Jeová fó bensaun ba serbisu neʼebé haʼu halo ho haʼu-nia liman

Haʼu sai boot hamutuk ho haʼu-nia biin no maun iha área besik sidade Bicester iha Bretaña. Iha tempu neʼebá, haʼu-nia inan-aman aluga uma kiʼik ida iha toʼos. Bainhira haʼu tinan 19, haʼu komesa serbí nuʼudar pioneiru hanesan haʼu-nia biin no maun. Tuirmai, haʼu simu knaar nuʼudar pioneiru espesiál iha Eskósia. Liután neʼe iha tinan 1970, bainhira haʼu tinan 23, haʼu hetan konvite atu serbí iha Betel Londres. Iha neʼebá mak haʼu “aprende” língua jestuál. Neʼe troka haʼu-nia moris, halo haʼu sai okupadu ba serbisu neʼebé nakonu ho bensaun oioin.

Aprende língua jestuál

Iha Betel, haʼu simu knaar atu serbí iha kongregasaun Mil Hill, iha kongregasaun neʼe mak haʼu hasoru Testemuña balu neʼebé defisiente tilun. Haʼu hakarak sai belun ho sira maski sira mak defisiente tilun. Entaun haʼu deside tuur hamutuk ho sira durante reuniaun.

Iha tempu neʼebá, la iha kongregasaun língua jestuál iha Bretaña. Ema defisiente tilun sira tuir reuniaun iha língua Inglés, no irmaun-irmán sira neʼebé la defisiente tilun mak tradús liafuan ida-idak husi Inglés ba língua jestuál tuir Inglés nia gramátika. Maibé, nuʼudar irmaun-irmán sira neʼebé defisiente tilun hanorin haʼu ho pasiénsia kona-ba língua jestuál, haʼu nota katak sira-nia língua iha gramátika neʼebé la hanesan ho Inglés nian. Tuir loos, sira-nia língua la hanesan duni ho Inglés! Kuandu haʼu rekoñese kona-ba neʼe, haʼu-nia domin no respeitu ba belun sira neʼebé defisiente tilun sai boot liután tanba sira tuir reuniaun beibeik ho laran-metin. Haʼu mós hakaʼas an liután hodi aprende ho didiʼak língua jestuál.

Iha Bretaña, língua ofisiál ba ema defisiente tilun mak língua jestuál Bretaña, ka BSL. Ikusmai, irmaun sira neʼebé tradús durante reuniaun uza língua jestuál Bretaña neʼebé klaru duké tuir Inglés nia gramátika. Rezultadu mak ema defisiente tilun sira bele hetan benefísiu barak liután husi reuniaun sira. Sira mós bele iha unidade liután ho irmaun-irmán sira neʼebé bele rona. Kuandu haʼu hanoin kona-ba buat neʼebé akontese iha tinan 50 nia laran, Jeová haraik bensaun barak loos ba ami-nia serbisu ho língua jestuál. Haʼu sei konta kona-ba mudansa furak balu neʼebé haʼu haree.

Atividade ho língua jestuál sai buras

Iha tinan 1973, neʼe mak tinan ida depois haʼu hetan knaar atu serbí nuʼudar katuas kongregasaun, irmaun ida naran Michael Eagers neʼebé defisiente tilun fó sujestaun atu halaʼo reuniaun balu iha língua BSL. Sukursál aprova atu irmaun katuas ida no haʼu halo arranju no organiza reuniaun língua jestuál fulan-fulan iha Deptford, Londres nia parte súl.

Rezultadu mak furak! Irmaun-irmán sira neʼebé defisiente tilun iha Londres no Inglaterra parte súl mai hodi tuir reuniaun ho língua BSL ba dala primeiru. Ikusmai, irmaun-irmán sira no ema defisiente tilun seluk bele aprende kona-ba Jeová no Bíblia iha sira rasik nia língua. Depois reuniaun, ami han hamutuk no fahe esperiénsia ba malu ho kontente. Haʼu mós iha oportunidade atu anima irmaun-irmán balu neʼebé defisiente tilun.

Tuirmai, reuniaun iha língua jestuál halaʼo mós iha sidade Birmingham no Sheffield. Irmaun-irmán barak neʼebé bele rona no hakarak aprende língua BSL mós tuir reuniaun sira neʼe. Depois neʼe, sira barak mak ajuda haklaken iha língua jestuál iha Inglaterra nia área oioin.

Haʼu hetan pár moris nian

Iha tinan 1974, haʼu hasoru irmán bonita ida naran Stella Barker. Nia serbí nuʼudar pioneiru espesiál iha kongregasaun ida neʼebé besik Betel. Ami laran monu ba malu no ami kaben iha tinan 1976. Depois kaben, ami serbí nuʼudar pioneiru espesiál iha Hackney, Londres parte norte, no Stella komesa serbí kongregasaun língua jestuál hamutuk haʼu. Kuandu haʼu hanoin fali, haʼu bele dehan katak pioneiru hamutuk nuʼudar feen-laʼen mak dalan furak ida atu komesa moris kaben nian.

Lakleur deʼit, Stella no haʼu hetan konvite atu ajuda serbisu iha Betel. Ami-nia moris mak okupadu loos! Haʼu mós serbí nuʼudar katuas área temporáriu, hanorin iha Eskola ba Katuas Kongregasaun, no tuirmai ajuda atu organiza tradús língua jestuál iha reuniaun boot. Ami-nia moris okupadu no kolen, maibé ami kontente tebes halo serbisu neʼe.—Mateus 11:28-30.

Iha tinan 1979 haʼu-nia oan-mane primeiru naran Simon moris, no iha tinan 1982 haʼu-nia oan-mane segundu naran Mark moris. Neʼe aumenta ami-nia kontente no mós responsabilidade nuʼudar inan-aman. Oinsá ami organiza ami-nia moris? Stella no haʼu deside katak kuandu haʼu iha knaar teokrátiku ruma iha fatin dook, haʼu sei bá hamutuk ho haʼu-nia feen no oan sira no fahe mós tempu atu halimar hamutuk. Ami hakarak ami-nia oan sira sente rasik katak serbí Jeová mak lori kontente! Rezultadu mak bainhira labarik sira-neʼe sai boot, sira laʼós deʼit aprende língua jestuál maibé sira mós komesa serbí nuʼudar pioneiru. Maizumenus tinan 40 depois haʼu-nia inan-aman nia karau-oan komesa “serbí iha Betel”, Simon no Mark mós tama Betel. Haʼu no Stella kontente loos!

Hakaʼas an ajuda ema defisiente tilun

Toʼo maizumenus tinan 1990, seidauk iha irmaun defisiente tilun neʼebé serbí nuʼudar katuas kongregasaun iha Bretaña, maibé iha ona atan ba kongregasaun balu. Rezultadu mak irmaun katuas neʼebé la hatene língua jestuál presiza tetu faktu sira no deside se atan balu neʼebé defisiente tilun “iha kbiit atu hanorin” no bele serbí nuʼudar katuas kongregasaun ka lae. (1 Timóteo 3:2) Sira ida mak irmaun Bernard Austin, nia mós tuir kongregasaun língua Inglés. Irmaun-irmán sira respeitu tebes nia, no nia hadomi duni Jeová nia bibi sira. Haʼu sente kontente loos bainhira rona katak nia simu knaar nuʼudar katuas kongregasaun! Loloos, nia mak katuas primeiru neʼebé defisiente tilun iha Bretaña.

Iha tinan 1996, buat furak ida akontese. Sukursál aprova harii kongregasaun língua jestuál primeiru iha Bretaña, iha Ealing, Londres Oeste. Depois neʼe, buat barak komesa laʼo ba oin.

Hetan benefísiu husi reuniaun hotu

Maizumenus husi tinan 1980 toʼo 2000, haʼu serbisu husi uma hamutuk ho Departamentu Serbisu iha Betel hodi hatán ba pergunta sira neʼebé liga ho kongregasaun língua jestuál no haklaken. Dala ruma, irmaun sira hakerek karta ba sukursál hodi husu oinsá sira bele ajuda ema defisiente tilun komprende programa iha reuniaun, asembleia no reuniaun boot sira neʼebé halaʼo ho língua Inglés. Iha tempu neʼebá, seidauk iha arranju atu tradús diskursu sira iha reuniaun no asembleia, no la iha publikasaun sira ba ema defisiente tilun. Entaun dala barak haʼu presiza anima irmaun-irmán sira, inklui sira neʼebé defisiente tilun atu hein ba Jeová ho pasiénsia.

Jeová haraik bensaun ba ami-nia pasiénsia! Ikusmai, sukursál organiza hodi interpreta língua Inglés ba língua jestuál iha reuniaun no asembleia. Liután neʼe, irmaun sira organiza fatin ba defisiente tilun hodi sira bele tuur iha oin no haree ho klaru ema neʼebé hatoʼo diskursu no mós ema neʼebé interpreta ba língua jestuál. Buat hotu neʼe halo irmaun-irmán sira neʼebé defisiente tilun bele sente katak Jeová hadomi tebes sira no sira mak folin-boot nuʼudar Jeová nia família.

Iha loron 1 Abríl 1995, asembleia primeiru ho língua jestuál halaʼo iha Salaun Asembleia iha Dudley, West Midlands. Haʼu ajuda irmaun David Merry neʼebé uluk serbí nuʼudar katuas área atu organiza asembleia neʼe. Irmaun-irmán balu neʼebé defisiente tilun halo viajen kilómetru atus ba atus hodi bele tuir asembleia neʼe, balu husi Eskósia iha parte norte no Cornwall iha parte súl. Haʼu sei hanoin-hetan ema hotu kontente tebes tanba iha ema naʼin-1000 liu mak asiste asembleia istóriku neʼe.

Iha tinan 2001, sukursál husu irmaun Merry no haʼu atu organiza reuniaun boot ho língua BSL ba tinan tuirmai. Iha serbisu barak neʼebé tenke halo! Maibé Jeová haraik bensaun ba irmaun-irmán sira-nia serbisu no reuniaun boot laʼo ho susesu no mós fó glória ba Jeová! Liután neʼe, haʼu hetan priviléjiu atu organiza asembleia no reuniaun boot iha língua jestuál toʼo tempu neʼebé Jeová fó fali knaar neʼe ba irmaun sira neʼebé idade kiʼik liu haʼu.

Vídeo oioin ba ema defisiente tilun

Iha tinan 1998, ami kontente loos bainhira Jeová nia organizasaun fó sai publikasaun primeiru iha língua BSL. Neʼe mak broxura Saida maka Maromak Hakarak ita atu Halo? iha vídeo kasete. Ho ida-neʼe, ami dirije estuda Bíblia ho ema barak.

Iha reuniaun boot tinan 2002, Knananuk espirituál interpreta ba língua BSL ba dala primeiru. Irmaun-irmán sira neʼebé defisiente tilun agora bele “kanta” hamutuk tuir irmaun neʼebé interpreta ba língua jestuál ho liafuan furak sira. Haʼu hanoin hetan irmaun katuas ida neʼebé defisiente tilun tanis ho kontente bainhira “kanta hamutuk” ba dala primeiru!

Iha reuniaun boot tinan 2002, akontese buat istóriku seluk tan neʼebé furak. Kongregasaun língua jestuál iha Londres hetan konvite atu hola parte hodi halo vídeo drama ba língua jestuál. Maibé oinsá mak ami bele halo? Ami la iha esperiénsia kona-ba neʼe! Dala ida tan, Jeová ajuda ami iha dalan furak. Nia ajuda ami atu hetan irmaun sira neʼebé hatene oinsá atu halo filme sira. Rezultadu mak ami halo vídeo drama neʼebé diʼak tebes! Laʼós neʼe deʼit, esperiénsia neʼe ajuda tebes ami, tanba husi tinan 2003 toʼo 2008 haʼu hetan priviléjiu iha Betel atu tau matan projetu halo vídeo drama neʼebé sei uza iha reuniaun boot iha língua BSL.

Stella ho haʼu gosta tebes ajuda serbisu ba Betel hamutuk ho ami-nia oan. Maibé serbisu neʼe halo ami okupadu tebes! Depois serbisu ba semana balu hodi treinu no halo filme hamutuk, ami hotu sente kole tebetebes. Maibé, rezultadu mak kapás! Ami kontente tebes bainhira haree katak istória oioin husi Bíblia book duni irmaun-irmán sira neʼebé defisiente tilun nia laran toʼo sira barak tanis ho kontente.

Jeová kontinua fó prezente barak liután. Iha tinan 2015, ami hetan Livru Haklaken estudu nian iha língua BSL. Tuirmai, iha tinan 2019, irmaun sira fó sai livru Mateus. Agora ami iha ona Bíblia Eskritura Lian Gregu hotu, no mós irmaun sira prepara daudaun Eskritura Lian Ebraiku. Irmaun-irmán sira hotu neʼebé defisiente tilun agradese tebes ba Jeová!

Nuʼudar Jeová nia povu, ita mak família espirituál neʼebé haleno Aman Jeová nia domin neʼebé la todan ba sorin. (Apóstolu 10:34, 35) Haʼu ho haʼu-nia família admira tebes tanba Jeová nia organizasaun uza tempu, forsa no osan atu ajuda ema hotu, inklui ema defisiente tilun no ema defisiente matan.a

Serbisu sira-neʼe hotu fó duni rezultadu. Agora iha kongregasaun língua BSL barak iha Bretaña. Haʼu sente kontente no haksolok tanba bele hola parte iha serbisu haklaken ho língua jestuál husi tempu “foin hahú halo buat kiʼik” toʼo sai buras. (Zacarias 4:10) Klaru, Jeová mak merese simu hahiʼi. Nia dirije ninia organizasaun. Nia fó buat hotu neʼebé ninia povu presiza atu haklaken liafuan diʼak ba ema hotu. No nia mak halo fini lia-loos nian sai buras iha ema nia laran.