Saida mak Bíblia hanorin kona-ba habelun ho ema?

Bíblia nia resposta

Bainhira ita habelun ho ema, neʼe bele ajuda ita sente kontente no hetan susesu iha moris. Belun neʼebé diʼak bele fó influénsia diʼak ba malu no ajuda malu atu hatudu hahalok diʼak.—Provérbios 27:17.

Maibé, Bíblia esplika katak ita presiza hili didiʼak ita-nia belun sira. Bíblia fó avizu mai ita kona-ba konsekuénsia aat neʼebé bele mosu se ita hili belun neʼebé sala. (Provérbios 13:20; 1 Korinto 15:33) Belun neʼebé la diʼak bele book ita atu halo desizaun neʼebé la diʼak no estraga ita-nia hahalok diʼak.

Iha informasaun neʼe

Belun neʼebé diʼak hatudu hahalok saida?

Bíblia hanorin katak relasaun belun la bazeia deʼit ba gosta ka hobi neʼebé hanesan. Porezemplu, Salmo 119:63 hatete: “Haʼu sai belun ho sira hotu neʼebé hamtaʼuk Itaa no ho sira neʼebé halo tuir Ita-nia lei sira.” Ema neʼebé hakerek Salmo neʼe hatete katak nia hili belun sira neʼebé hamtaʼuk Maromak no hakarak moris tuir Maromak nia matadalan sira.

Bíblia mós fó sai hahalok oioin neʼebé belun diʼak ida presiza hatudu. Porezemplu:

“Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.
“Iha kolega balu neʼebé hakarak atu halo aat ba malu, maibé iha mós belun neʼebé laran-metin liu fali maun-alin.”—Provérbios 18:24.

Eskritura sira-neʼe hanorin ita katak belun neʼebé diʼak hatudu laran-metin, domin, laran-diʼak no laran-luak. Ita bele sadere ba belun neʼebé diʼak iha tempu diʼak no mós iha tempu susar. Belun neʼebé diʼak brani atu hasé ita se ita komesa laʼo sala dalan ka besik atu halo desizaun neʼebé sala.—Provérbios 27:6, 9.

Iha ezemplu saida deʼit husi Bíblia kona-ba belun neʼebé diʼak?

Iha Bíblia, ita bele lee ezemplu diʼak oioin kona-ba ema neʼebé sai belun diʼak maski sira-nia idade, situasaun moris, kultura no pozisaun la hanesan. Mai ita haree ezemplu tolu.

Rute no Noemi. Rute mak Noemi nia feto-foun no karik Noemi tinan boot liu fali Rute. Rute no Noemi nia kultura mós la hanesan. Maski nuneʼe, sira sai belun diʼak no hadomi malu.—Rute 1:16.
David no Jonatan. Maski Jonatan boot liu fali David tinan 30, maibé Bíblia hatete katak David no Jonatan “sai belun diʼak neʼebé laran-metin ba malu”.—1 Samuel 18:1.
Jesus no ninia apóstolu sira. Jesus iha pozisaun boot liu fali ninia apóstolu sira tanba nia mak sira-nia mestre no naʼi. (João 13:13) Maski nuneʼe, nia la hanoin katak sira la merese atu sai ninia belun. Jesus iha relasaun belun neʼebé besik ho ema sira neʼebé halo tuir ninia hanorin sira. Nia hatete: “Haʼu bolu imi belun, tanba haʼu fó-hatene ona ba imi buat hotu neʼebé haʼu rona husi haʼu-nia Aman.”—João 15:14, 15

Ita bele sai Maromak nia belun ka lae?

Sin, ita bele duni sai Maromak nia belun. Bíblia hatete: “Nia sai belun neʼebé besik ho ema laran-loos.” (Provérbios 3:32) Neʼe katak Maromak hili atu habelun ho ema neʼebé hakaʼas an atu hatudu hahalok diʼak, onestu no mós hakaʼas an atu moris tuir ninia matadalan kona-ba buat neʼebé loos no sala. Porezemplu, Bíblia bolu Abraão neʼebé laran-metin nuʼudar Maromak nia belun.—2 Krónikas 20:7; Isaias 41:8; Tiago 2:23.

a Kontestu husi Salmo neʼe hatudu katak “Ita” neʼebé temi iha versíkulu neʼe refere ba Maromak.

Eskritura sira kona-ba habelun ho ema

Salmo 119:63: “Haʼu sai belun ho sira hotu neʼebé hamtaʼuk Ita no ho sira neʼebé halo tuir Ita-nia lei sira.”

Signifikadu: Ita presiza hili belun sira neʼebé mós adora Maromak no hakarak moris tuir ninia matadalan sira.

Provérbios 3:32: “Jeováb hakribi ema neʼebé laran-makerek, maibé nia sai belun neʼebé besik ho ema laran-loos.”

Signifikadu: Ema neʼebé hakarak sai Maromak nia belun tenke hatudu hahalok onestu no iha morál neʼebé moos.

Provérbios 13:20: “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.”

Signifikadu: Ema bele hetan influénsia diʼak ka aat husi ema neʼebé sira ransu.

Provérbios 17:17: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”

Signifikadu: Belun neʼebé loos apoia ita durante tempu diʼak no mós tempu susar.

Provérbios 18:24: “Iha kolega balu neʼebé hakarak atu halo aat ba malu, maibé iha mós belun neʼebé laran-metin liu fali maun-alin.”

Signifikadu: Belun neʼebé loos sei la aproveita ita. Duké halo nuneʼe, nia mak laran-metin, hatudu domin no ita bele tau fiar ba nia.

Provérbios 27:6: “Belun neʼebé laran-metin fó konsellu maski neʼe bele hakanek ninia maluk nia laran.”

Signifikadu: Belun neʼebé loos sei la dada an atu fó konsellu ba ita, se ita presiza simu konsellu.

Provérbios 27:17: “Besi kadi ho besi bele sai kroʼat, nuneʼe mós ema ida bele halo kroʼat ninia belun.”

Signifikadu: Belun neʼebé diʼak ajuda malu atu hatudu hahalok diʼak.

b Jeová mak Maromak nia naran neʼebé temi iha Bíblia.