Haʼu-nia eskola dook husi uma maizumenus kilómetru 240, no eskola neʼe bandu ami atu la uza língua jestuál. Iha tempu neʼebá, ami neʼebé tama eskola ba defisiente tilun iha Finlándia tenke aprende língua neʼebé ema uza no lee ema nia ibun. Se ami-nia mestre haree ami uza língua jestuál, sira sei baku ami makaʼas ho régua ka ai-tonka, no neʼe halo ami-nia liman-fuan bubu ba loron balu.

Depois remata eskola sekundária, haʼu estuda kona-ba agrikultura iha universidade. Haʼu-nia família iha toʼos, no ami presiza aprende kona-ba negósiu nuʼudar agrikultór. Loron ida, bainhira haʼu fila ba uma, haʼu haree livru Haklaken no Matan-moris bá! iha meza leten. Haʼu-nia apá fó-hatene haʼu katak revista sira-neʼe esplika kona-ba buat furak sira husi Bíblia no apá amá estuda Bíblia ho ema neʼebé bele koʼalia ba tempu balu ona. Sira komunika ho haʼu-nia apá amá hodi uza lapizeira no surat-tahan.

Haʼu-nia apá fó-hatene haʼu katak iha Maromak nia Ukun okos, rai sei sai paraízu furak no ema mate sira sei moris-hiʼas fali. Maibé antes neʼe, haʼu aprende katak ema neʼebé mate ona sei bá lalehan. Haʼu hanoin apá komprende sala kona-ba buat neʼebé Testemuña sira hanorin, tanba sira komunika ho apá la uza língua jestuál.

Bainhira kaben-naʼin neʼe vizita fali haʼu-nia apá amá, haʼu husu sira kona-ba buat neʼebé haʼu-nia apá hatete ba haʼu. Sira hatán: “Ita-nia apá esplika ho loos.” Tuirmai sira hatudu ba haʼu buat neʼebé Jesus hatete kona-ba moris-hiʼas iha João 5:28, 29. Sira mós esplika oinsá Maromak sei hamoos buat aat hotu husi mundu neʼe no ema sei moris ba nafatin ho saúde neʼebé perfeitu no dame.—Salmo 37:10, 11; Daniel 2:44; Apokalipse 21:1-4.

Haʼu hakarak hatene liután, entaun haʼu komesa aprende Bíblia ho Testemuña ida naran Antero, neʼebé la defisiente tilun. Nia la hatene língua jestuál, tan neʼe haʼu hatán pergunta sira husi livru estuda hodi hakerek resposta iha surat-tahan. Tuirmai Antero lee haʼu-nia resposta sira no hakerek fali pergunta ka komentáriu seluk. Nia hatudu pasiénsia bainhira estuda ho haʼu kada semana ba oras rua iha dalan hanesan neʼe.

Iha tinan 1960, haʼu asiste reuniaun boot husi Testemuña ba Jeová no programa sira interpreta ona ba língua jestuál. Iha loron-sesta lokraik, iha avizu ida katak aban sei iha batizmu. Entaun, iha loron-sábadu dadeer, haʼu lori haʼu-nia roupa nani nian no toalla, no haʼu hetan batizmu!a Lakleur deʼit, haʼu-nia apá amá no alin sira mós hetan batizmu.

Fahe lia-loos husi Bíblia

Haʼu hakarak haklaken buat neʼebé haʼu aprende ona ba ema defisiente tilun sira seluk, no dalan diʼak liu atu hakbesik ba sira mak uza língua jestuál. Primeiru, haʼu haklaken ho laran-manas ba ema defisiente tilun sira iha haʼu-nia komunidade.

Lakleur, haʼu muda ba Tampere, sidade boot neʼebé iha fábrika barak. Haʼu buka ema defisiente tilun husi uma ba uma, hodi husu se uma-naʼin koñese ema neʼebé defisiente tilun. Haʼu komesa estuda Bíblia ho dalan neʼe, no iha tinan balu nia laran deʼit, Tampere iha haklaken-naʼin neʼebé defisiente tilun naʼin-10 liu.

Iha tinan 1965, haʼu hasoru irmán diʼak ida naran Maire. Ami kaben tinan tuirmai. Maire aprende língua jestuál lalais, no nia hatudu katak nia mak pár neʼebé laran-metin no badinas durante tinan 50 neʼebé ami serbí Jeová hamutuk.

Tinan rua depois ami kaben, ami iha oan-mane naran Marko neʼebé laʼós defisiente tilun. Iha uma, nia aprende lian Finlandés, ninia língua materna, no língua jestuál Finlándia. Marko hetan batizmu bainhira nia tinan 13.

Liutiha tempu balu, ema foun barak tuir grupu língua jestuál iha Tampere. Tan neʼe, iha tinan 1974, ami muda ba sidade Turku, fatin neʼebé seidauk iha Testemuña ho defisiente tilun. Dala ida tan, ami buka ema neʼebé defisiente tilun hodi laʼo husi uma ba uma. Durante tinan sira neʼebé ami hela iha Turku, haʼu-nia estudante Bíblia nain-12 mak hetan batizmu.

Haklaken iha área Báltiku

Iha tinan 1987, Marko hetan konvite atu serbí iha Betel. Ami-nia grupu língua jestuál iha Turku sai metin ona, entaun ami komesa halo planu atu muda ba fatin seluk fali.

Maizumenus iha tempu neʼebá, governu iha área Europa parte leste la bandu tan Testemuña ba Jeová. Entaun, iha Janeiru 1992, haʼu halo viajen hamutuk ho irmaun ida neʼebé defisiente tilun ba Tallinn, Estónia.

Ami kontaktu malu ho irmán ida neʼebé iha alin ho defisiente tilun. Maski alin neʼe la hatudu interese ba mensajen husi Bíblia, maibé nia ho laran-diʼak ajuda ami atu kontaktu ema Estónia barak neʼebé defisiente tilun. Iha ami-nia kalan ikus iha Tallin, nia lori ami tuir enkontru ida neʼebé asosiasaun ba ema defisiente tilun mak halaʼo. Ami toʼo sedu no tau publikasaun sira iha lian Estónia no lian Rusu iha meza leten. Ami fahe maizumenus livru 100 no revista 200 no hetan kontaktu maizumenus 70. Kalan neʼe mak loke dalan ba serbisu haklaken ho língua jestuál iha Estónia!

Lakleur depois neʼe, Maire no haʼu komesa vizita beibeik Estónia hodi haklaken. Ami hamenus ami-nia serbisu no serbí nuʼudar pioneiru regulár. Iha 1995, ami muda ba besik Helsinki tanba fasil ba ami atu halo viajen ba Tallinn ho ró. Ami-nia haklaken iha Estónia laʼo ba oin lalais liu fali buat neʼebé ami espera!

Ami iha estudante barak, no ami-nia estudante 16 laʼo ba oin no hetan batizmu, inklui biin-alin naʼin-rua neʼebé defisiente matan no defisiente tilun. Haʼu sei halaʼo estuda ho sira hodi uza língua jestuál maibé halo iha sira-nia liman laran, métodu neʼe hanaran língua jestuál tatil.

Estuda Bíblia ho ema neʼebé defisiente tilun mak difisil. Iha tempu neʼebá, la iha publikasaun ho língua jestuál iha ami-nia fatin, entaun haʼu uza beibeik dezeñu furak husi ita-nia publikasaun sira neʼebé haʼu tau hamutuk nuʼudar livru ida.

Sukursál iha Finlándia husu haʼu vizita Letónia no Lituánia atu buka-hatene saida mak ami bele halo atu ajuda serbisu haklaken ho língua jestuál iha nasaun sira iha área Báltiku. Ami vizita rai sira-neʼe dala balu no ajuda Testemuña iha área neʼe atu buka ema ho defisiente tilun. Besik rai sira-neʼe hotu iha ninia língua jestuál rasik. Entaun haʼu aprende língua jestuál Estónia, Letónia, no Lituánia, no mós língua jestuál Rusu, tanba iha ema barak ho defisiente tilun neʼebé mai husi Rúsia no hela iha área Báltiku.

Triste, halo tiha viajen ba tinan ualu ba Estónia no rai seluk iha área Báltiku, doutór fó-hatene katak Maire hetan moras Parkinson no ami tenke para viajen.

Sukursál organiza atu ajuda ema ho defisiente tilun

Iha tinan 1997, grupu tradusaun ba língua jestuál komesa iha sukursál Finlándia. Tanba ami hela besik, Maire no haʼu bele ajuda prepara publikasaun ho língua jestuál, no haʼu kontinua halo ajuda tradusaun toʼo agora. Ami serbisu hamutuk ami-nia oan Marko. Ikusmai, Marko hamutuk ho ninia feen Kirsi, ajuda treinu grupu tradusaun ba língua jestuál iha nasaun oioin.

Sukursál mós organiza ona kursu atu ajuda haklaken-naʼin sira neʼebé bele rona atu aprende língua jestuál. Tanba iha kursu neʼe, irmaun-irmán barak mak komesa hola parte iha grupu no kongregasaun língua jestuál, atu apoia serbisu haklaken no reuniaun, no mós ajuda halaʼo knaar iha kongregasaun.

Laran-manas nafatin atu haklaken

Iha tinan 2004, Maire no haʼu ajuda forma kongregasaun primeiru ba língua jestuál Finlándia iha Helsinki. Iha tinan tolu nia laran, kongregasaun neʼe sai metin no iha pioneiru barak neʼebé badinas.

Dala ida tan, ami komesa halo planu atu muda ba área neʼebé presiza liu haklaken-naʼin. Iha tinan 2008, ami muda besik ba Tampere no tuir fali grupu neʼebé uluk ami husik tinan 34 liubá. Tinan ida liu tiha, grupu língua jestuál neʼe sai kongregasaun língua jestuál segundu iha Finlándia.

Maire nia saúde sai aat ba beibeik. Haʼu ho kontente tau matan ba nia toʼo nia mate iha tinan 2016. Maski haʼu saudades tebes Maire, haʼu hein namanas atu hasoru fali nia iha mundu foun neʼebé sei la iha tan moras.—Isaias 33:24; Apokalipse 21:4.

Agora daudaun, haʼu laran-manas nafatin atu fahe liafuan diʼak ba haʼu-nia viziñu sira neʼebé defisiente tilun, neʼe mak atividade neʼebé haʼu halo durante tinan 60 nia laran!