Apoia atividade iha kongregasaun no iha mundu tomak

TESTEMUÑA BA JEOVÁ kumpre Jesus nia profesia atu haklaken liafuan diʼak “toʼo rai sira neʼebé dook liu iha mundu”. (Após 1:8; Mt 24:14) Sira ho laran uza sira-nia tempu no forsa atu halo atividade espirituál oioin. Sira tau uluk Maromak nia Ukun iha sira-nia moris, no fiar katak Jeová sei tau matan ba sira-nia presiza nuʼudar ninia maluk serbisu-naʼin. (Mt 6:25-34; 1 Kor 3:5-9) Rezultadu husi sira-nia serbisu hatudu ho klaru katak Jeová apoia sira no fó bensaun ba sira.

APOIA ATIVIDADE ESPIRITUÁL IHA MUNDU TOMAK

² Bainhira ema haree katak ita fahe publikasaun no Bíblia ho gratuitu, karik sira husu: “Oinsá imi bele halo nuneʼe?” Tuir loloos, ita presiza osan atu prodús no print publikasaun no Bíblia. Ita mós presiza osan atu halo konstrusaun no halo manutensaun ba uma Betel atu irmaun-irmán sira bele uza hodi halo serbisu atu prodús livru sira, apoia serbisu haklaken no mós halo serbisu seluk neʼebé liga ho Maromak nia Ukun. Presiza mós osan atu tau matan ba katuas área sira, misionáriu sira, pioneiru espesiál, no ema seluk neʼebé halo serbisu tempu-tomak ba Jeová. Klaru katak organizasaun presiza gasta osan barak atu haklaken liafuan diʼak iha kongregasaun no iha mundu tomak. Entaun osan neʼe mai husi neʼebé?

³ Ema barak hafolin serbisu neʼebé Testemuña ba Jeová sira halo, no ema sira-neʼe kontente atu fó osan hodi apoia Testemuña nia atividade iha mundu tomak. Maibé kontribuisaun barak liu neʼebé organizasaun simu mak mai husi Testemuña sira. Sira balu fó kontribuisaun liuhusi haruka sira-nia kontribuisaun ba Testemuña ba Jeová nia sukursál sira. Sira banati-tuir Maromak nia atan sira iha tempu uluk neʼebé fó kontribuisaun ho laran-luak hodi apoia serbisu atu harii fatin atu adora Jeová. (Éx 35:20-29; 1 Krón 29:9) Ema balu prepara karta deklarasaun, katak karta neʼebé fó sai sira-nia hakarak kona-ba entrega sira-nia sasán ba sukursál nuʼudar kontribuisaun kuandu sira mate. Iha mós kontribuisaun uitoan husi ema ida-idak, husi kongregasaun sira, ka husi asembleia ka reuniaun boot sira. Kontribuisaun sira-neʼe bele ajuda organizasaun atu apoia atividade espirituál sira.

⁴ Testemuña ba Jeová uza sira-nia osan no sasán atu apoia serbisu haklaken, no sira haree ida-neʼe nuʼudar priviléjiu ida. Jesus no ninia dixípulu sira lori kaixa osan nian, neʼe hatudu katak karik sira simu kontribuisaun atu bele sustenta sira-nia presiza. (João 13:29) Bíblia mós konta kona-ba feto sira neʼebé apoia Jesus no ninia dixípulu. (Mc 15:40, 41; Lc 8:3) Apóstolu Paulo simu no hafolin ajuda husi ema sira neʼebé hakarak atu apoia serbisu haklaken no mós apoia nia atu kumpre ninia knaar. (Flp 4:14-16; 1 Tes 2:9) Testemuña ba Jeová mós halo tuir ezemplu sira-neʼe hodi haklaken ho badinas no fó kontribuisaun ho laran-luak. Liuhusi kontribuisaun sira-neʼe, ema laran-loos iha mundu tomak bele simu “bee moris nian no la presiza selu”.​—Apok 22:17.

APOIA KONGREGASAUN NIA PRESIZA

⁵ Kongregasaun ida-idak simu kontribuisaun atu taka sira-nia gastu. Kongregasaun sira la husu ezmola. No kongregasaun la deside kona-ba osan hira mak ema ida-idak tenke fó, no mós la obriga ema atu fó kontribuisaun. Iha Reuniaun-Fatin iha kaixa kontribuisaun sira, atu nuneʼe ema ida bele fó kontribuisaun “tuir buat neʼebé nia deside ona iha laran”.​—2 Kor 9:7.

⁶ Ulukliu kongregasaun sei uza osan kontribuisaun atu taka kongregasaun nia presiza, hanesan tau matan ba Reuniaun-Fatin no mós halaʼo reuniaun sira. Grupu katuas bele deside atu haruka osan balu ba sukursál atu apoia atividade iha mundu tomak. Se sira deside atu halo nuneʼe, kongregasaun presiza halo rezolusaun hodi apoia desizaun neʼe. Hodi halo nuneʼe, kongregasaun barak fó kontribuisaun beibeik atu apoia atividade iha mundu tomak. Baibain la presiza halo anúnsiu beibeik iha kongregasaun tanba karik ema hotu hatene ona kona-ba osan neʼebé kongregasaun uza atu tau matan ba Reuniaun-Fatin.

OINSÁ ATU TAU MATAN BA KONTRIBUISAUN?

⁷ Depois reuniaun ida-idak, irmaun naʼin-rua sei sura no hakerek osan hira mak ema tau iha kaixa kontribuisaun sira. (2 Reis 12:9, 10; 2 Kor 8:20) Grupu katuas sei halo arranju atu rai osan neʼe ho seguru toʼo sira bele haruka ba sukursál ka uza ba kongregasaun nia presiza. Irmaun neʼebé tau matan ba kongregasaun nia osan sei prepara relatóriu fulan-fulan atu fó sai ba kongregasaun. Kada fulan tolu, koordenadór ba grupu katuas sei arranja irmaun ruma atu verifika kongregasaun nia osan.

GASTU ATU HALAʼO ASEMBLEIA

⁸ Kontribuisaun neʼebé irmaun-irmán sira fó durante asembleia sei uza atu halaʼo asembleia no mós atu taka gastu sira seluk. Iha fatin neʼebé uza ba asembleia, iha kaixa kontribuisaun neʼebé ema bele tau sira-nia kontribuisaun. Liután neʼe, kongregasaun sira bele fó kontribuisaun iha tempu seluk atu bele taka gastu sira seluk ba asembleia.

⁹ Baibain kongregasaun sira iha área ida mak sei taka gastu sira ba asembleia, no osan restu bele haruka ba sukursál atu apoia atividade iha mundu tomak. Maibé dala ruma osan la toʼo atu taka gastu sira ba asembleia ka atu arranja asembleia tuirmai, hanesan selu nanis osan aluga ba fatin neʼebé uza ba asembleia. Se neʼe akontese, katuas área bele fó matadalan ba kongregasaun sira kona-ba oinsá kongregasaun sira bele fó kontribuisaun. Grupu katuas husi kongregasaun ida-idak sei koʼalia no deside kona-ba osan hira mak kongregasaun bele fó atu taka gastu sira ba asembleia. Tuirmai, sira sei halo rezolusaun kona-ba arranju neʼe.

¹⁰ Bainhira mosu asuntu ruma kona-ba osan neʼebé gasta ba asembleia no katuas sira iha área ida presiza hatene kona-ba neʼe, katuas sira presiza arranja enkontru iha loron asembleia nian. Katuas sira la presiza aprova osan neʼebé baibain gasta atu halaʼo asembleia, maibé sira presiza foti desizaun kona-ba osan neʼebé gasta ba buat seluk liuhusi halo rezolusaun. Iha rezolusaun sira-neʼe, katuas sira tenke hakerek ho loloos osan hira mak presiza, no husu katuas sira iha área neʼe atu aprova ida-neʼe.

¹¹ Katuas área sei arranja beibeik irmaun ruma atu bele verifika osan neʼebé uza ba asembleia.

AJUDA EMA KIAK

¹² Razaun ida tanbasá Jesus no ninia dixípulu sira lori kaixa osan nian mak atu ajuda ema kiak. (Mc 14:3-5; João 13:29) Ohin loron, ema Kristaun mós presiza ajuda ema kiak tanba Jesus dehan: “Ema kiak sira nafatin hamutuk ho imi.” (Mc 14:7) Oinsá Testemuña ba Jeová halo ida-neʼe?

¹³ Dala ruma, irmaun-irmán balu iha kongregasaun presiza osan ka sasán tanba sira idade ona, defisiente, ka hasoru susar sira seluk neʼebé sira labele kontrola. Dala ruma sira-nia família ka ema seluk neʼebé hatene kona-ba sira-nia situasaun hakarak fó ajuda ba sira. Neʼe tuir duni apóstolu João nia liafuan neʼebé dehan: “Se ema iha sasán mundu neʼe nian no nia haree katak ninia maun-alin falta buat ruma, no nia lakohi hatudu laran-sadiʼa ba ninia maun-alin, entaun oinsá mak nia bele dehan katak nia hadomi Maromak? Oan doben sira, ita tenke hatudu domin laʼós ho liafuan ka ibun deʼit, maibé ho hahalok no lia-loos.” (1 João 3:17, 18; 2 Tes 3:6-12) Adorasaun neʼebé loos inklui tau matan ba ema laran-metin sira neʼebé presiza osan ka sasán.​—Tgo 1:27; 2:14-17.

¹⁴ Iha apóstolu Paulo nia karta primeiru ba Timóteo, nia esplika oinsá ita bele fó ajuda ba ema neʼebé presiza duni ajuda. Ita bele lee ninia konsellu iha 1 Timóteo 5:3-21. Primeiru, ema Kristaun ida-idak iha responsabilidade atu tau matan ba ninia umakain nia presiza. Ema neʼebé idade ka defisiente presiza simu ajuda husi sira-nia oan, bei-oan, ka família neʼebé besik. Dala ruma sira bele simu ajuda husi governu ka organizasaun seluk, entaun sira-nia família bele ajuda sira atu tau naran hodi simu ajuda. Dala ruma iha situasaun balu, kongregasaun presiza fó ajuda ba irmaun ka irmán neʼebé serbí Maromak ho laran-metin ba tempu kleur. Se ema neʼe la iha família ruma neʼebé bele ajuda nia, no nia la simu ajuda husi governu ka organizasaun seluk, grupu katuas sei halo arranju atu ajuda nia. Ba ema Kristaun, fó ajuda ba ema seluk mak priviléjiu ida.

¹⁵ Irmaun-irmán barak presiza simu ajuda tanba ema fó-terus, mosu funu, rai-nakdoko, udan no bee-saʼe, rai-hamlaha, ka dezastre seluk durante loron ikus sira-neʼe. (Mt 24:7-9) Karik irmaun-irmán sira neʼebé kona dezastre la iha kbiit atu ajuda malu, tan neʼe Grupu Administradór sei arranja irmaun-irmán sira husi fatin seluk atu fó ajuda neʼebé sira presiza. Neʼe tuir duni ezemplu husi ema Kristaun iha Ázia Menór neʼebé fó ai-han ba maluk Kristaun sira iha Judeia durante tempu rai-hamlaha. (1 Kor 16:1-4; 2 Kor 9:1-5) Hodi halo nuneʼe, ita hatudu domin ba ita-nia maluk Kristaun no hatudu katak ita mak Jesus Kristu nia dixípulu neʼebé loos.​—João 13:35.

HARUKA PUBLIKASAUN SIRA

¹⁶ Ita presiza tebes Bíblia no publikasaun sira kona-ba Bíblia atu bele haklaken mensajen kona-ba Maromak nia Ukun. Baibain grupu katuas mak fó knaar ba atan ba kongregasaun ida atu tau matan ba kongregasaun nia publikasaun sira. Irmaun neʼebé hetan knaar neʼe presiza halaʼo didiʼak ninia knaar. Nia halo lista no haree didiʼak katak kongregasaun sempre iha publikasaun neʼebé sira presiza.

¹⁷ Nuʼudar ema Kristaun, ita hatene katak ita-nia tempu, abilidade, matenek, rikusoin no moris mak prezente husi Maromak no ita bele uza prezente sira-neʼe atu serbí nia. (Lc 17:10; 1 Kor 4:7) Hodi uza didiʼak ita-nia osan no sasán, ita hatudu katak ita hadomi tebes Jeová. Ita hotu hakarak hahiʼi Jeová ho ita-nia sasán neʼebé folin-boot, no fiar katak nia kontente atu simu prezente hotu neʼebé ita fó ho laran tanba hakarak adora nia. (Prov 3:9; Mc 14:3-9; Lc 21:1-4; Kol 3:23, 24) Jesus dehan: “Imi simu hodi la selu, tan neʼe fó mós hodi la hein atu ema selu imi.” (Mt 10:8) Kuandu ita uza ita-nia forsa no rikusoin atu serbí Jeová, ita mós sei hetan kontente neʼebé boot liu.​—Após 20:35.